Електричната Шкода Октавија во салоните ќе пристигне во 2023 година, а веќе се познати првите детали за електрификација на еден од најпопуларните автомобили во Европа.
Чешкиот производител досега нудеше само електрични теренци, бидејќи моделите од овој сегмент добро се продаваат на европскиот пазар. Така, електричната Шкода „Enyaq iV“ беше испорачана во 28.000 примероци во првите девет месеци од 2021 година, што е многу добар резултат за еден електричен автомобил.
Успехот на „Enyaq iV“ е отскочна даска за идната електрика на Шкода, па затоа производителот веќе најави помал електричен кросовер. Сепак, ниту еден теренец на Шкода не ја престигна Октавија, која во истиот период го најде патот до 160.000 клиенти, па логично е чешката компанија да планира да го електрифицира и овој модел.
Потсетуваме дека досега на клиентите им беше понудена само „plug-in“ хибридната верзија на Октавија.
А можеби и неговото име нема да биде Октавија
Мартин Јан, директорот за продажба и маркетинг на Шкода, за британскиот „Autocar“ вели дека Чесите немаат намера да нудат само електрични SUV модели, бидејќи клиентите сакаат електрични мотори и во другите сегменти.
Тој вели дека производителот ќе им понуди електрична верзија на Октавија на луѓето кои не сакаат SUV бидејќи тоа е во спротивност со нивните конзервативни погледи за автомобилите.
Електричната верзија на чешкиот бестселер веројатно ќе има поинакво име за да ја нагласи својата уникатност. Името на овој модел треба да започнува со буквата Е, со што ќе се продолжи традицијата започната од „Enyaq“.
Најверојатно Шкода повторно ќе ги користи решенијата имплементирани од Фолксваген, исто како што беше случајот со „Enyaq iV“.
Автомобилот ќе се базира на механичката платформа „MEB“, која е наменета за електрични автомобили од групацијата Фолксваген. Тоа значи дека основната верзија ќе има погон на задните тркала, додека поскапите верзии ќе имаат два електромотори и погон на сите тркала.
Капацитетот на батеријата треба да биде од 58 kWh до 84 kWh.
Електричната Шкода Октавија ќе дебитира во 2023 година. Но и после тоа бензинската верзија нема да исчезне од понудата. Ќе се продава паралелно онолку колку што е потребно.