Македонија

Пазарната инспекција минатата недела казнила 56 угостителски објекти и казина во кои се пушело

Над 100.000 евра ќе се слеат во државната каса од казните на кафеаните и казината во кои инспекторите на Државниот пазарен инспекторат, во текот на минатата недела, затекнале пушење цигари внатре, на недозолено место.

Највисоката казна е 4.500 евра, а најмалата за овој прекршок е 2.000 евра, па ако се направи група математика со најнискиот износ кој треба да го платат околу шеесетина објекти во кои инспекторите утврдиле непочитувања, тоа се 112000 евра. Од Државниот пазарен инспекторат за Канал 5 информираат дека минатата недела низ Македонија инспекции имало во вкупно 200 објекти, а прекшувања се утврдени во 56. Оттаму најавуваат засилени контроли, па апелираат и до граѓаните да внимаваат во кој дел од кафеаните палат цигара, бидејќи за нив казната е од 100 до 300 евра.

-Заради зголемениот број на пријави од страна на граѓаните за пушење во јавните простории, напоменуваме дека пушењето е дозволено исклучиво надвор од деловниот објект (тераса, летна бавча и слично). Казните се високи, па токму затоа даваме апел и известување до правните субјекти врз кои се врши контролата, законот да се почитува, а граѓаните доколку забележат прекршувања да го искористат своето законско право поднесувајќи пријава до Државниот пазарен инспекторат.-ДПИ.

Во меѓувреме, дел од угостителите кои ги контактиравме не сакаа да говорат јавно, но во телефонски разговор признваат дека во голем дел од кафеаните, законот не се почитува. Оние пак кои тврдат дека се придржуваат до правилата, сметаат дека треба да се отвори дебата да им даде можност на угостителите право на избор, па тие да одлучат дали ќе се дозволи пушење на цигари во целиот објект, односно да има кафеани во кои ќе се пуши и такви во кои пушењето воопшто нема да биде дозволено. Сепак ни тие не сакаат да говорат во камера, а со став не се одважуваат ниту од комората на угостители.

Пред четири години, во 2018, кога СДСМ дојде на власт го смени Законот за заштита од пушење, па се дозволи пушење на цигари во затворени стакларници на кафеаните и кафулињата што само наликуваат на тераси. Со ова се отвори можност да се манипулира со навидум затворени делови на објектите. Инаку, со првичниот Закон, донесен кога премиер беше Груевски, терасите на рестораните и кафулињата не смееја да бидат целосно затворени. Сега, кафулињата кои речиси и не инвестираат во соодветна вентилација, повремено ги луфтираат просториите преку отворените покриви во импровизирани тераси, кои всушност се црвста градба.

Свет

Во поплави во авганистанската провинција Фарјаб уште 18 лица го загубија животот

Во поплави кои повторно ја зафатија северната авганистанска провинција Фарјаб уште 18 лица го загубија животот, а двајца се повредени, соопшти Министерството за бегалци, цитирано од ДПА.

Уништени или оштетени се стотици куќи, близу 200 хектари земјоделско обработливо земјиште, над 100 дуќани, амбуланта. Угинаа и животни на фарма, се вели во соопштението на Министерството.

Поплавите ја влошија и така тешката хуманитарна криза во Авганистан, зголемувајќи го бројот на жртви од многуте природни катастрофи што ја погодија земјата во последниве години.

Властите во централната провинција Гор вчера соопштија за најмалку 50 смртни случаи како резултат на обилните дождови и поројните поплави кои блокираа голем број клучни патишта во областа. Слична загриженост изразија и властите во провинцијата Бадакшан, каде што надојдените води блокираа главен пат.

Претходно оваа недела, поплава ја зафати северната провинција Баглан и животот го загубија повеќе од 300 луѓе, јави ДПА. /МИА

Македонија

Мицкоски: Ќе водиме принципиелна политика со соседите

Претседателот на ВМРО-ДПМНЕ и иден мандатар Христијан Мицкоски денеска најави водење принципиелна политика со соседите.

Како идна Влада, како што рече, на денешното одбележување на годишнината од Разловечкото востание, коалицијата „Твоја Македонија“ ќе се залага за принципот „своето не го даваме, туѓото не го сакаме“, потенцирајки дека нема да се прават избрзани чекори, кои можат „многу“ да ја чинат државата.

-Вие сте свесни дека дека против природата не можеме, како народ сме од најмалубројните народи во Европа. Организацијата која што има често и привилегијата да ги брани интересите на еден од најмалобројните народи во Европа - македонскиот народ, треба да е мудра. Не треба да правиме избрзани чекори кои што може да не чинат многу. Подобро да се придвижуваме за милиметар, но тој чекор да биде цврст. Мора да сме трпеливи, мора да сме попаметни, тројно попаметни од сите и помудри, затоа што само така можеме да опстанеме во круг на многу предатори кои што верувајте не сакаат да ја видат Македонија успешна, не сакаат да ја видат Македонија просперитетна, среќна, Македонија полна со граѓани кои што се задоволни. Тоа го видовте уште во првите денови кога ние не бевме се уште разбудени од оној историски резултат на 8 мај, а веќе почнаа страстите да се вжештуваат, но не само наоколу туку и дома, рече Мицкоски.

Како идна Влада, додаде, победничката коалиција е подготвена сите тие предизвици да ги совлада, како што рече, трпеливо и со паметна политика која како таква политика ќе се води со соседите.

-Ве повикуваме на градење мостови, ги повикуваме сите на заедничка соработка во рамките на овој наш преубав Балкан. Што се однесува до меѓународната политика нема никогаш да не видите како коленичиме, како се вовлекуваме или како се понижуваме самите себе. Имав можност изминативе години да среќавам светски авторитети од Вашингтон преку Брисел и Берлин и останатите светски важни главни градови. Ништо повеќе за мене не е инспиративно отколку овој преубав македонски народ и ова преубава наша македонска држава, така што ќе имаме и кон нив една политика која што ќе се темели на аргументи, бидејќи никогаш не се плашиме да ги вкрстиме нашите аргументи со аргументите на нашите соговорници, додаде Мицкоски.

Мицкоски отфрли какво било беспотребно иритирање кон соседите, напоменувајќи дека сепак треба да се почитува елементарното човеково право кое е загарантирано.

Свет

Калињак: Словачкиот премиер Фицо е надвор од животна опасност

Словачкиот премиер Роберт Фицо е надвор од животна опасност по обидот за атентат, изјави денеска министерот за одбрана и вицепремиер Роберт Калинак за словачката новинска агенција ТАСР.

Состојбата на Фицо се подобрува и вчера беше соопштено дека е стабилизирана, според министерката за здравство Зузана Долинкова.

Лекарската комисија утре треба да одлучи дали тој ќе биде префрлен. Фицо моментално се опоравува во универзитетската болница во Банска Бистрица.