Одлуката ја соопшти на почетокот од денешната седница., по што ја напушти салата.... причините веднаш потоа ги образложи во писмено соопштение...

-Веднаш по мојот избор на функцијата започна медиумска хајка со крајна цел да дадам оставка затоа што мојот избор за претседател не одговараше на група од судската – бизнис елита. До ден денешен хајката не престана преку пласирање лажни информации до новинари, а во континуитет се опструираа и намерно се одолговлекуваа внатрешните процеси во Советот, кои се од клучно значење за успешно завршени задачи и за функционирањето на судството.- Павлина Црвенковска – Член на Судски Совет.

Нејзината оставка доаѓа откако минатата недела седуммина членови на Советот избрани од колегите судии, се побунија откако дошла со список од 15 судии, кандидати за раководни места во Академијата за судии и јавни обвинители. Црвенковска потоа реагираше дека на седница дошла со листа со имиња на предлози за одредени позиции во Академијата, а не со некаков список како што тоа сакале да го прикажат некои членови на Судскиот совет. Во краткото образложение од денеска околу тоа наведува дека:

-Последен пример со лажно брифирање на новинарите беше околу тоа дека е моја незаконската одлука за избор на член во Управниот одбор на Академијата за судии и јавни обвинители, иако јас ниту го предложив, ниту го гласав членот на Судскиот совет, Зоран Герасимоски. Се надевам дека идниот претседател ќе биде подобен за оваа судско – бизнис елита.- Павлина Црвенковска – Член на Судски Совет.

Оставката на Црвенковска го изненади и заменик претседателот на Советот Селим Адеми, кој ги води седниците во отсуство на претседател, но по кратката пауза членовите не ја продолжија расправата.

Црвенковска останува како член на Советот кој како што брифираат оттаму продолжува да функционира нормално. Наскоро ќе треба да се избере нов претседател а за позицијата во игра се Тања Чачарова – Илиевска и Весна Дамева со оглед на тоа дека за членови на Советот се избрани од Собранието. Но во случај на политички договор на оваа позиција да се бира Албанец, тогаш во игра се Селим Адеми и Миљазим Мустафа кои исто така се избрани во Собранието.