Во лоша состојба се коловозите на магистралните правци кон граничните премини „Свети Наум" и „Ќафасан" кон Албанија

Ситуацијата наметната со коронавирусот и можноста македонските државјани да патуваат без какви било ограничувања само во соседна Република Албанија го зголеми бројот на возила на граничните премини „Свети Наум" кај Охрид и „Ќафасан" кај Струга.

Но, тоа што е карактеристично и за двата патни правци е тоа што коловозите на магистралните патишта до државната граница се во катастрофална состојба. Асфалтот на патниот правец некаде од селото Франгово па натаму до самиот граничен премин „Ќафасан" практично се распаѓа. Невозможно нормално да се управува со возило, брзината мора да се намали помалку од дозволеното и да се вози слалом низ оштетувањата и дупките. На некои места има такви ударни места на коловозот дали дупки или набран асфалт од тешки возила што доколку на нив се наиде со брзина определена според сигнализацијата тоа значи оштетување на возилото, во најдобар случај само на пневматиците.

Ситуацијата е слична и на магистралниот превец кон Свети Наум, на потегот после автокампот „Градиште", каде асфалтот не е обновуван од кога е изграден патот, освен некои повремени крпења ударни дупки. Да биде состојбата уште понезгодна, станува збор за коловоз што наместа е широк само пет метри. Инаку, кога станува збор за состојбата на тој патен правец, коловозот е нерамен, тампонираниот дел од под асфалтот наместа е пропаднат што резутира со големи длапки на патот, асфалтниот слој е доста оштетен и одамна „зрел" за реконструкција. И на тој патен правец не е препорачливо да се вози со утврдената брзина, за да се има простор и време да се реагира за да се дојде до оштетување на возилото на одредени места каде разминувањето возила е тешко и без дупките на коловозот.

Коловозот воопшто не е обележан, линииите на асфалтот се избледени, банкините оштетени, заштитните огради достраени. Особено е тешко да се вози ноќе, во услови на дожд кога не може да се распознае коловозот од околината, столпчиња со соодветни осветчувачки ознаки покрај патот воопшто нема, така што возењето е исклучително тешко и пред се опасно.

Состојбата со коловозите на другата страна од границата е драстично подобра, албанските патишта се понови, пошироки, со понова сигнализација и добро одбележани, како на самиот коловоз така и покрај патот. Она што е можеби и најважно, постојано и редовно се одржуваат.

Многупати беше најавувано дека ќе се спроведе реконструкција и на двата патни правци, децении независно која гарнитура беше на власт. Последното такво ветување барем за патниот правец кон „Ќафасан" го даде премиерот Зоран Заев пред точно една година, во изјавата пред медиумите дадена по повод отворањето на новозградениот царински терминал на преминот. /МИА.

ВМРО-ДПМНЕ: Пикот на короната не поминува исто како и неспособноста на Заев и Филипче

Пикот на короната не поминува исто како и неспособноста на Заев и Филипче која значи смрт за народот.

Пикот на короната не поминува исто како и неспособноста на Заев и Филипче која значи смрт за народот, и неодговорноста на власта ги чини граѓаните здравје и животи.

Во последното деноноќие Македонија бележи нов црн биланс со 1.342 нови заразени и 22 починати лица од КОВИД вирусот. Со ова Македонија достигна до 1.847 жртви и е во земјите црни рекордери на светско ниво по смртност на милион жители.

Неспособните Заев, Филипче и изгубениот Ангелов не преземаат никакви мерки да ги заштитат граѓаните, туку само манипулираат со јавноста дека се е под контрола. А, контролата одамна е изгубена, болниците се преполни, пациентите немаат доволно кислород, за тестирање граѓаните чекаат со денови, а со саати да дојде брза помош. Секојдневните сведоштва на граѓаните ги демантираат лагите на власта. Нивните лаги убиваат за жал секој ден и тоа луѓето го плаќаат со своите животи.

Оставки и одговорност мора да има, бидејќи епидемијата наречена власт на Заев е подеднакво опасна како и КОВИД вирусот.

Центар за комуникации на ВМРО-ДПМНЕ

Дожд утринава во Демир Капија и Гевгелија, магла во Скопје, Тетово и Пожаране

Во земјава утринава е облачно и магловито. Врнежи од дожд има во Демир Капија и Гевгелија, а магла во делови од Скопската котлина, во Тетово и Пожаране.

