Официјален Берлин категорично против плановите на Трамп за раселување на Палестинците од Газа

Германскиот политички врв остро ги критикуваше плановите на американскиот претседател Доналд Трамп за раселување на палестинското население од Појасот Газа, нарекувајќи ги неприфатливи и спротивни на меѓународното право.

Германската министерка за надворешни работи Аналена Бербок категорично ги отфрли плановите на Трамп за присилно отстранување и раселување на палестинското население од Појасот Газа, јави ДПА.

- Протерувањето на палестинското цивилно население од Газа не само што е неприфатливо и спротивно на меѓународното право, туку би предизвикало нови страдања и нова омраза, изјави денеска Бербок во Берлин.

Таа нагласи дека „сите се согласуваат оти Газа мора што поскоро да се обнови“, за што ќе биде потребна обемна меѓународна помош.

- Ние, Европејците, сме подготвени да ја дадеме нашата поддршка заедно со САД и партнерите во регионот, додаде Бербок.

Трамп, за време на средбата со израелскиот премиер Бенјамин Нетанјаху во Вашингтон, изјави дека САД сакаат да преземат контрола врз Појасот Газа, кој е речиси целосно уништен по повеќе од една година израелско бомбардирање.

Според него, околу два милиони Палестинци што живеат во Газа би требало да бидат преселени во други арапски држави во регионот.

Предлогот предизвика остра меѓународна осуда.

Германскиот претседател Франк-Валтер Штајнмајер, за време на посетата на Јордан, изрази скептицизам во врска со предлогот на Трамп.

- Тука, во регионот, слушам само загриженост, изјави тој по средбата со кралот Абдула Втори во Аман.

Штајнмајер нагласи дека внимателно ги бира зборовите, но истакна дека на регионот му е потребно одржливо решение, а не краткорочни мерки.

Претходно, германскиот претседател имаше политички разговори и во Саудиска Арабија, каде забележал дека постои очекување за поширок ангажман не само за стабилноста на Израел и Палестинците, туку и за целиот регион.

- Ни треба целосно нов пристап, истакна Штајнмајер.

По посетата на Јордан, тој отпатува за Анкара, каде се очекува на средбата со турскиот претседател Реџеп Таjип Ердоган да се дискутира за иднината на Сирија по падот на Башар ал-Асад, како и за натамошниот развој на ситуацијата во Газа по постигнатиот прекин на огнот меѓу Израел и Хамас.

Бербок, пак, нагласи дека на цивилното население во Газа му е потребна „помош за иднина на нивната земја – со безбедност, достоинство и во мирен соживот со Израел“. Таа повика на „вистински политички перспективи“ за Газа, во кои терористите на Хамас повеќе нема да имаат никаква улога.

- Истовремено, едно е јасно: Газа – исто како и Западниот Брег и Источен Ерусалим – ѝ припаѓа на палестинската популација. Тие се основата за идната палестинска држава, истакна германската министерка.

Таа потсети дека меѓународните институции, вклучително Г7, ЕУ и ОН, од самиот почеток јасно ставија до знаење дека „цивилното население во Газа не смее да биде раселено, а Газа не смее да биде трајно окупирана или одново населена“.

Како единствено решение што ќе овозможи мир, безбедност и достоинствен живот за Палестинците и Израелците, Бербок повторно ја нагласи потребата од договорено решение за две држави.

Изложба на фотографии „Вечни тела“ на Жарко Стојчевски и Искра Шукарова

Изложбата на фотографии во рамки на проектот „Вечни тела“ од фотографот Жарко Стојчевски и кореографот Искра Шукарова вечер ќе биде отворена во Културно-информативниот центар – Скопје.

Проектот, како што информира КИЦ-Скопје, е осмислен од кореографката Искра Шукарова и фотографот Жарко Стојчевски, споделувајќи ги своите заеднички гледишта за возрасното тело на изведувачот, во соработка со петмина балетски уметници кои биле дел од ансамблот на Македонски народен театар, a потоа во Македонска опера и балет (денес Национална опера и балет- НОБ), а кои се наоѓаат во различни фази од својата кариера и животно искуство.

Проектот е инспириран од работата на Шукарова со Екрем Хусеин во проектот „Црвениот лебед“ (2008) и има за цел да отвори простор за дискусија и нови визии за тоа што значи да се старее во тело кое е активно, моќно и значајно. Жарко Стојчевски, пак, е фотограф кој е инспириран од возрасното тело, прикажувајќи го доблесно и достојно за почит.

Изложбата вклучува фотографии на денес пензионирани балетски уметници од Националната опера и балет- НОБ: Емилија Џипунова (р.1935 год.), претставничка на првата генерација балетски уметници, истакната солистка, педагог и критичарка; Снежана Шијак (р.1949), солистка; Зоица Пуровска-Велевска (р.1956 год.), првенка и педагог репетитор; Зоран Талев (р.1953 год.), солист и Ирена Лозинска (р.1961 год.), солистка, педагог и кореографка.

