Штипјанецот Пане Кукушев три децении е колекционер на монети и банкноти - Канал 5

Живот

Штипјанецот Пане Кукушев три децении е колекционер на монети и банкноти

Штипјанецот Пане Кукушев речиси 30 години е во светот на нумизматиката. Собирањето стари пари како уметнички предмети го наследил од неговиот татко.

Штипјанецот Пане Кукушев три децении е колекционер на монети и банкноти

Во 1993 година од својот татко добива околу 500 монети и банкноти, сега во неговата колекција има околу 2.500 примероци од 100 држави, кои и сега постојат, а има и примероци стари седум века.

По вокација е економист, а пасијата да собира стари монети и банкноти му е наследена. Но, како што вели, токму ова го предизвикало и подлабоко да ја истражува монетарната историја низ историските периоди.

– Нумизматичарите никогаш не размислуваат за паричната вредност на монетите и банкнотите. Јас размислувам на еден друг момент што кај мене се јавува, а тоа е љубопитноста да откријам и да имам примерок кој во свои раце ќе го држам. Имам многу дупли примероци и никогаш немам продадено примерок, секогаш подарувам. Не знам колку примероци имам досега подарено и никогаш тој момент на парична вредност не бил во прашање, туку љубопитноста да го имам, да комплетирам одреден период од одредена држава, од одреден владетел, и низ сето тоа да истражува за неа, вели Кукушев.

Кога ги собира монетите и банкнотите го интересираат нумизматичките аспекти, но истражува и своето внимание го насочува и кон владетелите, кога биле ковани монетите или печатени банкнотите. Опфаќајќи го историскиот период пред и по владетелот кој му е предмет на истражување.

– Третиот момент, кој мене посебно ме интересира како економист по образование, е монетарниот систем во моментот кога е кована монетата. Така што за секоја држава имам дадено опис на монетарниот систем во моментот кога е кована или издадена парата, истакна Кукушев.

Овие негови истражувања, знаење, веќе се преточени во книгата „Каталог на светски монети, колекција Кукушев“, а е објавена 2013 година. По објавувањето на оваа книга реди уште неколку книги, во кои открива и ја истражува нумизматиката од сите аспекти.

Штипјанецот Кукушев забележа дека нумизматиката е анонимна, поголем дел колекционери не откриваат дека се занимаваат со собирање стари пари, како уметнички предмети.

– Сепак, имаме и неразвиеност и невмрежување на колекционерите во земјава и сметам дека е на многу ниско ниво. Еден од мотивите кој ме натера да предложам нешто во македонското колекционерство или нумизматиката е тоа што ние немавме скала за оценување на зачуваноста на монетите или банкнотите. Во светки рамки, скоро секоја држава си има своја скала и меѓу нив има разлики. Тоа зависи од развиеноста на нумизматиката, достапност до одредени примероци и слично. Така што во 2015 година предложив моја скала, како би изгледал македонски терк на скала за оценување банкноти и монети. Врз основа на искуството од повеќе светски држави и врз основа на тоа да речам мое негативно искуство за развиеноста на нумизматиката и колекционерството во Македонија, истакна Кукушев.

За неговиот предлог има две рецензии, од кои едната е од Институт за национална историја и втората е од Економскиот факултет при Универзитетот „Гоце Делчев“ – Штип.

– Скалата има некоја верификација, меѓутоа нема заживеаност во тие кругови, вели Кукушев.

Во разговорот за МИА, Кукушев открива дека во историјата е познато дека над 500 држави постоеле или постојат за време на оваа цивилизација што ние ја знаеме.

– На територијата на Македонија, античка Македонија, сегашна Македонија најстариот примерок што е најден е некаде седми, осми век пред новата ера и е откупен од Народна банка на Македонија за нивната збирка. Тој континуитет на нашата територија постои и секогаш велам актуелната држава од 1991 година до денеска и ако зборувам од тој колекционерски аспект има еден примерок, кој е колекционерска реткост, за мене и ние дадовме придонес на разновидноста на монетите. Тоа е еден денар во 2000 година, кој е хибрид, бидејќи при ковањето на следната серија по излегувањето на јубилејното 2000 години христијанство, нашата ковница има заборавено да го смени грбот, вели Кукушев.

Забележува дека кога го открил хибридот веднаш се јавил во Народна банка, од каде што добил информација дека се исковани над 7.000 примероци, од кои повеќе од половината се откриени, кога е завршен процесот на ковање, но неколку илјади се останати во оптек.

– Од тие примероци имам едно 30 – 40, бидејќи сакам да ги имам и да ги оставам во наследство на внуци, правнуци, да си имаат примерок, бидејќи тоа е нумизматичка реткост, рече Кукушев.

Кралицата Елизабета Втора ја има на пет монети, банкноти

Кукушев за МИА говореше и за монетите и банкнотите на кои ја има кралицата Елизабета Втора. Забележува дека има промероци и од Обединетото Кралство, но и од земјите кои се дел од Коменвелтот. Посочи дека за време на 70-годишното владеење на кралицата се појавува на пет монети, банкноти.

