Координативните состаноци не се ништо – ниту ново, ниту пак измислена работа. Кога се работи за официјални седници јасен е Законот за употреба на јазиците и знамињата. Она што ние сакаме да го потенцираме е начинот на кој се прави тоа, истакна на денешната прес-конференција портпаролот на Движењето ЗНАМ-ЗА наша Македонија, Никола Мемов по однос на употребата и на албанското знаме на координацијата на првиот вицепремиер Изет Меџити со министрите од неговата коалиција.

Одговарајќи на новинарско прашање дали ќе излезат од Влада доколку се повтори истата постапка, Мемов истакна дека тие се процеси и ќе бидат иницирани во рамките на владината коалиција. Нагласи дека не го споруваат тоа дека може да има координација на министри, политичари во Владата и Собранието, меѓутоа, како што посочи, тоа да не се сфати како провокација.

-Значи, во јавноста се создаде перцепција од тој настан, значи не го спориме дека може да има координација на министри, на политичари и во Владата и во Собранието и на сите други места, меѓутоа да не се сфати како провокација и за тоа овие се процеси на кои Движењето ЗНАМ ќе укажува во рамките на владината коалиција и тие процеси се можеби малку спори, меѓутоа работните навики ќе се менуваат. За тоа е ЗНАМ во Владата. Ќе бидеме коректив дека работите веќе никогаш нема да бидат исти, рече тој.

Мемов објасни дека одговорот околу употребата на албанското знаме се состои од три точки.

-Под број еден, преговорите со владиниот партнер ВМРО-ДПМНЕ за влез на ЗНАМ во Владата. При преговорите прифатена е политичката платформа на ЗНАМ, стратешките определби, политички начела, како и конкретните програмски определби на движењето ЗНАМ за наша Македонија и тие се составен дел на владината програма. Под број два, прифатени и усогласени се принципите и начинот на функционирање на идната влада врз рамноправни автономни партнерски односи со заемна одговорност во делот на имплементација на владината Програма. Под број три, ЗНАМ ќе биде гарантот дека никогаш повеќе нема да може никој да го уценува со непристојни предлози поголемиот партнер во власта, односно Владата и коишто ќе одат на штета на македонските национални и државни интереси. ЗНАМ ќе биде коректив во Владата и како во случајот со заклетвата на претседателот на Собранието ќе реагира и во сите други случаи кога ќе има нарушување на одредбите на Законот за употреба на јазиците и знамињата на етничките заедници, истакна портпаролот на ЗНАМ.

Мемов ги покани медиумите да бидат нивен партнер во тие процеси.

-Секако, тие прашања се континуирани и конзистентни и процесите ќе траат. За тоа и медиумите би требало да бидат составен дел во креирањето на политичката атмосфера во Македонија и за тоа ве поканувате да бидете и вие наш партнер во тие процеси, рече Мемов.

На 28 јуни, првиот вицепремиер и министер за животна средина, Изет Меџити соопшти дека почнува пракса на редовна координација со министрите, замениците-министри и другите избрани и именувани кадри на коалицијата. На координацијата, покрај македонското знаме и знамето на ЕУ, стоеше и албанското знаме.

Градоначалникот на Куманово и лидер на движењето ЗНАМ, Максим Димитриевски вчера упати предупредување дека неговиот политички субјект ќе ја напушти владејачката гарнитура доколку се повтори ситуацијата од минатата недела.

-Ќе реагирам исто како што реагирав и кога новиот претседател на Собранието направи нешто слично. Ова е само тој „ДУИ-наратив“ кој што продолжува во континуитет. Ако продолжи таквиот однос и непочитување…Првично ние не го фативме тој момент од самиот старт, но првпат јавно кажувам дека доколку таквото однесување продолжи, нема да бидеме дел од Владата. Ќе излеземе од Владата, кажа Димитриевски во подкастот на ТВ Канал 5 – „На кавга со Иван“.

