Иако, видно ослабени без, Ренато Вугринец, Наумче Мојсовски и најверојатно капитенот Кирил Лазаров кој се уште ја нема залечено повредата, во редовите на нашиот национален тим размислуваат само за победа.
Централнот бек, Филип Миркуловски, најавува дека и покрај проблемите со кои се соочуваат, сепак, нашиот национален тим има големо искуство и ќе најде сили од Швајцарија да се врати со победа.
- Следуваат двата најважни натпревари за нас, два меча кои одамна ги очекуваме. Швајцарија е без освоен бод, а ние атакуваме на пласман на ЕП. Иако, најверојатно ќе играме без Кире Лазаров, сепак оваа репрезентација има многу искусни играчи, и верувам дека ќе го надополниме отсуството на Кире, изјави Миркуловски.
Ракометарот на германскиот Вацлар, ќе ја има можеби најтешката задача на претстојниот меч, а однего ќе се очекува најмногу, бидејќи е најискусниот од триото бекови кое на располагање го има селекторот Ивица Обрван.
Сепак, тоа не го загрижува Миркуловски, кој верува дека против Швајцарија, сите размислуваат само за полн плен.
-Швајцарија е добра репрезентација, но ние сме поквалитетни, а наша цел е да оствариме победа, па во дуелот против Чешка во Скопје, предводени од нашите верни навивачи, уште еднаш да ја оствариме целта и да се пласираме на завршницата на Европското првенство во Полска’, завршува Миркуловски.
Натпреварот Швајцарија – Македонија ќе се игра утре во Сент Гален со почеток од 20 часот, мечот ќе го суди рускиот пар Евгениј Зотин и Николај Волотков, а делегат е Петер Хансон од Шведска.