Од ДПИ за Канал 5 велат дека од 22 до 28 јули направен е 131 инспекциски надзор на трговци со пелети низ целата држава каде за речиси само една недела се утврдени 7 прекршоци, меѓу кои се и фирми кои немале дозвола за вршење на дејност. Директорката Димоска, вели и дека при инспекциите за да се спречи неоправдано зголемување на цените на пелетите и на огревното дрво во пресрет на зимава, е утврдено дека цената на пелетите се движи од 15 до 26 денари по килограм, односно од 220 до 390 денари за вреќа од 15 килограми во зависност од пелетите.

Кај два субјекти утврдено е дека за објектот, односно местото каде што се врши трговијата нема доставено пријава до државниот пазарен инспекторат за отпочнување со вршење на дејност, за што секако има преземено мерки, меѓутоа, секако веќе доставена е пријава до државниот пазарен инспекторат.

Поскапувањето на пелетите и струјата доведе до зголемена побарувачка на огревно дрво, а според пазарните информации цената кај приватниците изнесува околу 4.700 за буково дрво и околу 4.800 денари дабово дрво од метар кубен. Неправилности се пронајдени и кај продавачите на огревно дрво, меѓу кои се лоцирани и оние т.н. диви продавачи на огревно дрво.

Кај голем број на складови кои што ги имаме како информација дека постојат, каде што имаме утврдено дека дел од тие складови каде што се врши продажба на огревно дрво имаат нерегистрирана дејност. Најдени се одредени неправилности, не само по однос на нерегистрирана дејност туку и по други основи каде што сме надлежни како ДПИ.

Голем дел од граѓаните ги искористија субвенциите кои изминативе години општините ги нудеа за набавка на печки, па оттаму се зголеми и побарувачката на овој огревен материјал што доведе до проблем за набавка на неопходната количина. Вицепремиерот за економски прашања, Фатмир Битиќи, неодамна на прес-конференција на трговците со пелети им порача дека ќе бидат јавно објавени доколку направат обид за вештачки недостиг и ги кријат залихите од пелети по магацини за зимава да ги продаваат по повисока цена.