Вицепремиерот Изет Меџити и денеска со иста порака до неговиот коалициски партнер Арбен Таравари - да избере страна со кого ќе соработува на претстојните локални избори. За разлика од тврдењето на Таравари, Меџити вели дека спојувањето на четирите албански партии во една не е нова идеја, за што тој бил запознаен од самиот почеток. Таравари беше надгласан, а не уценет од останатите лидери од „Вреди“ за предлогот на локалните избори да сите да одат со посебни листи, кажа Меџити, а за прозивките дека комуницира со високи претставници од ДУИ, Меџити му одговори – неформална комуникација со партиите е едно, а политичка соработка нешто сосема друго.
-Треба јасно да дефинираме комуникација и политички преговори. Ние комуникација, поздравување, можеме да имаме со сите во Собранието, со Муса Џафери, Фатмир Дехари и со некој пратеник од Левица, СДСМ и со ВМРО. На крајот, ние не водиме војна, туку водиме политички битки и концепти. Проблемот е што и самиот Таравари потврди дека преговара со Ахмети. ВЛЕН е формиран како антипод на ДУИ. Затоа уште еднаш ќе го повикам, не може да бидеш и дел од ВРЕДИ и да преговараш со Ахмети и ДУИ оти тогаш губи смисла промената и поделбата на два политички концепти, изјави Меџити.
Одговорот на Меџити следува по синоќешната изјава на Таравари кој во интервју говорејќи за последните случувања во оваа коалиција и коментирајќи ја својата изјава дека сите во „Вреди“ комуницираат со ДУИ, рече дека Изет Меџити е тој што има комуникација со Муса Џафери и Фатмир Дехари од ДУИ.
-На пример, господинот Меџити има комуникација со многу луѓе во ДУИ. Ако не со Али Ахмети, има со Муса Џафери. Или има со Фатмир Дехари. Или има со некој експонент. И нашите пратеници во Собранието имаат комуникација. Верувам и тие од Беса, не се изолирани. Не велам дека претседателите се сретнале заедно, но комуникација во една држава со 1,5 милион жители и каде што има 120 пратеници во Парламентот – тоа е нормално, изјави Таравари.
Таравари негира дека преговара со ДУИ за соработка на локалните. И вчера повтори дека не добил понуда од другите партии за да се обединат во една. Ултиматуми како што кажа не прифаќа но подготвен е да разговара.