На почетокот на месецот САД воведоа царини за увоз на алуминиум и челик, а Европската комисија најави дека ќе одговори со царини за американски стоки во вредност од 26 милијарди евра. Планот вклучува активирање на суспендирани тарифи за производи како што е бурбон вискито, како и нови давачки за производи како што се други видови алкохолни пијалоци, шминка и есенцијални масла.

Само неколку часа подоцна, американскиот претседател Доналд Трамп изјави дека доколку ЕУ не се откаже од најавените контрамерки, тој ќе возврати со реципрочни царини од 200 отсто за алкохолните пијалаци и вината увезени од ЕУ.

Увозниците се загрижени

Европа минатата година извезла алкохолни пијалоци во САД во вредност од 2,9 милијарди евра, според податоците на здружението SpiritsEurope. Од друга страна, САД во ЕУ извезле виски во вредност од 699 милиони евра.

„Се соочуваме со огромен ризик од реципрочни мерки“, нагласи генералниот секретар на француската асоцијација Емануел Гишар, додавајќи дека со недели се обидува да го одврати Брисел да воведе царини за САД.

Франција, Шпанија и Италија побараа од Комисијата да го отстрани виното од списокот на производи на кои ќе воведе царини, изјави висок функционер на голем европски производител на пијалоци кон средината на месецот. Италијанското вино и алкохолните пијалоци наменети за САД ја чекаат испораката на пристаништата.

„Никој не сака да ризикува“

„Увозниците побараа од нашите членови да ги запрат пратките бидејќи никој не сака да ја ризикува можноста да му се наплатат давачки кога пијалокот ќе пристигне во САД“, изјави за Ројтерс Микаела Палини, претседателка на Федервини, италијанско здружение на индустриски производители, увозници и извозници на алкохолни пијалоци, вино и оцет.

По првичниот бран нарачки за надополнување на залихите, пазарот заглави бидејќи увозниците стравуваат дека нема да можат да ја продадат нарачаната стока поради високите цени, додаде Палини. Некои американски ресторани останале без италијански пијалоци, тврди тој, а цените растат.

Италијанските производители на пенливо вино завчера соопштија дека испораките во САД се стопирани бидејќи увозниците стравуваат од царини. Во средата, весникот Il Sole 24 Ore цитираше тоскански производител на вино дека, откако американските нарачки за март беа откажани, милион шишиња вино Руфино се заглавени во пристаништето Ливорно.

Италија годишно извезува во САД вино во вредност од 1,9 милијарди евра

Италија на американскиот пазар извезува вино во вредност од 1,9 милијарди евра годишно, што одговара на речиси една четвртина од вредноста на вкупниот извоз, соопшти италијанското здружение на производители на вино UIV.

Доколку американската влада воведе царини од 25 отсто, вредноста на извозот на италијанското вино во САД би можела да се намали за околу 472 милиони евра, според нивните проценки. Сумата се зголемува на една милијарда евра кога ќе се додадат загубите што би ги предизвикале американските царини на другите клучни пазари, пред се на остатокот од ЕУ и Канада. На ова треба да се додаде и падот на продажбата на домашниот пазар, предупредува УИВ.

Италија забележа суфицит во трговската размена со САД од речиси 39 милијарди евра во 2024 година, според податоците на италијанскиот завод за статистика. Износот сочинува повеќе од половина од вкупниот суфицит на Италија во трговската размена со земјите кои не се членки на ЕУ, кој изнесува нешто повеќе од 65 милијарди евра.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.