Брнабиќ појаснува дека таквата можност ја предвидува резолуцијата 1244. Ги обвини и КФОР и Еулекс дека постапуваат селективно и дека не ги штитат Србите, а за премиерот Курти рече дека ги вратил во 18-иот век.
-Тешко беше да се спие синоќа. Албин Курти, сите нас, и Србите и Албанците не доведе на самиот раб на војна. Тоа Албин Курти не го прави сам. Имаме целосно игнорантско однесување на нашите партнери, и во ЕУ , изјави Ана Брнабиќ, премиерка на Србија.
Според извештаите, Белград разгледува можност да врати околу илјада свои трупи на северот на Косово. Вучиќ засега не се огласи за таквата можност, а на инстаграм по средбата со министерот за одбрана Вучевиќ само кусо порача „Нема предавање“. Последните тензиите на северот почнаа вчера прво пред куќа на косовски Србин, кому полицијата му одзеде 42 илјади литри вино наводно поради нелегална продажба. Вечерта Белград обвини дека косовски полицајци се распоредиле долж цела Митровица, а причина било да се осигура безбедноста на Албанците во мешаните етнички средини.
-Имаше повеќе од 300-350 полицајци, дел патролни со панцири, дел припадници на „РОСУ“ со долги цевки, под полна воена опрема и со оклопни возила. , изјави синоќа Петар Петковиќ, директор на Канцеларијата за КИМ.
Косовскиот премиер Курти денеска ги отфрли обвинувањата дека цел на косовската полиција биле косовските Срби. Го повика Белград дека ако сака формирање Заедница на српски општини, да ја признае косовската независност.
-Косовската полиција никогаш не е насочена, охрабрувана и ориентирана против Србите. Напротив, имаме дополнителен и повнимателен приод кон Србите во Косово, токму поради разни погрешни толкувања, кои може да ги направи нашиот северен сосед, изјави Албин Курти, премиер на Косово.
Поради новата напнатост Вашигтон побара одложување на вонредните избори во четирите косовски општини со мнозинско српско население, предвидени на 18 декември.