Министерот за култура и туризам Зоран Љутков при вчерашната посета на селото Глобочани во Мала Преспа, каде го отвори 19. издание на фестивалот Македонско културно лето" одговораше на новинарски прашања, поврзани со пописот во Албанија, според чии резултати видно е намален бројот на Македонците.

-Не сум информиран како бил спроведен пописот во Албанија, но ова е дипломатски проблем, оставив на албанската држава да разговара и ние ќе дадеме свое мислење. Индивидуално право на секој граѓанин е да се изразува како што мисли и на крајот ќе оставиме државните институции да го кажат последниот збор, рекол Љутков, објави Ора њуз.

Според телевизијата, на прашањето дали активноста што се организира во Глобочани е активност и за бугарските граѓани и за оние кои се во процес на вадење на бугарски пасоши, тој одговорил дека „речиси секој овде, секогаш бил информиран дека ова се денови на македонската култура во општина Пустец, Албанија".

- Ние, како Министерство за култура на РМ нагласуваме дека скоро секоја година во последниве 19 години се одржуваат „Деновите на македонската култура во Преспа, Албанија“, бидејќи културата ги обединува луѓето, Македонците, Албанците итн., одговорил министерот Љутков.

Инаку, на пописот што се одржа во Албанија од 18 септември до 30 октомври, а во неколку рурални подрачја до 15 ноември 2023 година, според податоците на албанскиот Институт за статистика, ИНСТАТ, како Македонци биле попишани 2281 наспроти 2011 година кога биле 5.512 Македонци. Македонската партија и здруженијата не ги признаа резултатите од двата пописа.

За разлика од Македонците како Бугари се попишани 7.957 лица.

Ова беше 12.попис, првиот бил спроведен во 1923 година, при што во сите 11 пописи како Бугарин не е регистрирано ниту едно лице.

Откако вчера претседателката на ЦИК Викторија Аврамовска Мадиќ оцени дека волјата на членовите на СДСМ била јасно и недвосмислено изразена на изборите пред два дена, а забелешките за нерегуларности во процесот не влијале на финалниот резултат, денеска нема информации дали изборниот процес во СДСМ е конечно завршен.

Јован Деспотовски, кој беше еден од кандидатите за нов партиски лидер, и денеска упати критики за изборниот процес. Според него небулозно е како, самата изборна Комисија не ги почитувала партиските акти - во моментот кога соопштила дека избран е претседател, без да ги разгледа приговорите. Сепак, најави дека планира да продолжи со политичкиот ангажман во СДСМ.

„Зошто секој втор што во изминативе 25 дена потрошил дел од своето време и на 40 степени отишол до најблиската општинска организација и поднел барање за да гласа, не гласал или бил таму и го вратиле. Ако сакаме да зборуваме за регуларен процес треба прво да одговориме на ова прашање. Тоа не е прашање зошто треба да му удоволиме на Јован Деспотовски, тоа е прашање за кое немаме луксуз како политичка партија да си дозволи да врати 11 илјади луѓе од процесот на гласање. Луѓето се вознемирени, се јавуваат, тие се таму по 20-30 години. Не може да зборуваме дека работите се во ред кога не се, останувам со мојот политички ангажман таму. - изјави Деспотовски.

Дека ќе остане партиски член и нема да прифати никаква функција во СДСМ, соопшти и пратеничката Славјанка Петровска која се повлече од изборната трка ден пред гласањето поради, како што тврдење изборни нерегуларности и злоупотреби.

Со став за изборите во СДСМ излегоа и некои од поранешните сопартијци. Од партијата на Максим Димитриевски „ЗНАМ“ му го честитаа изборот на Филипче, но оценија дека изборите не биле легитимитни.

И покрај промената на лидерската позиција, за дел од политичките аналитичари состојбите во СДСМ не навестуваат нејзино брзо реформирање, а не ја исклучуваат и можноста за дополнително одлевање на партиски членови.

Филипче најави дека во СДСМ ќе се формира работно тело кое ќе биде в.д раководство на партијата се до октомври кога треба да се конституира новиот Конгрес којшто, како што рече, ќе ги избере новите раководни структури на партијата и ќе се спроведат статутарни измени.