Третманот од земја е најавен за в петок и сабота, во доцните вечерни часови, а ќе го спроведе стручна екипа од Центарот за јавно здравје – Кочани. Авионското прскање пак, ќе се реализира в сабота, во раните утрински часови, во соработка со друштвото за авиоуслуги „Бониер" од Куманово.
– Со превентивната дезинсекција од земја ќе се опфати површина од околу 1.800 хектари во централното градско подрачје, приградските населби и во дел од населените места. Авионското прскање ќе се спроведе на околу 3.400 хекатари, пред сè во градот и во низинскиот дел од општината. За дезинсекцијата ќе се користат широкоспектарни инсектициди за третирање комарци, што се одобрени од Бирото за лекови, информираа од Одделението за јавни дејности на Општина Кочани.
За овогодишната кампања за прскање против комарците локалната самоуправа издвои близу два милиони денари од општинскиот буџет, предвидени со програмата за здравствена заштита.
Од Општина Кочани ги известуваат граѓаните кои одгледуваат пчели да ги преземат потребните заштитни мерки за време и по третирањето на подрачјето. Во случај на ветар, дожд и други неповолни временски услови, дезинсекцијата ќе се одложи за следен поволен период.