Илинденското посланието од Архиепископот Охридски и Македонски г. г. Стефан - Канал 5

Македонија

Илинденското посланието од Архиепископот Охридски и Македонски г. г. Стефан

Господин господин Стефан, по Милоста Божја, Архиепископ Охридски и Македонски, заедно со Светиот Архијерејски Синод, по повод илинденските празнувања, испраќа мир и благослов од Бога.

Илинденското посланието од Архиепископот Охридски и Македонски г. г. Стефан

Господин господин Стефан,по Милоста Божја, Архиепископ Охридски И Македонски, заедно со Светиот Архијерејски Синод, по повод илинденските празнувања, испраќа мир и благослов од Бога до свештенослужителите, до монаштвото и до сите чеда на Македонската Православна Црква

Возљубени празникољупци,

Денес, со трепет и со духовна радост, го прославуваме Илинден – големиот настан од нашата народна и црковна историја, денот кога го чествуваме споменот на светиот и славен пророк Илија, но и кога се сеќаваме на родољубивата и храбра борба на нашите предци за слобода, правда и чест.

Денешното празнување е длабоко врежано во спомените на нашиот слободољубив народ. Зашто Илинден не е само празнично одбележување, туку е и сеќавање коешто преобразува, коешто нѐ потсетува на богоугодните дела на светиот пророк Илија, но и на славните илинденци, и коешто нѐ повикува нивните вера и верба да останат да бидат наш пример и патоказ.

Светото Писмо ни го посведочува пророкот Илија како исповедник на вечно живиот Бог многу векови пред Христа. Одликувајќи се со исклучителна вера и честитост, тој истапил против постапките на тогашните цар и царица кои отпаднале од вистинскиот Бог.

Иако живеел во Стариот, светиот Илија се јавил и во Новиот Завет, на гората Тавор, заедно со Мојсеја, за време на Христовото преображение[2]. А пред крајот на светот повторно ќе дојде, како што пееме и во неговиот тропар: „Ангел во тело, столб на пророците, втор Претеча на Христовото доаѓање“[3].

Возљубени во Господа,

Пророкот Илија го прославуваме како боговидец и ревнител за Божјото слово, како изобличител на беззаконите цареви и на лажните пророци. Таков бил свети Илија: чувар на Божјиот завет, постојан сведок Божји и будител на заспаната совест. Затоа, од нашиот народ неговиот празник бил избран за ден кога македонскиот народ се кренал на востание.

И денес, во времиња кога се поткопуваат моралните вредности низ светот и кога мнозина наметнуваат лажни верувања – светиот Илија нека ни биде пример за следба. Неговиот живот е сличен на историјата на македонскиот народ, која е исполнета со страдања, но и со надеж; со порази, но и со воскреснувања. Храбрите илинденски јунаци не се плашеле од оние кои можеле да го убијат телото[4], па храбро се кренале против петвековниот поробувач. Имајќи вера во Бога, тие биле подготвени на жртва за идните поколенија да живеат слободно. И токму на Илинден ја започнале борбата за слобода – борбата да бидат свои на своето и достоинствени пред историјата.

Инаку, троен е Илинден во македонската историја: првиот, од 1903 година, кога македонскиот народ се кренал на востание. Вториот, асномскиот Илинден, од 1944 година, го потврди правото на сопствена држава. Третиот, пак, од 1991 година, донесе независност и, иако само на дел од македонската земја, конечно дочекавме слободна и независна држава.

Сите три Илиндена не се само датуми, туку се сведоштво дека Македонија постоела и постои, и дека живее во срцата на своите чеда, а нашата слобода е плод на духовната зрелост и жртвата на нашите предци. Но слободата не е нешто што ни е дадено еднаш и засекогаш, туку е подвиг којшто треба да се чува. Затоа, да се трудиме постојано да стоиме во слободата, со која Христос нѐ ослободи, и да не се подаваме повторно под ропски јарем[5].

Возљубени родољупци,

И ние, наследниците на славните илинденци, се наоѓаме на историски крстопат, соочени со нови бури и премрежија. Затоа и нашето поколение треба да го продолжи илинденскиот подвиг и да го чува она коешто е стекнато со многу страдања и жртви.

Како македонски народ, Илинден нѐ повикува на покајание и на враќање кон светите вредности – кон: верата, правдата, честа и достоинството. Но, само доколку сме чесни, верни и воцрковени, ако се обединиме и се помириме како народ, ќе се одбраниме и ќе постоиме, трудејќи се да го запазиме единството на Духот преку врските на мирот[6].

