Народен театар Белград со „Војна и мир“ вечер на „Охридско лето“ - Канал 5

Култура

Народен театар Белград со „Војна и мир“ вечер на „Охридско лето“

Народен театар од Белград вечер на сцената „Долни Сарај“ ќе ја изведе претставата „Војна и мир“ од Лав Николаевич Толстој, во режија Борис Лијешевиќ, во рамките на 62. издание на фестивалот „Охридско лето“.

Народен театар Белград со „Војна и мир“ вечер на „Охридско лето“

Селекторката на драмскиот дел од фестивалската програма, Сања Арсовска, денеска на прес-конференција посочи дека публиката ќе биде сведок на комплексно дизајнирани животи, кои се во постојана потрага по смислата на животот, на Бога. Собрани се заедно да ја покажат волјата за одлучувањето и да го покажат текот на човечките настани. „Војна и мир“, според неа, е дело кое може да биде политичко, историско, љубовно, егзистенцијално, социјално, секакво.

– Комплексно и многуслојно во својата наративна структура, во психологијата на ликовите, во значењето на дејствијата. Војната и мирот, односно зборовите кои го обликуваат насловот, што асоцира на политичка состојба и на историски настан, од друга страна може да значи и состојба на човековиот ум. Постојаната војна со човечките страсти и желби, духовните конфликти, како и вечната потрага по мирот во самите нас, истакна Арсовска.

Од друга страна, додаде, заплеткувањето на романот со Наполеоновата инвазија во Русија и зачнувањето на Декабристичкото востание покажуваат дека војната е еден фатален ефект, кој продолжува да перпетуира во човештвото без да ја научи поуката.

За режисерот Лијешевиќ, „Војна и мир“ е голем роман, кој е тешко да се сведе на неколку реченици, да се каже што е најважно. Тоа, посочи, е роман и претстава, која говори и за смислата на историјата, но и за смислата на човековото постоење и бесмислата на војните.

– Тоа што мене ми беше важно е таа Толстоева перспектива, во која војните и мировите се случуваат секаде на сите простори и во геополитичка смисла и во длабоката интимна човечка смисла. Односно, војната и мирот се и во човекот, во односите меѓу луѓето, во природата, во историјата и се тоа е само некој дел од општото постоење. Тоа се некои нормални циклуси во историјата, која се менува, во која наизменично се менуваат војната и мирот. Во романот се генерации кои растат во тој период на војната, која го формира животот, судбините. Луѓе кои бараат смисла, љубов, Бог, рече Лијешевиќ.

За „Војна и мир“ вели дека е тешко да се прочита романот, а уште потешко да се драматизира.

– Во тек на процесот на работа на драматизацијата отпаѓаше дел од материјалот, бидејќи првичната веризја беше 350 страници, а последната се сведе на 70 страници. Животот ме научи дека секогаш треба да одиме во правец на својот страв и дека тие работи кои на почетокот изгледаат невозможни, на крајот секогаш излегуваат најубави. И да успеавме да дојдеме до последната сцена, премиерата, публиката, но и до „Охридско лето“, нагласи режисерот на претставата.

Уметничка директорка на Народен театар – Белград, Молина Удовичи, изрази задоволство за повторното гостување на „Охридско лето“, по речиси една деценија. Во однос на креирањето на претставата забележа дека процесот и асоцирал на вајарска работа, а за нејзината реализација била потребна голема храброст.

– Прво беше едно грубо дело, потоа отпаѓаа делови додека не дојде до фина изработка. Мене ми е исклучиво важно, а важно е и за претставата дека во суштина е многу драга, храбра и во однос на Толстој, но и на комплетниот резултат. За претставата требаше храброст и полно срце. Дел од актерскиот Ансамбл се глумци, кои се спремни да го остават срцето на сцената и тоа се чувствува во претставата. И тука некаде е таа љубов, која е Толстоева филозофија. Тоа е една трпелива и посветена работа, рече Удовичи.

Според дректорката на „Охридско лето“, Наташа Поповиќ, денешната претстава ќе го потврди квалитетот кој годинава го има драмската програма на фестивалот.

– Токму претставата „Војна и мир“ е една од најпривлечните за љубителите на театарот со што можам да кажам дека гледалиштето на отворената сцена на Долни Сарај ќе биде исполнето до последното место, рече Поповиќ./МИА

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Свет

Египет гради вештачки канал, долг 170 километри- откриваат што ќе се случи со пустината

Египетскиот претседател Абдел Фатах ел-Сиси го отвори проектот „Нова Делта“, амбициозен план за претворање на пустината во обработливо земјиште.

