Светската здравствена организација соопшти дека 14 проценти од луѓето со „Ковид-19“, болест предизвикана од новиот коронавирус, развиваат тешка клиничка слика и имаат потреба од хоспитализација и поддршка со кислород.

Но, пресметувањето на шансите за преживување во раната фаза на пандемијата не може да биде прецизно.

Стапката на смртност варира од 0,9 до 3,4 проценти, во зависност од различните податоци. Не може да има прецизна пресметка, бидејќи здравствените работници немаат идеја колку луѓе се заразени, а не развиле симптоми или биле толку благи што не побарале лекарска помош.

„Нема да го знаеме целиот степен на болеста сè додека не добиеме малку време и не ги анализираме податоците“, рече американскиот имунолог Џeин Олингер.

За да утврдат кој е најранлив, научниците ќе треба да земат предвид фактори како што се климата, пристапот до здравствена заштита и генетиката. Туберкулозата, на пример, сè уште убива еден и пол милиони луѓе низ целиот свет годишно, но зачестеноста варира значително во зависност од климата и географијата.

Во досегашниот развој на пандемијата, еден модел се истакнува без некоја научна анализа: Најранлива група се постарите лица, особено оние со претходни заболувања.

Тимот на Светската здравствена организација (СЗО) ја посети Кина минатиот месец, извор на пандемијата и откри дека стапката на морталитет кај сите возрасни групи на претходно здрави луѓе е 1,4 проценти.

Но, кај оние кои претходно имале кардиоваскуларни заболувања, изнесувал 13,2%, кај дијабетичарите 9,2%, со висок притисок 8,4%, кај оние со хронични респираторни заболувања 8% и 7,6% кај пациенти со карцином.

Пациентите над 80 починале со стапка од 21,9 проценти.

Посебна студија објавена минатиот месец од страна на научници од кинескиот центар за контрола и превенција на болести, спроведена на 45.000 потврдени случаи на „Ковид-19“, покажа дека вкупната смртност е 2,3 проценти, но со зголемување од плус осум проценти за пациентите во нивните седумдесетти и 14,8 проценти за оние над 80 години.

Бидејќи и двете студии биле спроведени во Кина, што е недоволно разновиден примерок, британските научници од Кралскиот колеџ во Лондон ја спроведоа анализата на глобално ниво.

Според нив, вкупната стапка на смртност е 0,9 проценти, но се искачува на 2,2 проценти за пациентите во 60-тите, на 5,1 процент во 70-тите и на 9,3 проценти во осумдесеттите години и постарите.

„Сосема е јасно дека возраста игра голема улога. Како што стареете, шансите за преживување се намалуваат“, вели вирологот од Хонг Конг Др. Малик Перис.

Иако годините се најголем ризик, тие во никој случај не се единствени. Во сите досегашни анализи, откриено е дека високиот крвен притисок, дијабетесот и срцевите заболувања придонесуваат за потешка клиничка слика на пациентите.

Перис вели дека постојните податоци се само врв на ледениот брег. Бројни непознати случаи може да ја зголемат стапката на смртност од обете страни.

Ова се случи во 2009 година со т.н. пандемија на свински грип или вирусот Х1Н1. Во раните денови, стапката на смртност се чинеше дека е два проценти, рече Перис.

Со текот на времето, научниците барале антитела на Х1Н1 во примероци од крв кај општата популација, откривајќи дека многумина се заразиле и закрепнале и не знаеле дека се болни. Кога сите овие случаи се вклучени во статистиката, стапката на смртност се намали на само 0,002 проценти, рече тој.

„Важно е да се знае стапката на смртност“, истакнува Перис. "Многу земји зборуваат за агресивни мерки кои се многу тешки за економијата затоа што претпоставуваат дека стапката е еден процент или повисока. Но, ако знаете дека е пониска, мерките ќе бидат сосема различни. Одговорот на инфекцијата се заснова врз нејзината сериозност."

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.