Според информациите од УХРМ, најмногу дожд во изминатите 24 часа наврнал во Пожаране – 13 литри на метар квадратен по што следува Тетово со 9, Гевгелија со пет и Битола со два литра на метар квадратен.

Утринските температури во целата држава се над нулата.

За денеска синоптичарите најавуваат значително облачно со повремен дожд кој ќе биде поинтензивен во јужните делови. Ќе дува слаб до умерен југоисточен ветер. Максималната температура ќе биде во интервал од 6 до 11 степени. Во Скопје слично време со максимална температура до 9 степени.

Историчарите продолжуваат со напорите за приближување на ставовите

Стратегија на државата е дека треба да продолжиме да разговараме.

Додека трае дводневната средба на македонско-бугарската Мешовита комисија за историски и образовни прашања, властите во Скопје со пораки дека разговорите со Бугарија ќе продолжат и покрај најавеното бугарско вето за старт на преговорите за членство на земјава со ЕУ, а научната заедница и МПЦ со порака дијалогот со Софија да се води на рамноправна и принципиелна основа, со почитување на меѓународното право и сознанијата на науката.

Македонско-бугарската Мешовита комисија за историски и образовни прашања вчера ја започна дводневната средба посветена на содржината во македонските учебници по историја за средновековниот и раноосманлискиот период, откако препораките за бугарските учебници за овие периоди беа разгледувани и усвоени на претходната средба. Тема на разговор на средбата, која се одржува онлајн поради состојбата со Ковид-19, е и евентуалното заедничко чествување на Гоце Делчев.

Премиерот Зоран Заев вчера од Неготино порача дека работата на Комисијата се одвива во пријателска атмосфера, што го оцени како сигнал дека сите се трудат да биде постигнат напредок. Тој изрази уверување дека многу брзо ќе има и решенија, преку кои, како што рече, ќе го градиме заедничкото пријателство на двете земји.

Заев притоа потенцира дека никој не преговара за македонскиот идентитет и за македонскиот јазик. – Нашиот јазик е признат во светот и ние сме Македонци и такви, како пријатели на Република Бугарија и бугарскиот народ, треба да продолжиме да го градиме пријателството, изјави Заев.

Според него, само со почит едни кон други можеме да постигнуваме договори кои ќе градат перспективи и пријателства.

Тој посочи дека разговорите треба да продолжат без разлика на исходот од средбите на ниво на ЕУ на 10 или 18 декември, на кои треба да се донесе одлуката за усвојување на преговарачката рамка на Унијата со земјава.

– Стратегија на државата е дека треба да продолжиме да разговараме. Во најмала рака да создаваме атмосфера и да отстрануваме пречки за следното лето, но ако може тоа да го постигнеме и сега, би требало да правиме максимални напори до последниот момент. Патот е тој и ќе продолжиме по него да чекориме, со очекување што побрзо да ги отвориме поглавјата, изјави Заев.

Тој додаде дека специјалниот претставник на Владата за Бугарија, Владо Бучковски треба да биде само мотиватор за спроведување на Договорот за пријателство и добрососедство, а оти преговорите за изнаоѓање решение и натаму ќе ги води Министерството за надворешни работи.

Шефот на дипломатијата Бујар Османи, пак, порача дека решението со Бугарија е во Договорот за добрососедство.

– Кога двете страни ќе се уверат дека решението е во Договорот, мислам дека се друго ќе дојде на свое место. Преку создавање акциски план договорот ќе има предвидливост, со цел да испорача. Никој не бега од обврските од Договорот, изјави Османи, додавајќи дека целта е да се врати довербата во процесот, да се надминат различните толкувања и да се најдат точки на зближување и на заедничко одбележување на историски настани и фигури.

Според него, поголема штета е да се дозволи да исчезне довербата во Договорот, бидејќи во спротивно би се вратиле во ситуација на односи без рамка, кои ги имавме 30 години и видовме какви беа резултатите.

Во врска со очекувањата од средбата на заедничката македонско-бугарска комисија за историски и образовни прашања, Османи нагласи дека има простор да се оди понатаму во изнаоѓање решенија за темите и личностите кои се предмет на разговор од страна на Комисијата и оти би било штета доколку се пропушти ова досегашно приближување во погледите кон одредени историски настани и фигури.

