„Тој само ќе продолжеше. Можеше да трае со години. И ќе траеше со години. Но, јас го запрев - и сите се собраа кога го запрев“, рече Трамп во ново интервју за „Тајм“. Канцеларијата на израелскиот премиер сè уште не ги коментирала изјавите на Трамп.

Турбулентен однос меѓу Трамп и Нетанјаху

Трамп и Нетанјаху честопати јавно се фалат, но американскиот претседател повремено покажува фрустрација од тврдата линија на Нетанјаху. Во неодамнешното обраќање пред израелскиот парламент, Трамп рече дека израелскиот лидер „не е најлесната личност со која се соработува“.

Во интервју за „Тајм“, Трамп рече дека силно го притиснал Нетанјаху да го прифати неговиот мировен план: „Биби, не можеш да се бориш против целиот свет“, му рекол Трамп. „Можеш да водиш индивидуални битки, но светот е против тебе“.

Тој, исто така, го опиша нападот на Израел врз претставниците на Хамас во Доха, Катар, како „ужасен“ и „тактичка грешка“ од страна на Нетанјаху. Сепак, додаде дека гневот поради тој напад „беше една од клучните причини што нè обедини сите“ и доведе до прекин на огнот.

Администрацијата на Трамп го припишува прекинот на огнот во Газа на нејзината подготвеност да се вклучи во дипломатски дијалог со сите страни, но и да изврши притисок врз блиските сојузници, вклучувајќи го и Израел. Ова, тврдат тие, се покажа како клучно за спроведувањето на мировниот план на Трамп од 20 точки. Таа подготвеност за притисок, рече Трамп, важи и за прашањето на Западниот Брег.

Притисок врз Израел

Потпретседателот на САД, Џ.Д. Венс, го напушти Израел во четврток по дводневната посета за да се обиде да го поткрепи кревкиот мировен план, бидејќи Израел и Хамас се обвинуваат меѓусебно за кршење на примирјето. За време на неговиот престој, крајно десничарските израелски пратеници предложија закон за анексија на Западниот Брег. Венс го нарече тоа „многу глупав политички трик“ и „навреда“.

„Политиката на администрацијата на Трамп е дека Израел нема да го анектира Западниот Брег“, рече Венс. Трамп дополнително ја нагласи пораката: „Тоа нема да се случи затоа што им дадов збор на арапските држави. Израел би ја изгубил целата поддршка од САД ако тоа се случи“, изјави тој за „Тајм“.

Иако значаен дел од коалицијата на Нетанјаху, вклучувајќи ги и членовите на партијата Ликуд, ја поддржуваат анексијата, тие ги напуштија таквите барања откако Трамп јавно го искажа своето противење. Обединетите Арапски Емирати, клучен сојузник на САД и Израел во спроведувањето на мировниот план за Газа, рекоа дека анексијата би била „црвена линија“.

Нетанјаху: Делиме заеднички вредности

По средбата со Венс, Нетанјаху ги отфрли тврдењата дека Израел е „протекторат“ на САД и рече дека земјата сама ги носи своите безбедносни одлуки.

„Сакам да биде многу јасно. Една недела велат дека Израел ги контролира САД, а следната САД го контролираат Израел. Ова е бесмислица“, им рече Нетанјаху на новинарите. „Имаме партнерство, сојуз на две земји кои делат заеднички вредности и цели.

Можеби не се согласуваме, но генерално се согласуваме, не само за целите, туку и за тоа како да ги постигнеме“.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.