Градежните работи на првата линија на Градскиот воз од Зелениково до Нова железничка станица привршуваат. Од септември ќе се стави во функција градскиот воз на оваа линија, вели во интервју за „Призма.мк”, директорот на МЖ Инфраструктура, Синиша Ивановски.

-Во моментов активни се градежните работи од Зелениково до главната железничка станица, во должина од околу 25 километри. Ова е постоечка пруга, дел од коридорот 10 и одамна е во функција, но не онака како што треба да биде. На делницата се прави реконструкција, комплетно се демонтираше целата пруга, дел од праговите се заменети со бетонски, а другиот дел, кон Скопје, со нови, дрвени прагови. Правевме тестирања и веруваме дека по комплетно завршување на градежните работи до крајот на јуни, ќе може да се вози повторно со проектираните 80 км/ч, за патничкиот сообраќај. Потоа ќе има дополнителни тестирања, но во принцип, овој крак за градски воз би требало од септември да биде во целосна функција, вели тој.

За делниците кон Илинден и Ѓорче Петров, градежниот дел ќе биде сличен.

-И на двете места има постоечка пруга, меѓутоа за разлика од таа од Зелениково, на овие делници нема никаков сообраќај и се во многу лоша состојба. Веќе објавивме постапка за двата проекти, и ако успееме да завршиме со проектирање до септември, веднаш ќе има оглас за избор на изведувач на двете траси, за кон крајот на 2026 да почнеме и до крајот на 2027 да ги завршиме.

Во ребалансот на буџетот ги баравме овие средства, да бидат во развојната програма, дел во 26-та, дел во 27-ма и можеби дел во 2028 година и се надеваме дека ќе ни биде одобрени, приоритет на владата е да имаме градски воз, вели Ивановски.

На прашањето за тоа дали ќе има воз и како ќе се реализира возниот сообраќај, Ивановски одговара дека се во целосна координација со МЖ Транспорт и ЈСП.

-Мора да имаме координација со другото претпријатие (МЖ Транспорт н.з.). Им кажавме, ние ќе ги направиме пругите, вие возовите како знаете да ги обезбедите. Дадоа збор дека од први септември, ќе има воз којшто специјално ќе биде наменет за градскиот воз и тој нема да продолжува кон Гевгелија, туку од Транспортен центар до Зелениково, во континуитет. Возниот ред го одредуваат тие, меѓутоа сигурно ќе го има повеќе пати во денот. Ќе мора да помогне и Јавното сообраќајно претпријатие на Град Скопје. Градоначалникот даде согласност дека при креирање на возниот ред ќе биде вклучено ЈСП, за синхронизирано собирање на патници од населените места и носење до самата станица. Верувам дека и двете претпријатија, и МЖ Транспорт и ЈСП, ќе најдат ресурси за овој проект да биде функционален бидејќи даваме целосно нова алтернатива за движење и транспорт. Мора да најдат. И јас можам да имам оправдување дека немаме капацитети, но даваме приоритет на градскиот воз за да заживее. Со него ќе имаме извесност, ќе знаеме за колку минути ќе стигнеме до центарот. А со автомобил, дали имало протест, делегација или сообраќаен метеж, нема извесност, па затоа оваа алтернатива за приградските населби е нешто што би требало да биде приоритет и за Град Скопје, и за ЈСП и за МЖ Транспорт, вели директорот Ивановски.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Вели дека доживеале хорор, објави фотографии од повредите на дечињата и побара реакција од институциите.

-На 22.05.2026 година, во с. Другово – Кичево, доживеавме вистински хорор. Излегов со моите две малолетни деца на кратка прошетка, кога нè нападнаа две агресивни црни кучиња (ротвајлери).

Прво почнаа да лаат. Во паника, помалото дете го кренав во раце, а со другата рака се обидував да го заштитам поголемото девојче и ја криев зад мене. Во тој момент едното куче ми го повлече малото дете од раце и тоа падна на бекатон. Додека се обидував да го спасам, се појави и другото куче, кое агресивно ме нападна, ми го фати за дуксерот и повторно ми го повлече детето. Детето беше влечено по бекатонот и во еден момент до нас дојде кола, изгасна колата и детето заврши буквално до предното тркалото речиси под автомобил. Со последни сили успеав да го извлечам, го зедов во раце и влегов во двор кај соседите за да се спасиме. Но, кучињата продолжија да се враќаат по нас, пишува мајката.

Информира дека детето се здоби со телесни повреди констатирани во Медицинскиот центар Кичево.

-Најстрашно од сè е што човекот кој ги чува кучињата ладнокрвно одговори дека „не му е ништо“ и не покажа никаква грижа, одговорност или човечност. Не праша ни како се децата, ни што точно се случило. Овој случај е пријавен во МВР од страна на брзата помош, дадена е изјава од моја страна. Ова не го споделувам за да правам драма, туку затоа што денес беше моето дете — утре може да биде нечие друго. Барам одговорност и реакција од надлежните институции. Никој не смее да поминува низ ваков страв и траума. Ве молам за поддршка, споделување и обединување како народ, за конечно да се стави крај на вакви ситуации пред да биде предоцнa, пишува мајката.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Советот на Европската Унија го усвои третиот пакет за билатерална помош во рамките на Европскиот мировен фонд во вредност од 21 милион евра за поддршка на вооружените сили на Албанија, со што вкупната поддршка за земјата досега достигна 49 милиони евра, се вели во соопштението на Советот на ЕУ.

Како што е наведено, целта на мерката е да се зајакнат одбранбените капацитети на Албанија и да се подобри способноста на нејзините вооружени сили да учествуваат во меѓународни операции и мисии навремено и ефикасно, вклучително и во Заедничката безбедносна и одбранбена политика (ЗБОП) на Европската Унија.

Високиот претставник на ЕУ за надворешни работи и безбедносна политика, Каја Калас, ја оцени Албанија како „близок и сигурен партнер“ и „посветен сојузник на НАТО“, нагласувајќи дека зајакнувањето на соработката придонесува за европската стабилност и безбедност.

Одлуката следува по потпишувањето на Договорот за партнерство за безбедност и одбрана меѓу ЕУ и Албанија во декември 2024 година, како и дијалозите за безбедност и одбрана одржани во април 2025 и 2026 година.

Новиот пакет предвидува испорака на лесни оклопни повеќенаменски возила, тактички и инженерски возила, како и помошна опрема, обука и услуги за одржување за потребите на албанските вооружени сили.

Европскиот мировен фонд, основан во 2021 година, ѝ овозможува на ЕУ да го финансира зајакнувањето на одбранбените капацитети на трети земји и меѓународни организации со цел зачувување на мирот и стабилноста, се објаснува во соопштението на Советот на ЕУ.

Претходно беа одобрени два пакета помош во вредност од 13 и 15 милиони евра за Албанија.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.