Сиљановска Давкова на Самитот за мир: Компромисите можат да го компромитираат европскиот мир

Компромисите со меѓународното право и принципи можат да го компромитираат европскиот и светскиот мир

Претседателката Гордана Сиљановска Давкова денеска се обрати на пленарната сесија на Самитот за мир во Украина, што викендов се одржува во Бургеншток на езерото Луцерн во Швајцарија.

Во обраќањето претседателката оцени дека тековната војна во Украина нè засега сите нас, земјата е изложена на огромно човечко страдање и уништување, безбедносната архитектура на Европа е под закана, а на глобално ниво животите на милиони луѓе се засегнати од тешките економски последици.

„На најсилен можен начин ја осудуваме неиспровоцираната и неоправдана агресивна војна на Русија и ја поддржуваме Украина на најдобар начин, дури и повеќе од она што го дозволуваат нашите ограничени капацитети, ресурси“, рече претседателката Сиљановска Давкова.

Нашата држава, посочи претседателката, се приклучи кон Кримската платформа и целосно се усогласи со Заедничката надворешна и безбедносна политика на ЕУ, а Украина беше главен приоритет за време на македонското претседавање со ОБСЕ во 2023 година.

На хуманитарен план, рече претседателката, се приклучивме на меѓународната коалиција за враќање на украинските деца и обезбедивме цивилна поддршка и итна помош за Украина и за украинските бегалци. Како поддршка на евроатлантските аспирации на Украина, посочи претседателката, испративме воена опрема преку Пакетот за сеопфатна помош на НАТО.

„Како суверена нација, само Украина може да одлучи за својата иднина. Од Украина зависи кога и како ќе ја ангажира Русија за евентуално усогласено решение. Праведниот мир мора да биде вкоренет во принципите на Повелбата на ОН за суверенитет и територијален интегритет. Обидот на Русија да стекне територија со сила е флагрантно кршење на овие основни начела. Кога опасните преседани остануваат неоспорени, тие можат да се претворат во толерирани практики. Компромисите со меѓународното право и принципи можат да го компромитираат европскиот, па дури и светскиот мир и безбедноста. Единствениот начин да се избегне ова е да се почитува Повелбата на ОН и принципите на меѓународното право, без исклучок“, рече претседателката Сиљановска Давкова, истакнувајќи дека воздржувањето од употреба на сила, почитувањето на суверенитетот, територијалниот интегритет и неповредливоста на границите, и заштитата на човековите права и основните слободи, се цврсти принципи за кои не може да се преговара.

Во обраќањето претседателката Сиљановска Давкова рече дека додека се развива рамката за иден мировен договор, ќе продолжиме да ја поддржуваме слободна, независна, демократска и суверена Украина.

Италијанците гневни- туристка јава врз позната скулптура во Фиренца

Неименувана, русокоса туристка го предизвика гневот на жителите на Фиренца, откако се качила на статуата на Бахус и се фотографирала во „експлицитни пози“.

Нејзината националност е непозната, а е видена на улицата Богро Сан Јокопо, каде што има уметничко дело на фламанскиот скулптор Џамболоња.

Жената била облечена во тексас шорцеви и црна маичка, а му позирала на пријател кој ја фотографирал со телефонот, пренесува Daily Mail.

Во еден момент ги смениле местата, па пријателот клекнал пред статуата на богот на виното.

Откако фотографиите се појавија на социјалните мрежи, властите побараа строги мерки за туристите кои не покажуваат почит кон градот.

„Ваквите изрази на глупост и нечовечност се случуваат затоа што луѓето остануваат неказнети. Мора да примениме поинаков модел, строги контроли, високи казни, нулта толеранција“, изјави Патриција Аспрони од организацијата Конфкултура за зачувување на културното наследство.

Шефот на полицијата Антонела Раналди посочува дека сите туристи се добредојдени, но мора да ги почитуваат спомениците, без разлика дали се оригинали или реплики.

„Се сомневам дека оваа дама ја знае разликата“, рече таа.

Некои жители на италијанскиот град бараат туристката да биде осудена на затворска казна поради контроверзните фотографии.

Статуата на Бахус е реплика на оригиналното парче од 1560-тите, кое се чува во музејот Бардело. Поставена е во 2006 година на врвот на древната мермерна фонтана „дел Кентауро“.

Адел објави дека паузира од музиката: „Немам планови“

Пејачката Адел се повлекува од музиката по завршувањето на музичкото шоу Викенди со Адел во Лас Вегас во ноември оваа година.

„Воопшто немам планови за нова музика“, изјави Адел во интервју за германски ZDF.

"Сакам голема пауза после сето ова и мислам дека сакам да се занимавам со други креативни работи некое време. Знаете, воопшто не пеам дома. Колку е тоа чудно?" изјави пејачката.

Инаку, Адел го започна своето шоу Викенди со Адел во Вегас, поточно во Цезар Палас, во ноември 2022 година, а нејзиниот последен настап е закажан за 23 ноември 2024 година.

Адел искрено зборуваше за своето искуство со славата, признавајќи дека и недостига анонимниот живот пред да стане славна. "Не сакам да бидам славна. Сакам да правам музика и ми се допаѓа тоа што луѓето ја прифаќаат, но не ја сакам славата. Ми недостига животот пред славата", вели таа.

Да потсетиме, Адел во февруари мораше да одложи десет концерти во Лас Вегас поради здравствени проблеми.

„За жал, морам да се смирам и да се одморам од моите концерти во Вегас“, ја започна таа објавата на Инстаграм. Докторот и рекол дека треба да ги одложи концертите, што и го направила.

Извор: Индекс.хр

Земјите од ЕУ имаат мешани резултати во интегрирањето на украинските бегалци

Многу земји-членки на ЕУ се соочуваат со тешкотии во интегрирањето на украинските бегалци на пазарот на трудот, јави ДПА, повикувајќи се на извештајот објавен од Германскиот институт за истражување на вработувањето.

Институтот откри дека на почетокот на 2024 година во Германија нивото на интеграција изнесувало 27 проценти. Што се однесува до другите земји во Европа, Литванија води со 57 посто, потоа Данска со 53 отсто и Полска со 48 проценти.

Земјите како Финска, Норвешка, Романија и Шпанија имаат најниска оценка - под 20 проценти.

-Земјите кои имаат поголема потреба од нискоквалификувана работна сила имаат повисока стапка на вработеност, вели Јулија Косјакова од институтот.

Во земјите со зголемена невработеност, конкуренцијата за работни места е поголема, што ја отежнува интеграцијата. Релевантни се и факторите како што се социјалните мрежи.

-Доброто познавање на англискиот јазик меѓу населението има и позитивен ефект врз стапката на вработеност, бидејќи ја забрзува интеграцијата, вели истражувачката Ксенија Гацкова од германскиот институт за истражување на вработување.

Во процесот на интеграција, Германија го нагласува владеењето на германскиот јазик со цел да се забрза процесот.

-Искуството со бегалците во Германија помеѓу 2013 и 2019 година покажува дека инвестирањето во образованието ги зголемува шансите на човекот да најде работа и одржливоста на интеграцијата на среден и долг рок, вели Тереза ​​Кох од институтот.

Податоците на германската влада покажуваат дека повеќе од еден милион луѓе ја напуштиле Украина во Германија од почетокот на војната - повеќето од нив жени и деца.

Според федералната влада, 135.000 од нив работеле во Германија во април. Во јуни, 112.000 се уште беа во процес на интеграција, што главно беше насочено кон учење на германски јазик. /МИА

притисни ентер