Информацијата за Канал 5 ја потврди неговиот адвокат Антонио Апостолски.
Во жалбата навеле дека судот спротивно на законот му определил притвор без притоа да го сослуша.
Жалбата до Апелациониот суд е поднесена во законскиот рок кој го определи Кривичниот суд.
Со оглед на тоа што се работи за предмет во врска со кој е побаран притвор а за кој веќе тече судска постапка, надлежна да одлучува по жалбата е Апелација.
Од повисокиот суд велат дека ќе биде доставена до Специјалното обвинителство за да се добие мислење.
И откако ќе заврши постапката со прибавување на мислења, доколку побара одбраната на Мијалков ќе се закаже јавна седница за да ја образложи жалбата, по што судот во рок од 48 часа ќе треба да донесе одлука.
На барање на Специјалното јавно обвинителство во вторникот Кривичниот суд му определи притвор на Мијалков кој е обвинет во случајот Тврдина – Таргет, поврзан со масовното прислушување. Според сознанијата на обвинителството Мијалков се подготвувал да бега.
Во решението судот заклучи дека постои таква опасност но таквата можност ја поткрепува и со сознанијата на Управата за финансиско разузнавање дека обвинетиот располагал со две сметки на кои има 11 милиони евра.
Дополнително опасноста од бегство го зголемува и фактот што Мијалков е обвинет во повеќе предмети на Специјалното обвинителство но и последната истрагата поврзана со перење пари, односно Империја.
На вчера закажаното рочиште за Тврдина Таргет Мијалков не беше спроведен од истражниот затвор каде го издржува притворот.
Судијката Џенета Бектовиќ образложи дека поради краткото време судот не успеал да достави барање за спроведување од затвор.
Последен пат пред спроведување во притвор Мијалков се појави во суд токму во вторникот на рочиште за случајот Тортура, додека следно судење по предмет во кој е обвинет Мијалков е закажано за 27ми месецов за случајот Титаник 2 кој се однесува на изборни нерегуларности.