Тој е дециден дека кај други земји членки на ЕУ нема дилеми во однос на преговарачката рамка и заклучоците за земјава, а во однос на изјавата на еврокомесарот за проширување Оливер Вархеји дека земјава „треба да и излезе во пресрет на Бугарија за загриженостите што ги има", шефот на дипломатијата порача дека е погрешно да очекуваме дека Комисијата може да има симетричен однос кон земја членка и кон земја кандидатка.

– И тоа не само Комисијата, туку која било друга земја членка. Целта зошто се бориме да станеме земја членка е токму тоа за да имаме симетричен однос кон нас и од Комисијата и од другите земји членки, додаде Османи.

Во врска со преговорите со Бугарија вчера со заеднички меморандум наречен „Македонски манифест" се огласија на Македонската академија на науките и уметностите (МАНУ), Македонската православна црква – Охридска архиепископија (МПЦ-ОА) и Универзитетот „Сцети Кирули и Методиј" (УКИМ).

Во документот тие изразуваат загриженост за исходот од развојот на настаните поврзани со евроинтеграцијата на нашата држава, условени од, како што велат, апсурдните барања на Република Бугарија, а убедени во фактот дека ги исполнуваме потребните предуслови за отпочнување на преговорите за евроинтеграција. Ги повикуваат и охрабруваат властите, медиумите, научните, културните и уметничките институции и здруженија, политичките партии, како и сите граѓани, преговорите да се водат на рамноправна и принципиелна основа, со должно почитување на меѓународното право, без никакво условување од едната или од другата страна и со почитување на достоинството на македонскиот народ.

– Да се почитуваат безрезервно сознанијата на македонските општествени, хуманистички и културолошки науки во врска со автохтоноста на македонскиот народ и неговиот историски, јазичен, културен и религиски континуитет; да се уважуваат не само објективните факти и научната аргументација, туку и комплексната интерпретација на историските факти, настани и личности; и да се уважуваат сознанијата, утврдените факти, усвоените теории и емпириските истражувања на современата светска славистика, лингвистика, историографија и меѓународното право, се наведува во Меморандумот.

МАНУ, МПЦ-ОА и УКИМ апелираат „процесот за евроинтеграција на нашата држава да продолжи во духот на меѓусебно почитување и уважување на вложените напори од наша страна за исполнување на критериумите, да се применуваат позитивните и општоприфатени меѓународни Конвенции и Декларации на ОН за правото на самоопределување и за човековите права и слободи; да се почитува безусловно слободно изразената волја на македонскиот народ, неговата етничка и духовна посебност; да се почитува волјата на македонските граѓани, припадници на македонската Република, да живеат во цивилизирани добрососедски односи и да се продолжи практиката на соработка меѓу културните, научните, образовните, религиските и економските институции; и да не се создава конфликтен амбиент во државата, да се сочува мирот и слободниот развиток кој подразбира просперитет, алтернатива, демократија и достоинствен живот, вклучително и љубов кон сопствената татковина и држава".

Со изјава вчера се огласи и Партијата на европските социјалисти (ПЕС), која изрази разочаруавње поради бугарската блокада на стартот на преговорите за членство Северна Македонија во ЕУ, порачувајќи дека политичката мудрост на двете земји е ставена на тест.

– Само јазикот на соработка и целосно разбирање на долгорочните перспективи на регионот можат успешно да ја надминат оваа пречка, се наведува во изјавата на Претседателството на ПЕС за состојбата во процесот на пристапните преговори.

Во реакцијата се истакнува дека европските социјалисти и демократи секогаш биле поддржувачи на процесот на проширување на ЕУ со земјите од Западниот Балкан и се поздравуваат одлуката на Европскиот совет за старт на пристапните преговори со Македонија и Албанија донесена во март оваа година и претставувањето на нацрт-рамката за преговори во јули.

– ПЕС изразува надеж дека преку рамноправен и суштински дијалог помеѓу Бугарија и Македонија ќе се најде решение во корист на двете земји. Премиерот на Македонија, Зоран Зеав продолжува да демонстрира храброст и лидерство додека бара начин да се излезе од ќор-сокакот, давајќи го првиот сигнал дека е можен ваков суштински дијалог. Брзиот почеток на пристапните преговори позитивно ќе влијае на долгорочните односи меѓу Бугарија и Македонија, како и на целиот регион на Западниот Балкан. Време е сите да се однесуваат одговорно и мудро, водени од визијата за заедничка европска иднина, се наведува во изјавата на ПЕС./МИА.

притисни ентер