– Првиот примерок не е во оптек и тоа е пред децималниот систем на парите во Англија, кога биле шилинзи, гвинеи. По 1970 година преминуваат на децималниот и тој првиот протрет не е во оптек и тие се веќе колекционерски примероци, а во оптек се четирите, вели Кукушев.

Посочи дека секој монарх кој е на монета или банкнота со погледот е свртен на спротивна страна од неговиот претходник.

– Кралицата Елизабета на сега постоечките гледа надесно, што значи дека новите монети на кои ќе биде прикажан Чарлс Трети ќе биде свртен налево, ќе треба малку време да се заменат монетите и банкнотите и ако се земе предвид од податоците на кралската ковница и банката на Англија во оптек се наоѓаат 4,7 милијарди банкноти и се наоѓаат околу 29 милијарди монети. Замената ќе трае подолго, вели Кукушев.

На колекционерите им препорача доколку дојдат во допир со примероците од банкноти и монети од кралицата Елизабета Втора да си ги задржат, бидејќи тие ќе станат колекционерски примероци.

Неговото знаење од областа на нумизматиката го има преточено во книги, кои ги користат и студентите на Факултетот за економски науки, но и на Катедрата за историја и археологија во рамките на Факултетот за образовни науки при Универзитетот „Гоце Делчев“. /МИА

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Свет

Иран ги отфрли новите американски санкции: Нема ништо да постигнат

Иранскиот претседател Масуд Пезешкијан денес изјави дека САД нема да постигнат ништо со нова рунда економски санкции. 

Иран ги отфрли новите американски санкции: Нема ништо да постигнат

Неговата изјава е одговор на Техеран на најавите на Вашингтон за економско задушување на Иран, пренесува „Еуроњуз“.

„Благодарение на мерките подготвени од економските сектори на владата, Америка нема да постигне ништо со економски притисок во оваа фаза, исто како што не успеа во војната“, рече Пезешкијан, како што објави новинската агенција ИСНА.

„Нашиот принцип е да ги решаваме проблемите преку разбирање и преговори, но во исто време остануваме цврсти пред економскиот притисок, како што бевме и досега“, додаде тој.

Иран го отфрла влијанието на новите мерки

Американскиот министер за финансии Скот Бесент ги претстави плановите за „економско задушување“ на Иран завчера и предупреди на тешки последици за земјите што нема да се приклучат на кампањата. Иранските лидери го отфрлија влијанието на новите мерки. Тие истакнуваат дека земјата веќе се соочила со децении разорни санкции, кои беа воведени кратко по Исламската револуција во 1979 година.

Преговорите меѓу Иран и САД се во застој поради спор околу контролата врз стратешки важниот Ормуски теснец. Сообраќајот низ тој клучен воден пат, кој носи околу една петтина од светскиот извоз на нафта и течен природен гас, останува во голема мера парализиран, предизвикувајќи нарушувања на глобалните енергетски пазари.

Иран го контролира Ормускиот теснец од почетокот на војната на 28 февруари и се обидува да наметне такси за бродовите што минуваат низ теснецот. Вашингтон, од друга страна, сака враќање на предвоениот систем на слободна пловидба, а американскиот претседател Доналд Трамп тврди дека Вашингтон има „тотална контрола“ врз таа рута.

Договор за забрана за премин на воени бродови

Техеран вчера изјави дека, според договорот што моментално го преговара со Оман, нема да дозволи воени бродови да минуваат низ Ормускиот теснец. Ова го изјави иранскиот заменик-министер за надворешни работи, Казем Гарибабади, за државната телевизија.

Шефовите на дипломатиите на двете земји се состанаа за да разговараат за управувањето со сообраќајот на комерцијалниот бродски сообраќај. Според Гарибабади, тие вчера постигнаа договор. „Доколку овој договор стане обврзувачки, на ниту еден воен брод нема да му биде дозволено да помине низ Ормускиот теснец“, рече тој.

Гарибабади не даде детали за воениот сообраќај, но опиша предложена комерцијална рута. Тој објасни дека влезниот сообраќај кон Персискиот Залив од Оманскиот Залив ќе помине целосно низ иранските води, додека излезната рута ќе помине делумно низ иранските и делумно низ територијалните води на Оман.

Администрацијата на Трамп изјави дека се спротивставува на делови од договорот што се подготвува, особено на заедничкото иранско и оманско управување со излезната рута од теснецот, што е клучно за светската трговија.

Тагови: Иран санкции

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Забава

Џиџи Хадид проговори за врската со 20 години постариот Бредли Купер (ФОТО)

Џиџи Хадид за прв пат поотворено проговори за својата врска со Бредли Купер, која двојката успешно ја крие од јавноста од 2023 година. 

Џиџи Хадид проговори за врската со 20 години постариот Бредли Купер (ФОТО)

Манекенката (31) и актерот (51) се толку дискретни што Хадид дури и избегнуваше да се појави на црвениот тепих со него.

