Свет

Анкета: 44 отсто од Чесите сакаат да победи Украина, најмала поддршка во Словачка

Помалку од половина од Чесите (44 проценти) изразија желба Украина да победи во руско-украинскиот конфликт, додека во Полска 68 проценти од населението ја поддржува Украина.

Според анкетата на Централноевропската опсерваторија за дигитални медиуми (CEDMO) во пресрет на третата годишнина од почетокот на војната во Украина (24 февруари), во Словачка помалку од една третина од испитаниците ја поддржуваат победата на Украинците.

Помалку од една петтина од Словаците (17 отсто) ја поддржуваат победата на Русија во конфликтот, во Чешка седум отсто од испитаниците изразиле поддршка за Русија, а во Полска четири отсто, пренесува Радио Прага.

Крајот на војната во форма на привремен мир, без победа на едната страна, го поддржуваат речиси две петтини од луѓето во Чешка, третина во Словачка и петтина од испитаниците во Полска.

Кога станува збор за сценаријата за развој на руско-украинската војна, испитаниците најчесто изразувале загриженост дека конфликтот ќе трае многу години, со 67 отсто од луѓето во Чешка и 71 отсто во Словачка.

Околу 55 отсто од Чесите и три петтини од Словаците стравуваат дека конфликтот ќе ескалира во отворена војна меѓу Русија и НАТО. /MИА

Македонија

Од денеска двосменско работење на дел од отсеците за управни работи при МВР

Министерството за внатрешни работи информира дека од денеска Отсеците за управни работи при Одделот за граѓански работи на МВР ќе работат согласно ново работно време.

Одделението за управни работи Скопје и Отсек за управни работи Тетово, од понеделник до петок ќе имаат двосменско работење, односно работно време од 7:30 часот до 19:30 часот.

И Отсеците за управни работи - Битола, Велес, Куманово, Охрид, Струмица и Штип, од понеделник до петок ќе имаат работното време со почеток од 8:00 часот па до 18:00 часот, а истото работно време ќе важи и за: ОУР Битола за Прилеп, ОУР Велес за Кавадарци, ОУР Охрид за Кичево и Струга, ОУР Тетово за Гостивар и ОУР Штип за Кочани.

Во останатите подрачни единици - ОУР Охрид за Дебар, ОУР Битола за Крушево, за Демир Хисар, за Ресен и за Македонски Брод, ОУР Штип за Пробиштип, за Свети Николе, за Виница, за Делчево и за Берово, ОУР Велес за Неготино, ОУР Куманово за Кратово и за Крива Паланка, ОУР Струмица за Гевгелија, за Радовиш и за Валандово, работното време ќе трае од 8:00 часот до 16:00 часот.

Свет

Неформален состанок на Советот на ЕУ во Варшава

Во Варшава денеска се одржува неформален состанок на Советот за општи работи на ЕУ, на кој ќе се разговара за хибридните закани со кои се соочуваат земјите-членки на ЕУ и партнерите што се стремат да влезат во ЕУ.

На состанокот се очекува да се разговара и за зајакнувањето на европската цивилна и воена подготвеност и повеќегодишната финансиска рамка (ВФО) на Унијата за периодот по 2027 година.

„Бидејќи проширувањето е приоритет за Европската унија, сигурна сум дека тоа ќе биде многу добро разгледано во следниот ВФО“, изјави еврокомесарката за проширување Марта Кос по пристигнувањето на состанокот.

Култура

Во Софија изведена „Кармина Бурана“ со симфониските оркестри од Македонија, Грција и Бугариј

Во Националниот дворец на културата во Софија синоќа се одржа заеднички настап на Македонската, Софиската филхармонија и Симфонискиот оркестар од Солун. На сцената беше изведена „Кармина Бурана“ од Карл Орф.

-Преполна сала, стоечки овации и долги аплаузи! Ова беше епилогот по моќната изведба на епската „Кармина Бурана" од Карл Орф којашто се случи во големата сала на НДК во Софија. Македонската филхармонија, Софиската филхармонија и Државниот оркестар на Солун, како и Софискиот филхармониски хор и солистите: нашата ѕвезда Ана Дурловски, грчкиот тенор Николас Спанос и бугарскиот баритон Иво Јорданов, брилјираа на сцената од каде зрачеа силни креативни вибрации, објавија од Македонската филхармонија на нивниот фејсбук профил.

Како што посочуваат, главниот „виновник" за овој спектакуларен концерт, маестралниот диригент Најден Тодоров не ја криеше неизмерната среќа што конечно се реализираше оваа идеја за уметничко сплотување на, како што и самиот истакна, три оркестри во едно тело

-Вечерва се потврди уште еднаш дека музиката не разбира граници, туку ја возвишува секоја идеја и мисла во чиста убавина, потенцираат од Филхармонија.