Имено, тие пустински пасишта се прошарани со милиони чудни кругови, во кои нема трева или друга вегетација. Оваа чудна појава затоа е наречена самовилски кругови.

Областа со чудни кругови се наоѓа на околу сто километри од крајбрежниот дел на Намибија и се протега со километри. Типичен самовилски круг има дијаметар од 2 до 10 метри, а од следниот е оддалечен десет метри.

Научниците веќе извесно време се обидуваат да разберат како настанале, односно каков процес се крие зад нивните формации и по некое време се поделиле на два табора со различни објаснувања.

Според едната теорија, круговите се предизвикани од термити кои се хранат со корените, а според другата, се работи за самоорганизирање на тревата за да се зголеми достапноста на вода, пишува Science Alert.

Студиите ги потврдија двете теории, а некои истражувања покажале дека термитите и самоорганизацијата на растенијата можат да бидат решение на самовилските кругови во исто време. Но, сето тоа малку се разниша кога во 2016 година беа пронајдени слични кругови во Австралија; со тоа што овојпат тие никако не беа поврзани со термити.

Екологот Стефан Гецин од Универзитетот во Гетинген во Германија и неговите колеги повторно ја посетија Намибија за да најдат докази за сценариото на самоорганизирање поради недостиг на вода. Притоа, тие истражувале самовилски кругови во 10 региони низ пустината Намиб.

На тој простор врнежите се ретки и неправилни. Веднаш по дождот, внатре во самовилските кругови може да се појави трева, која набрзо пресушува, иако опстојува во областите надвор од нив.

Гетцин ги следел спорадичните врнежи од дожд во 10 региони, испитувајќи ја тревата, нејзините корени и ластари, како и секое потенцијално оштетување на коренот предизвикано од термитите. Ги анализирал околностите на сушењето на тревата и инсталирал сензори за влага во почвата и околу круговите.

Десет дена по врнежите, имало многу малку млада трева внатре во самовилските кругови, покажало истражувањето, и таа почнала да се суши набргу по никнувањето. Дваесет дена по дождот, целата трева внатре во круговите се исушила, додека околната трева останала „зелена и мека“.

Корените на мртвата трева внатре во круговите биле подеднакво долги, па дури и подолги од корените надвор од нив, што укажува на тоа дека растенијата што бараат вода вложиле многу напор во растот на коренот. Научниците не пронашле докази дека термитите се хранат со корените.

„Ненадејниот недостаток на трева за поголемиот дел од областа внатре во круговите не може да се објасни со активноста на термитите бидејќи немаше биомаса со која овие инсекти би можеле да се хранат. Но, уште поважно, покажавме дека термитите не се одговорни за формирањето на круговите бидејќи тревата почна да умира веднаш по врнежите без никакви знаци на јадење од термити“, рече Гецин.

Сензорите за почва забележале бавно намалување на влажноста на почвата во и надвор од круговите по дождот, кога тревата сè уште не била добро вкоренета. Дури и откако околната трева се развила, влагата во почвата ја немало насекаде.

"Поради интензивната топлина во пустината Намиб, тревите постојано се појавуваат и губат вода. Поради ова, тие создаваат вакуми за влага во почвата околу корените и на тој начин привлекуваат вода", објаснува Гетцин.

„Со формирање на обликувани пејзажи на рамномерно распоредени самовилски кругови, тревите дејствуваат како инженери на екосистемот и директно имаат корист од водните ресурси создадени од вегетациските празнини“, додаде тој.

Истражувањето, под наслов Plant water stress, not termite herbivory, causes Namibia’s fairy circles е објавено во списанието Perspectives in Plant Ecology, Evolution and Systematics.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.