Што се крие зад случајот со двојното убиство во Кратово кога пред три дена 36 годишната жена ги уби сопругот и свекорот во семејната куќа.

Платформата за родова еднаквост реагира на квалификацијата на делото, повикувајќи се на соопштението на Обвинителството во кое се наведува дека на убиството му претходела вербална расправија, а оти потоа сопругот почнал физички ја напаѓа осомничената, ја удирал со тупаници во главата и телото, а потоа почнал да ја дави.

-Сметаме дека во конкретниов случај станува збор за акт на самоодбрана, односно, за институтот нужна одбрана, а не за сторено кривично дело „убиство со умисла“, како што тврди Јавното обвинителство во своето соопштение. Крајно парадоксално е што жртвата на семејно насилство сега е гонета од Јавното обвинителство како извршителка на семејно насилство, од страна на ЈО во Куманово. – Александра Трајановска – Хелсиншки комитет за човекови права

Овој случај, како што посочуваат од Платформата, многу наликува на случајот со Пале Иловска од Велес која, исто така, беше жртва на семејно насилство и како акт на самоодбрана го уби насилникот, па бараат судот да ги има предвид аргументите во таа ослободителна пресуда.

Според неофицијланите верзии во јавноста, 36 годишната жена која го изврши двојното убиство секојдневно била тепана, во топлите денови носела дуксер за да ги сокрие модринките од насилството на сопругот и барала помош од институциите. Според некои тврдења, три дена пред убиството, била избркана од дома, а децата останале во куќата. Спиела на улица и потоа влегла во куќата каде пак трпела насилство по што се случило убиството.

Сепак, која ќе биде финалната верзија на настанот сепак ќе покаже обвинителската истрага откако ќе бидат проверени сите околности. Оттаму велат:

-Јавното обвинителство мора да ги преземе сите дејствија за целосно да го истражи настанот и не може да ги отфрла од старт кривичните пријави без проверки.- ЈОРМ