Поранешниот бразилски гимнастички тренер Фернандо де Карваљо Лопес, е осуден на 109 години и осум месеци затвор за повеќекратно силување, сексуално и психичко вознемирување на најмалку четири гимнастичарки, од кои најмладата имала 13 години, јавуваат медиумите во Бразил.

Карваљо Лопес, кој се изјасни за невин во текот на целиот процес, има право на жалба на одлуката на Судот во Сао Бернардо до Кампо, државата Сао Паоло.

Случајот за прв пат стана јавен во април 2018 година благодарение на новинарите истражувачи од ТВ програмата „Фантастико“, тогаш во приказната беа вклучени обвинителството и полицијата. Топката почна да се отплеткува и тренерот етикетиран како манијак заврши зад решетки.

Осудениот тренер работеше со девојчиња на возраст до 20 години, станува збор за бразилската репрезентација, а потоа во 2016 година, непосредно пред Олимписките игри во Рио де Жанеиро, беше исфрлен од репрезентацијата.

Тој доби отказ по пријава на родителите на една од гимнастичарите која беше под негово тренерско покровителство.

Две години подоцна, благодарение на тимот на ТВ „Фантастико“, поточно во април 2018 година, беше откриено дека Карваљо Лопез бил пријавен од десетина гимнастичарки кои ги тренирал во периодот од 1999 до 2016 година. Од тој број, четири гимнастичарки имале силни обвиненија за силување кои на крајот завршиле на суд.

Во 2019 година, Карваљо Лопез беше осуден на доживотна забрана да се занимава со гимнастика во која било улога.

Во меѓувреме тој се соочи со посериозни обвиненија по повеќе основи. Пред четири години, околу 40 гимнастичарки за телевизијата „Глобо“ изјавија дека биле жртви на психичко, физичко и сексуално малтретирање од страна на нивниот тренер.

На судењето на тренерот како сведоци се појавија неколку гимнастичарки.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.