Дескоска: Не гледам никакво прекршување на законот во изборот на новите антикорупционери

Да оставиме време на новиот состав на Антикорупциската комисија да почне да работат и од тоа ќе се цени дали бил направен вистинскиот избор или било нешто друго во позадина, рече Дескоска .

 Јас не гледам никакво прекршување на законот во постапката за избор новите членови на Антикорупциската комисија, изјави денеска министерката за правда Рената Дескоска во врска со реакциите во јавноста за изборот на Нури Бајрами за член на ДКСК, кој е баџанак на претседателот на Собранието, Талат Џафери.

Според неа, ако се гледа правнo, роднинските врски со овој степен не се опфатени. – Но надвор од тоа, дури и да се опфаќаше нема формално прекршување на законот, затоа што постапката беше според законите, рече министерката.

Останува на ДКСК, како што посочи Дескоска, дали ќе си ја врши работата совесно, чесно и така како што е пропишано со законот.

– Да оставиме време на новиот состав на Антикорупциската комисија да почне да работат и од тоа ќе се цени дали бил направен вистинскиот избор или било нешто друго во позадина, рече Дескоска и додаде дека сега тие имаат и нови надлежности – ќе ценат јавни набавки, финансирање на политички партии, изборните кампањи...

Министерката потсети дека законот за спречување на корупцијата бил носен во транспарентна процедура во консултации со европските експерти и со невладини организации, а селекцијата и изборот на кандидатите гарантирале траспарентен избор.

Според министерот за информатичко општество и администрација Дамјан Манчевски, ако јавноста смета дека изборот на Бајрами е голем проблем требало да се реагира додека траел изборот, како што се реагираше и за многу други кандидати.

-Оваа мешана комисија ги оценила овие кандидати за најдобри. Следниот период на функционирање на оваа комисија, особено вопредизборен период ќе покаже колку е искрена намерата на било кој да се бори против корупцијата, рече Манчевски.

Тој додаде дека му пречи што долго време Законот за спречување на корупцијата бил блокиран од страна на опозицијата во Собранието.

На прашање за вработувањето во администрацијата на блиски владини функционери, Манчевски одговори дека Антикорупциската комисија е институцијата која треба да провери дали во новите вработувања има и непотизам и судирна интереси.

Тој рече дека 10 години сите членови на СДСМ беа најдискриминирани граѓани во државата со тоа што им беше забрането да се врабуваат во јавен и приватен сектор.

-Денеска е чудно што било кој симпатизер на оваа власт се вработува и во јавни институции. Каде да одат овие луѓе, треба да ја напуштат државата... Сега има Антикорупциска комисија и сето она за што се смета дека е проблематично треба да се поднесе претставка и да се одлучува по неа, рече Манчевски. 

Мира „дизел“ побара повлекување на сопругот и братот, но не и на синот

Сопругот се откажа од унапредувањето во Шумската полиција во Делчево, братот од позицијата во РЕК Битола, но синот не си оди од ЕЛЕМ.

 Пратеничката Мира Стојчевска конечно се огласи по бурните реакции во јавноста за вработувањата на нејзините најблиски. Се правда дека целосно се неточни наводите дека интервенирала за овие вработувања.

„Одговорно тврдам дека, откако сум пратеник, а и претходно ниту сум влијаела, ниту пак имам намера да интервенирам за вработување на член на моето семејство или некој близок роднина. Тоа е спротивно на моите принципи и етички критериуми. Верувам дека концептот едно општество за сите и општество кое нуди еднакви шанси за сите, ќе обезбеди развој и просперитет буквално за сите граѓани подеднакво, независно дали припаѓаат на одредена опција или не и независно дали се нечии роднини или не“, пишува пратеничката  Мира Стојчевска на социјалните мрежи.

Интересно е што Стојчевска во статусот не го споменува нејзиниот син. Од ЕЛЕМ велат дека денеска немаат дојави за нови повлекувања.

