Протоереј-ставрофор Спасе Стефановски, долгогодишен мисионер, основоположник на македонски црковни општини и архиерејски заменик и парохиски свештеник на австралискиот континент е добитник на нововостановеното признание „Вељо Манчевски“ на Комисијата за односи со верските заедници и религиозни групи (КОВЗРГ).

Стефановски го доби признанието за неговиот особен придонес во организирањето на македонските црковни општини во Австралија, а му го додели директорот на КОВЗРГ Даријан Сотировски на предновогодишниот прием „Вера посилна од секоја криза“, што се одржа синоќа во Филхармонија на РСМ, во организација на Комисија за односи со верските заедници и религиозни групи, а во присуство на државниот и верскиот врв.

Протојерејот-ставрофор Спасе Стефановски е роден 1938 година во кумановското село Младо Негоричане. По завршувањето на богословското училиште во 1960 година е ракоположен за свештеник на МПЦ-ОА од Архиепископот Охридски и Македонски, славниот возобновител Доситеј при кумановското намесништво. Во 1968 година ја започнува својата мисија помеѓу македонскиот народ во Австралија.

Имајќи ја постојаната поддршка и доверба од надлежните митрополити Кирил, а подоцна и Тимотеј, како негов архиерејски заменик придонел во организирањето на повеќе црковни општини, длабоко го развил административното функционирање, а постигнал и виден успех во просветната дејност, основал училиште по македонски јазик, предавал веронаука, уредувал црковен весник и епархиско списание. Неговата сестрана мисија во Австралија е синоним за успех, единство и мир помеѓу верниот народ која заслужува пофалба и треба да е пример и мотив на младите свештеници. Автор е на пет книги, меѓу кои „Во мисија на Македонскатаправославнацрква во Австралија“ во издание на Институтот за националнаисторија (ИНИ). Тој е добитник на повеќе признанија за неговата работа.

Нововостановеното признание од КОВЗГР го носи називот „Вељо Манчевски“, името на првиот верски референт на Македонија од 1943 година, раководител на Верското поверенство при Главниот штаб на Партизанските одреди на Македонија, учесник во НОБ и член на АСНОМ, свештеник и човек кој го има поставено темелот на односот на државата со црквите и верските заедници, меѓуверското разбирање, соработка, дијалог и почитувањето на верските слободи и права на секој македонски граѓанин.

Признанието „Вељо Манчевски“, ќе се доделува за особен придонес на правни и физички лица кои со својот ангажман, активност и труд трајно се вградиле во развојот и продлабочувањето на различни значајни сегменти во верската сфера во државата. Покрај протоерејот-ставрофор Спасе Стефановски, овогодишни добитници се проф. д-р Хасан Џило, амбасадор проф. д-р Иван Ангелов, проповедник Михаил Цеков и на Меморијалниот центар на холокаустот на Евреите од Македонија, а постхумно признание беше доделено на познатиот некогашен долгогодишен раководител на Републичката Комисија за верски прашања – Доне Илиевски.

Образец од признанието беше доделено и на семејството Манчевски, на наследниците на протоереј Вељо Манчевски, чие име го носи признанието во знак на почит и сеќавање на неговите заслуги за народот, црквата и државата.

Од име на сите добитници пред присутните се обрати протоерејот-ставрофор Стефановски, кој заблагодарувајќи се посочи дека наградите се стимул и мотив и за идните млади генерации да чекорат по патот на вистинските вредности.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.