Возљубени чеда на Мајката Македонска Црква,

Во времињата кога сме немале своја држава, Црквата била таа којашто нѐ чувала во сите овоземни бури. Во неа не се чувала само верата, туку и просветата и писменоста, културата и националната свест. Таа била народен дом во кој се чувала свеста за достоинството на македонскиот човек. И денес нашата Црква е жива и бодра Мајка, која постојано нѐ потсетува дека без верата во Христа нема ниту спасение, ниту национално опстојување.

Затоа, како библиски народ, секогаш да се трудиме да останеме чеда Божји, исполнети со богољубие, родољубие и човекољубие. Да бидеме народ кој го памети и го живее славниот Илинден. Да ги негуваме илинденските идеали, зашто само така ќе ги сочуваме како наследство и аманет за идните македонски поколенија, каде и да живееме како народ. По примерот на свети Илија да бидеме бодри и ревносно да си ја чуваме прадедовската вера, па чувајќи си ја верата, да си ги запазиме и Црквата, и Татковината и националната посебност.

Во овие празнични мигови, да се помолиме семилостивот Бог да ги всели во рајската населба душите на сите кои се жртвувале за слободата на Македонија! Ним нека им е вечен споменот, а нас, нивните наследници, Бог нека нѐ чува и нека нѐ благослови! Амин!

Честит и вечен Илинден!

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Балкан

Ајкула од над три метри се појави во Јадранското Море, рибарите во шок: Тука пред малку пливаа луѓе (ВИДЕО)

Јадранското Море повторно беше место на средба со еден од најфасцинантните морски предатори.

Ајкула од над три метри се појави во Јадранското Море, рибарите во шок: Тука пред малку пливаа луѓе (ВИДЕО)

Хрватските рибари снимија необична глетка во близина на островот Жирје, каде што наидоа на ајкула за која тврдат дека била долга над три метри.

Видеото набрзо се појави на TikTok, а според сведоците, станува збор за мако ајкула (Isurus oxyrinchus), позната по својата исклучителна брзина и агилност.

Најчесто се убива ненамерно

Овој вид е широко распространет во тропските и умерените мориња низ целиот свет, вклучувајќи го и Јадранското Море. Се смета за еден од трите потенцијално опасни видови ајкули за луѓето, иако средбите со неа во близина на брегот се исклучително ретки.

И покрај тоа што е потенцијално опасен предатор, мако ајкулата е строго заштитена во Хрватска, а нејзиниот риболов е забранет со закон. Во Јадранското Море, најчесто се убива ненамерно, како колатерална жртва или случаен улов.

Проценката дека ајкулата била долга над три метри предизвика спротивставени реакции и дискусии меѓу корисниците на социјалните мрежи. Авторите на видеото одговорија на критиките објаснувајќи дека ширината на крмата на нивниот брод е точно 3,8 метри, што послужи како сигурна референца за споредба.

Клучна улога во екосистемот

Покрај големината, некои корисници ја доведоа во прашање и точната локација каде што е снимено видеото, тврдејќи дека е снимено на отворено море, а не во непосредна близина на островот Жирје, како што велат рибарите.

Во друго видео, се гледа туна како се обидува да избега од предатор, објавува Dnevno.hr.

„Ја касна на половина“, се слуша глас во видеото.

Предатори како што е ајкулата мако играат клучна улога во одржувањето на рамнотежата на морскиот екосистем. Иако нивното јавно прикажување често предизвикува страв, експертите потсетуваат дека ваквите средби се потсетник за богатството и зачувувањето на морската фауна во Јадранското Море.

Тагови: ајкула Јадранското Море

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Други спортови

Џошуа ги налути фановите со „бесното“ возење: Зарем ништо не научи? (ВИДЕО)

Видеото од Ентони Џошуа (36) предизвика бројни реакции на социјалните мрежи. 

Џошуа ги налути фановите со „бесното“ возење: Зарем ништо не научи? (ВИДЕО)

Поранешниот двократен светски шампион во тешка категорија беше снимен како се трка со голф коли со пријатели, а „Boxing King Media“ објави дека снимката е снимена во Доминиканската Република.

На видеото се гледаат неколку возила како возат едно до друго со голема брзина. Во еден момент, Џошуа посегнува кон соседното возило и го зграпчува додека вози. Видеото брзо се прошири на социјалните мрежи, каде што многу корисници го критикуваа за неговото ризично однесување.

„Не научи ли ништо?“, „Ова е толку глупаво со оглед на несреќата во која беше“ и „За некој што поминал низ она низ што помина тој, ова не е паметно“, беа некои од реакциите што се појавија со видеото. Не е потврдено кога е снимено видеото, па затоа не може со сигурност да се каже дека е создадено по сообраќајната несреќа во која беше вклучен Џошуа кон крајот на минатата година.