Египет гради вештачки канал, долг 170 километри- откриваат што ќе се случи со пустината

Египетскиот претседател Абдел Фатах ел-Сиси го отвори проектот „Нова Делта“, амбициозен план за претворање на пустината во обработливо земјиште, со цел зголемување на домашното производство на храна, намалување на зависноста од увоз и создавање повеќе од два милиони работни места.

Церемонијата се одржа на ново земјоделско земјиште западно од делтата на Нил, за време на жетвата на пченица. Владата го опишува проектот како најголем проект за развој на земјиште во историјата на Египет.

Важна цел на проектот

Кога ќе биде целосно завршен, се очекува „Новата Делта“ да покрие околу 9.000 квадратни километри земјиште, објавува The National.

Проектот има за цел да ја зголеми вкупната обработлива површина на Египет за околу 15 проценти, преку одгледување пченица, пченка, зеленчук, како и извозни култури како што се маслинки и смокви.

Властите велат дека главната цел на проектот е да се намали големата сметка за увоз на храна во земјата и да се намали притисокот врз нејзините девизни резерви.

Претседателот ел-Сиси во говорот рече дека досега во проектот се инвестирани околу 800 милијарди египетски фунти, или приближно 15,1 милијарди долари.

Според него, средствата биле искористени за подготовка на земјиште за земјоделство, изградба на силоси за жито, индустриски зони, како и нови патишта што ги поврзуваат рекултивираните пустински области со долината на Нил и пристаништата.

Комплексен систем за наводнување

Еден од клучните делови на проектот е сложен систем за наводнување, бидејќи новите земјоделски области се наоѓаат во пустински области над голем дел од сливот на делтата на Нил.

Министерот за водни ресурси, Хани Свејлем, објасни дека системот работи со собирање на земјоделски отпадни води од западната делта и нивно испраќање до пречистителната станица Ел Хамам на брегот на Средоземното Море.

Таму дневно може да се преработува до 7,5 милиони кубни метри вода, која потоа се пумпа кон запад преку канал долг околу 170 километри, со помош на 13 пумпни станици, кон областа Даба.

Планирана е и втора, пократка рута со дополнителни големи станици, што треба да овозможи испорака на дополнителни количини вода за конечната цел од околу 9.000 квадратни километри земјиште.

Системот бара големи количини на енергија, бидејќи ја крева водата од пониските дренажни канали до повисоките пустински висорамнини. Претседателот Ел-Сиси, исто така, се осврна на овој дел од проектот, повикувајќи ги службениците да ги објаснат трошоците и обемот на работата на јавноста, за граѓаните да го разберат обемот на зафатот.

Одговор на големите предизвици

Египетските власти го претставуваат проектот „Нова Делта“ како стратешки одговор на предизвиците за безбедноста на храната, кои станаа повидливи за време на неодамнешните глобални кризи, вклучително и пандемијата Ковид-19, но и поради долгорочниот раст на населението.

Според владата, големите механизирани земјоделски фарми треба да ги зголемат приносите, да овозможат поголем извоз и да создадат работни места во земјоделството, логистиката и прехранбената индустрија.

Проектот го спроведува Агенцијата за одржлив развој „Иднината на Египет“, која службениците ја опишуваат како една од „стратешките раце“ на владата за спроведување на визијата на претседателот за развој на земјоделството.

Иако египетските власти го претставуваат проектот како клучен чекор кон поголема безбедност на храната и економски развој, тој исто така предизвика и одредени критики.

Организациите за човекови права и некои експерти покренаа прашања за транспарентноста на управувањето со големи државни проекти, улогата на воените институции во нивното спроведување и долгорочната одржливост на системот за наводнување поради високата потрошувачка на енергија и водните ресурси на Египет.

Тагови: Египет пустината

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Судбина

Запознал Американка во клуб во Будимпешта- ја задавил во изнајмен стан, осуден е

Суд во Унгарија осуди ирски државјанин на 14 години затвор за убиството на американската туристка Макензи Михалски во Будимпешта во 2024 година.