Искреноста и поддршката како основа на врската

Во интервју за француското издание на списанието „Вог“, за чија насловна страница позираше со избелени веѓи и црн чипкан фустан од Сен Лоран, Хадид ја опиша нивната врска како мирна и стабилна. Таа особено нагласи колку многу ѝ значи поддршката од Купер во нејзината кариера.

Таа откри дека тие често разговараат за работата, иако не можат секогаш целосно да се разберат бидејќи работат во различни индустрии. „Не мора да ги разбираме сите предизвици со кои се соочува другата личност на работа, но важно е да имате некој што ве поддржува и ви помага да останете приземјени“, рече таа.

Таа додаде дека искреноста е еден од најважните делови од нивната врска. „Она што е убаво во мојата сегашна врска и што ја прави различна од моите претходни искуства, е тоа што можеме да бидеме целосно искрени еден со друг. Можеме да кажеме што мислиме точно кога ќе го почувствуваме тоа“, објасни таа.

Таа откри нова страна на Париз

Двојката моментално е во Париз, каде што Купер го снима приквелот на „Ocean's 11“ со Марго Роби. Хадид откри дека во француската престолнина, за прв пат, се чувствувала како да може да живее таму, а не само да доаѓа по работа.

„Долго време, Париз беше само град на работа за мене. Ќе слетав, ќе одев во хотел каде што ќе ме чекаат дваесет фотографи, па одењето не доаѓаше предвид. После тоа, ќе одев со автомобил до студио без прозорци“, рече таа.

Но, благодарение на Купер, која ја сака Франција и зборува француски, таа откри сосема поинакво искуство со градот. „Во последно време, благодарение на дечко кој ја сака Франција и зборува француски, открив сосема поинаков Париз кој го обожавам. Па зошто да не се преселам таму еден ден“, рече таа.

Прстенот предизвика гласини за венчавка

Неодамнешните фотографии од Париз ги поттикнаа шпекулациите дека Хадид и Купер можеби се венчале во тајност. И двете беа фотографирани со златни прстени на рацете, а имаше и тврдења дека се венчале на почетокот на летото во Њујорк.

Порталот Page Six Style објави дека прстените се од францускиот луксузен бренд Boucheron. Според нивните информации, Хадид носи прстен Quatre Radiant Edition вреден 6.450 долари во жолто злато со дијаманти, додека Купер наводно носи модел Godron од розово злато.

Сепак, извор близок до двојката изјави за Us Weekly дека тие ги носат прстените со месеци и дека не се венчални прстени.

„Тоа е симбол на нивната посветеност, но не значи дека се во брак“, рече изворот, додавајќи дека „ниту едната од нив не сака да се жени или да планира традиционална венчавка“.

Нивната врска, тврди изворот, продолжува да се развива во добра насока. „Тие се неразделни кога не работат. Нивните животи се целосно испреплетени, а нивните ќерки се сложуваат многу добро и си играат заедно. На свој начин, тие станаа едно мало среќно семејство“, рече тој.

Тагови: Бредли Купер џиџи хадид

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

ТАВ Македонија воведува нови правила за користење на зоната „Hug & Fly“

ОД 1 СЕПТЕМВРИ: Се менуваат правилата за бесплатно користење на зоната за кратко застанување на Меѓународниот Аеродром Скопје – Hug & Fly

ТАВ Македонија воведува нови правила за користење на зоната „Hug & Fly“

Од 1 септември 2026 година, ТАВ Македонија воведува нови правила за користење на зоната „Hug & Fly“, односно улицата која што се наоѓа пред терминалната зграда на Меѓународниот Аеродром Скопје,каде што патниците се испраќаат или се дочекуваат од патување.

Улицата пред терминалната зграда, односно зоната „Hug & Fly“и понатаму останува наменета за бесплатно кратко запирање во времетраење од 10 минути со цел оставање и преземање патници, со тоа што според новите правила за паркирање, секое возило ќе има можност да влезе, транзитира и паркира бесплатно 10 минути само еднаш во текот на 24 часа

Целта е непречен проток на возилата како и безбеден и едноставен пристап на патниците до терминалот.

Автоматското препознавање на регистарските таблички ќе овозможи ефикасно управување со пристапот и непречено одвивање на сообраќајот, особено во периодите со зголемена фреквенција на патници.

Промената е насочена кон одржување на непречен проток на возила до аеродромот и обезбедување безбедни услови за патниците, посетителите и возачите при пристапот до терминалот.

За оние кои имаат потреба од подолг престој, големиот паркинг на скопскиот аеродром, кој се наоѓа пред терминалната зграда и има на располагање 1200 паркинг места за автомобили и 6 паркинг места за автобуси останува достапен во секое време.

Приоритет на ТАВ Македонија е пристапот до терминалот да биде безбеден, ефикасен и едноставен, со цел да обезбедиме удобно искуство за сите патници и посетители.

За сите детали во врска со паркингот на Меѓународниот Аеродром Скопје, како и цените за подолго од 10 минути паркирање на улицата пред терминалот односно во зоната за кратко застанување Hug&Fly, посетете ја нашата веб-страница: https://www.airports.com.mk/en-EN/passenger/park/page/parking-subscriptions

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

притисни ентер