Тој изгуби двајца блиски пријатели во несреќа

На 29 декември 2025 година, Џошуа беше вклучен во тешка сообраќајна несреќа во Нигерија. Тој беше патник во теренско возило кое се удри во камион на автопатот Лагос-Ибадан. Џошуа преживеа со повреди кои не беа опасни по живот, но двајца од неговите најблиски пријатели и соиграчи, Латиф „Лац“ Ајоделе и Сина Гами, беа убиени.

Ајоделе беше негов личен тренер, а Гами беше негов фитнес тренер. По несреќата, Џошуа зборуваше за тоа колку нивната загуба го погоди и ги нарече негови „леви и десни раце“. Се врати на рингот минатиот месец против Кристијан Пренга. Британецот беше на подот двапати за време на борбата, но потоа го нокаутираше противникот во втората рунда. Ја посвети победата на своите паднати пријатели.

Џошуа е поранешен олимписки шампион и двократен светски шампион во тешка категорија. Неодамна, повторно интензивно се зборуваше за долгоочекуваната борба со Тајсон Фјури.

Тагови: Ентони Џошуа

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Европа

Владимир кој е осомничен за саботажа на Северниот тек ќе биде екстрадиран во Германија- еднаш веќе им избега

Украинецот Владимир З., вториот осомничен за експлозиите на гасоводот „Северен тек“ во 2022 година, е уапсен во Хрватска и ќе биде екстрадиран во Германија.

Владимир кој е осомничен за саботажа на Северниот тек ќе биде екстрадиран во Германија- еднаш веќе им избега

Украинецот Владимир З., вториот осомничен за експлозиите на гасоводот „Северен тек“ во 2022 година, е уапсен во Хрватска и ќе биде екстрадиран во Германија, соопштија германските обвинители, како што објави Ројтерс.

Во соопштението, Канцеларијата на германското федерално обвинителство го идентификуваше украинскиот државјанин само како Владимир З. и рече дека бил уапсен во крајбрежниот хрватски град Пула од страна на локалната полиција врз основа на европска потерница.

Во јули, обвинителите подигнаа обвинение против друг Украинец, поранешен воен офицер Сергеј К., за неговата вмешаност во експлозиите, обвинувајќи го дека дејствувал во име на украинските државни структури.

Во соопштението се вели дека Владимир З., обучен нуркач, бил дел од група предводена од Сергеј К. која поставила експлозиви на гасоводите „Северен тек 1“ и „Северен тек 2“ во близина на данскиот остров Борнхолм.

Германските власти бараат екстрадиција на Владимир З. откако беше уапсен во близина на Варшава на 30 септември 2025 година, врз основа на германска европска потерница, под сомнение дека нуркал на дното на Балтичкото Море за да постави експлозиви во нападот врз гасоводите „Северн поток“ во 2022 година. На 17 октомври 2025 година, полски суд ја одби неговата екстрадиција во Германија и нареди негово ослободување.

Мажот, идентификуван во полските медиуми како Володимир З., а во Германија како Владимир З., е опишан како обучен нуркач. Тој беше баран од германските истражители, кои веруваат дека бил дел од група што ги саботирала гасоводите „Северн поток 1“ и „Северн поток 2“.

„Тој беше дел од група луѓе што поставија експлозиви на гасоводите „Северн поток 1“ и „Северн поток 2“ во близина на островот Борнхолм во септември 2022 година“, соопшти германскиот Федерален суд на правдата. „Обвинетиот учествувал во потребните нуркања“.

Се вели дека човекот и неговите соучесници користеле едрилица „изнајмена од германска компанија преку посредник со фалсификувани документи за идентификација“ што испловила од германското пристаниште Росток.

Подводните експлозии на 26 септември 2022 година оштетија три од четирите цевководи изградени за транспорт на руски природен гас до Германија под Балтичкото Море. Штетата дополнително ги зголеми тензиите околу војната во Украина, седум месеци по почетокот на целосната руска инвазија, и ја влоши енергетската криза додека европските земји се обидуваа да се одвикнат од руската енергија.

Северен тек 2 никогаш не започна со работа. Изграден е за транспорт на руски гас под Балтичкото Море до Европа, но Германија го суспендираше процесот на сертификација во февруари 2022 година откако Москва ги призна самопрогласените републики во источна Украина пред да започне инвазијата. Гасоводот оттогаш не е во употреба. Руската влада потоа изјави дека гасоводот може да се поправи, иако Германија ја исклучи можноста за негово повторно отворање.

Првично, многумина претпоставуваа дека Русија стои зад нападот. Сепак, германските истражители оттогаш идентификуваа група од пет мажи и една жена од Украина за кои веруваат дека се одговорни.

Украинскиот претседател Володимир Зеленски изјави дека неговата влада не знаела ништо за планот за дигање во воздух на гасоводот и негираше одговорност за нападот.

Тагови: Северен тек

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

притисни ентер