Запознал Американка во клуб во Будимпешта- ја задавил во изнајмен стан, осуден е

Михалски, 31-годишна девојка од Портланд, Орегон, била на одмор во Унгарија. Таа исчезнала на 5 ноември 2024 година, откако последен пат била видена во ноќен клуб во центарот на Будимпешта.

По пријавувањето на исчезнувањето, полицијата ги прегледала снимките од безбедносните камери од локалните ноќни клубови. На видеата, ја видела Американката, која се викала Кензи, со маж кој подоцна бил идентификуван како осомничен.

Признала за убиството по испрашувањето

Мажот, кого полицијата го идентификувала со иницијалите Л.Т.М., имал 37 години во тоа време. Тој бил уапсен на 7 ноември 2024 година и испрашуван, а потоа го признал убиството.

Истражителите рекоа дека Михалски и осомничениот се запознале во ноќен клуб, каде што танцувале, а потоа отишле во стан што го изнајмил човекот.

Според полицијата, мажот ја претепал и задавил Михалски за време на „интимна средба“.

Судот го осуди на 14 години затвор

Метрополитенскиот суд во Будимпешта го прогласи за виновен за убиство и го осуди на 14 години затвор без можност за условна слобода.

Приближно една и пол година што веќе ја поминал во притвор ќе му се сметаат во казната. Судот нареди да биде протеран од Унгарија по отслужувањето на казната.

Мажот мора да плати и 2,5 милиони форинти, или околу 7995 долари, за судски трошоци. Неговиот адвокат поднесе жалба на пресудата.

Тврдеше дека смртта била несреќа

По апсењето во 2024 година, мажот тврдеше дека смртта на Михалски била несреќа.

Сепак, полицијата тврдеше дека се обидел да го прикрие злосторството. Според истражителите, тој го исчистил станот, го скрил нејзиното тело во плакар, потоа купил ковчег и го ставил телото внатре.

Потоа изнајмил автомобил и се возел до Балатон, околу 150 километри југозападно од Будимпешта. Тој го фрлил телото во шумска област во близина на градот Сиглигет.

Потоа полицијата објави видео од човекот како ги води истражителите до местото каде што го оставил телото.

Барал како да се ослободи од телото

Полицијата изјави дека пред апсењето, тој пребарувал на интернет како да се ослободи од телото, какви се полициските процедури во случаи на исчезнувања, дали свињите навистина јадат мртви тела и дали има диви свињи во областа Балатон.

Тој, исто така, барал информации за надлежноста на полицијата во Будимпешта.

Тагови: Американка будимпешта

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Европа

Франција исклучи реактор на нуклеарна електрана поради високите температури

Вториот реактор во нуклеарната централа Гоф во југозападна Франција повторно е исклучен поради високите температури во реката Гарона, за кои се очекува утре да достигнат 28 степени Целзиусови, соопшти француската енергетска компанија EDF.

Франција исклучи реактор на нуклеарна електрана поради високите температури

Вториот реактор на централата веќе бил надвор од употреба поради рутинско одржување, соопшти компанијата, додека производството во нуклеарната електрана Гоф исто така беше прекинато на 23 јуни за да се спречи понатамошно затоплување на реката во која се испушта водата за ладење на реакторот.

Температурата на испуштената вода е во просек околу 0,2 степени Целзиусови повисока од температурата на реката, соопшти BFM.

Според регулативата од 2006 година, температурата на водата Гарон, која се користи за ладење на реакторите, не смее да надмине 28 степени Целзиусови откако водата за ладење ќе се испушти од централата.

Нуклеарната централа Гоф, која се наоѓа помеѓу Тулуз и Ажен во департманот Тарн-ет-Гарон, има два реактори со вода под притисок, секој со капацитет од 1,3 гигавати.

Првиот реактор е надвор од употреба од мај поради поправки и замена на нуклеарно гориво. Високите температури влијаат и на дистрибутивната мрежа за електрична енергија, особено на некои подземни кабли поставени помеѓу 1965 и 1981 година, предупреди „Енедис“, операторот на француската дистрибутивна мрежа.

Енергетските експерти, забележува француската телевизија, велат дека францускиот електроенергетски систем може да издржи топлински бранови како неодамнешниот, но истакнуваат дека се потребни инвестиции во вредност од десетици милијарди евра за да се обезбеди мрежата да остане сигурна дури и на уште повисоки температури.

Тагови: нуклеарна електрана реакторот

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

притисни ентер