Проектот е поддржан од Културно-информативниот центар – КИЦ - Скопје. Реализацијата на фотографските сесии е во Photo Factory. Соработници на проектот се: Сашка Костовска Длака, Емил Шулајковски и Кристина Стојчевска. Изведба на движења: Мила Блажевска, студент на катедра за балетска педагогија - ФМУ.

Изложбата ќе биде отворена до 2 март 2025 година.

Земјотреси од 4,9 и 5 степени регистрирани во близина на Санторини

Двата земјотреси беа во период од нешто помалку од час и половина, најсилниот беше во 6.46 часот, на кој му претходеше еден од 4,5 степени, додека кусо по 8 часот утрово беше регистриран уште еден, од 4.9 степени според Рихтер.

Два земјотреси со јачина од 5 и 4,9 степени беа регистрирани утрово во морскиот дел меѓу грчките острови Санторини и Аморгос, во рамките на серијата земјотреси од изминатите најмалку три седмици, јави дописничката на МИА од Атина.

Двата земјотреси беа во период од нешто помалку од час и половина, најсилниот беше во 6.46 часот, на кој му претходеше еден од 4,5 степени, додека кусо по 8 часот утрово беше регистриран уште еден, од 4.9 степени според Рихтер.

Најсилниот земјотрес во морскиот дел меѓу Санторини и Аморгос беше регистриран минатиот понеделник и беше со јачина од 5,3 степени според Рихтер.

Според податоците од Интердисциплинарен комитет за управување со опасности и кризи при Атинскиот Универзитет од почетокот на серијата земјотреси во морскиот дел меѓу Санторини и Аморгос, односно од 26 јануари заклучно со 15 февруари, биле регистрирани над 20.000 земјотреси, од кои над 17.400 биле посилни од 1 степен.

Поради сеизмичка активност, училиштата на островите Санторини, Иос, Аморгос и Анафи и оваа седмица, трета по ред, се затворени.

Украинскиот претседател пристигна во Турција, денеска средба со Ердоган

Украинскиот претседател Володимир Зеленски и првата дама Олена Зеленска синоќаа пристигнаа во официјална посета на Турција.

„Официјална посета на Турција заедно со првата дама. Средби со претседателот Реџеп Таип Ердоган и првата дама Емине Ердоган. Продолжуваме со сите напори за размена на воените заробеници – нашите луѓе мора да се вратат дома“, објави Зеленски на социјалните мрежи.

Тој додаде дека со турските власти ќе разговараат и за прашањата поврзани со сигурноста за обезбедување храна, додека неговата сопруга ќе се фокусира на образовната и културната дипломатија.

Шефот на Дирекцијата за комуникации на турското претседателство, Фахретин Алтун, најави дека Зеленски ќе престојува во официјална посета на Турција и дека турскиот претседател Ердоган денеска ќе го прими во Претседателската палата во Анкара.

Се очекува двајцата лидери да разговараат за стратешкото партнерство меѓу Турција и Украина, со фокус на зајакнување на односите во сите аспекти и договор за чекорите што треба да се преземат за натамошно зајакнување на соработката.

Хакан Фидан: Турција е подготвена да биде домаќин на украинско-руските мировни преговори

За време на разговорите на Минхенската безбедносна конференција, турскиот министер за надворешни работи Хакан Фидан му соопштил на американскиот специјален претставник за Русија и Украина Кит Келог и на државниот секретар Марко Рубио дека Анкара е подготвена да прифати мировни преговори за Украина.

Како што пренесува весникот Туркије, повикувајќи се на извори, Фидан за два месеци остварил четири телефонски разговори со рускиот министер за надворешни работи Сергеј Лавров.

Фидан се состана и со новиот американски државен секретар Марко Рубио на Минхенската безбедносна конференција.

На средбата се разговарало за прашања поврзани со украинско-руската војна и се разговарало за случувањата во врска со можноста за воспоставување мир меѓу двете земји.

Шефот на турската дипломатија, кој се сретна со специјалниот претставник на Трамп за Украина и Русија, Кит Келог, шефот на кабинетот на украинскиот претседател Андриј Јермак и со украинскиот министер за одбрана Рустам Умеров во Минхен, како и со Рубио, рече дека Турција треба да биде дел од мировниот процес.

Турција го покренала прашањето да може да биде домаќин на прекин на огнот или мировни преговори, а, како што пишува весникот, се дознава дека Анкара изјавила дека има блиски врски со двете земји и може да придонесе повеќе од многу други актери.

притисни ентер