Опозицијата и натаму жестоко критикува и обелоденува за вработувања по партиска линија. Премиерот Заев најави дека ќе бара одговорност од сите функционери за кои Антикорупциска ќе докаже дека навистина има судир на интереси.

„Кога зборувам, зборувам за сите. Како што реков, оставам секој сам да си ја носи одлуката, своето чувство на одговорност, пред се етичката одговорност е многу важна. Затоа, пораката што ја испраќам е до сите.“, изјави премиерот Зоран Заев.

Сите 18 случаи кои ќе ги „чешлаат“ антикорупционерите ќе почнат да се разгледуваат кога институциите ќе ги достават потребните документи. Роковите течат, а тие имаат 30 дена да ги обзнанат резултатите.

Поради обвинувањата за непотизам, и пратениците Кирацовски, Костадинов и Мисовски потврдија дека нивните блиски си дале отказ од своите работни места.

Директорот на затворот „Шутка“ Ѓоко Котевски ќе поднесе оставка

Директорот на затворот во Шуто Оризари, Ѓоко Котевски се повлекува од функцијата, по вчерашниот инцидент кога беа нападнати поранешните министри Миле Јанакиески и Спиро Ристовски.

 Оставката вели дека ќе ја поднесе во понеделник, за кога најави дека ќе биде завршена и внатрешната истрага. Котевски рече дека во вчерашниот инцидент се утврдени низа недоследности и неправилности во спроведувањето на редот од затворските службеници.

Неговата оставка доаѓа само неколку часа откако Премиерот Заев побара од него до понеделник да се повлече од функцијата, поради тоа што не си ја завршил работата и дозволил инциденти еден по друг во установата со која раководи.

Министерката за Правда Рената Тренеска Дескоска најави дека за случајот ќе има и истрага. Според неа, потребно е да се види дали и каде е направен пропуст, а дополнително да се утврди и одговорност.  

Судија од Кривичниот суд, денеска ги посетил Јанакиески и Ристовски во затворот. Во соопштението од судот стои дека ситуацијата денеска била мирна. Од таму бараат од надлежните институции да направат анализа и да предложат други казнено поправни установи во земјата кои имаат соодветни услови за притвореници кои сметаат дека не се безбедни во затворот,  да бидат префрлени во други  КПУ.

Со реакција за вчерашниот инцидент се огласија и од делегацијата на Европската Унија во земјава. Од таму велат дека најостро осудуваат било каква форма на насилство и нагласија дека очекуваат истрага и одговорност за инцидентот.

Град Скопје домаќин на вториот Светски конгрес на претприемачи

Светски конгрес на претприемачи ќе се одржи во втората половина на октомври во Скопје.

По повод вториот Светски конгрес на претприемачи што ќе се одржи во втората половина на октомври во Скопје, делегацијата на Светскиот конгрес на претприемачи се сретна со раководителот на Секторот за локален економски развој Марко Тодоров и со советничката во Советот на Град Скопје Билјана Секуловска Габер.

Делегацијата, како што соопштиа Град Скопје, беше предводена од генералниот секретар на конгресот и претседател на Управниот одбор на Меѓународниот економски форум „Перспективи" Винко Ќуро, а на средбата се утврдуваа насоките и целите за организација на конгресот, што е под покровителство на Владата на Република Северна Македонија.

– Ни претставува чест и задоволство Град Скопје да биде домаќин на вториот Светски конгрес на претприемачи. Развивањето и поттикнувањето на претприемачкиот дух кај граѓаните е од огромно значење за развојот на локалната економија. Благодарни сме на Владата што цени дека локалната власт треба да биде вклучена во организацијата на конгресот, соопштил Тодоров на средбата.

Градоначалникот Петре Шилегов ќе земе активно учество на светскиот конгрес, во својство на потпретседател на организацискиот комитет. /МИА

притисни ентер