Познатата слика „Ѕвездена ноќ“ од холандскиот сликар Винсент ван Гог можеби е заснована на вистински поглед на небото во зори на 22 јули 1889 година, а не само производ на имагинацијата на уметникот, покажа ново истражување на астрономи во Јужна Кореја.

Студијата, објавена во списанието „Scientific Reports“, го доведува во прашање конвенционалното датирање на сликата и ја покренува можноста дека Ван Гог, познат по своите експресивни прикази на природата, започнал од вистинско небо, кое потоа уметнички го трансформирал.

„Стоев на истото место“

Авторите на новата студија веруваат дека поместувањето на датумот на сликата во јули би можело да го објасни распоредот на небесните тела прикажани на платното.

За да ја тестираат својата хипотеза, јужнокорејските истражувачи прво идентификувале гребен југозападно од санаториумот.

Првиот автор на студијата, астрономот Ким Елија Џонг-хјун од Универзитетот Кјунг Хи во Јужна Кореја, рече дека истражувачкиот тим пронашол локација од која уметникот можел да го гледа пејзажот и ја споредил со една од неговите претходни скици.

„Стоев на истото место каде што стоеше Винсент пред 130 години“, рече Ким.

Помош од астрономски софтвер

Истражувачите ги анализираа позициите на Месечината, Венера и ѕвезденото јато Хијади прикажани на сликата и ги споредија со изгледот на небото над францускиот град Сен-Реми-де-Прованс, каде што Ван Гог престојувал во санаториумот Сен-Реми во јужна Франција во 1889 година.

Потоа научниците користеа астрономски софтвер за да го реконструираат изгледот на небото во зори за секој ден во текот на јуни и јули 1889 година. Тие бараа датуми кога Месечината била над Венера, заедно со позицијата на ѕвезденото јато Хијади што се совпаѓала со сликата. Од трите датуми на кои небесните тела биле во точните позиции, 22 јули се покажа како најблиску до распоредот прикажан на сликата.

Според нивната реконструкција, тенката полумесечина, Венера и Хијади потоа биле распоредени на начин сличен на оној на платното на Ван Гог.

„За да го донесеме ова прашање во сферата на науката, моравме да го измериме степенот на сличност помеѓу распоредот на ѕвездите на сликата и вистинското небо, користејќи геометрија на облици и статистика“, објасни Ким.

Резултатите не се конечни

Сепак, авторите на студијата предупредија дека резултатите не се конечни и дека е можно Ван Гог да комбинирал сцени од небото од различни денови.

Музејот Ван Гог во Амстердам, кој не бил вклучен во студијата, тврди дека „Ѕвездена ноќ“ е создадена во јуни 1889 година. Според музејските експерти, уметникот ја насликал сликата на платно што го добил на почетокот на јуни, а веќе на 2 јули му испратил на својот брат Тео цртеж базиран на делото.

Музејот, исто така, соопшти дека околу 22 јули, Ван Гог доживеал сериозна ментална криза што го спречила да слика повеќе од еден месец.

„Ван Гог не бил заинтересиран за целосно верно претставување на реалноста“, рече портпаролот на музејот, додавајќи дека позициите на небесните тела на сликата не можат да се сметаат за сигурна основа за одредување на датумот на нејзиното создавање.

Доналд Олсон, професор по физика и астрономија на Државниот универзитет во Тексас, исто така изрази сомнежи во врска со заклучоците од новата студија, посочувајќи на несовпаѓања помеѓу позициите на Венера и ѕвезденото јато Хијади на сликата и нивните пресметани позиции на небото.

Ван Гог ја насликал „Ѕвездената ноќ“ за време на престојот во Сен Реми де Прованс, а делото сега се смета за едно од најпознатите дела на светската уметност.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.