Македонија

Нема консензус за Изборниот законик – Филипче предлага експертска група, Мицкоски бара опозицијата да се усогласи

Опозицијата нека ангажира и експерти за Изборниот законик, владината коалиција има усогласен став дека ќе го гласа под услов да се олесни гласањето на дијаспората- вели премиерот Мицкоски.

Опозицијата нека ангажира и експерти за Изборниот законик, владината коалиција има усогласен став дека ќе го гласа под услов да се олесни гласањето на дијаспората- вели премиерот Мицкоски кој и денеска ги прозва лидерите на опозициските партии да постигнат консензус. Тој е скептичен дека предлогот на Филипче за експертска работна група е со цел да се стигне до компримисно решение, со оценка дека само бара начин да избега од одговорноста. Според Мицкоски, СДСМ и Левица се натпреваруваат меѓусебе, а нивната блокада на Изборниот законик ја нарече политичка естрада.

-Според моето искуство и во животот и во политиката ако сакате некоја работа да не се заврши тогаш формирајте група или комисија и тогаш работата нема да добие таков тек како што треба да добие. Повторно апелирам на одговорност, на зрелост. Предлогот е на маса, ние како владина коалиција сме усогласени, велиме дајте усогласете се, направете текст, ангажирајте експерти, нека ви состават текст, дајте ние да го поддржиме. Тие во моментов мислам дека се натпреваруваат со друга политичка партија која да биде најголема во опозицијата, а не да понудат опција со која би победиле на избори. - Христијан Мицкоски – претседател на Влада

Од друга страна Филипче вели дека СДСМ ја поддржува европската агенда, но не по цена да се озаконат механизми кои во иднина ќе овозможат да се манипулира со гласовите на иселениците. Рече дека неговата партија е отворена за дебата и со помош од експерти да се најде заеднички јазик, но останува на ставот дека е сомнително тоа што власта инсистира брзо да се реши ова прашање.

-Ако го тргнат членот во кој што се менува досегашниот начин на гласање на дијаспората, и да се согласат, еве нека се формира работна група, која што доколку треба, може да разговара за некој начин соодветен, како поинаку би гласала дијаспората, еве да го дебатираме, па во следниот период нека заклучи некој експертска работна група кој што ќе анализира примери од други земји, дали е потребно и на кој начин треба да се смени гласењето на дијаспората кај нас. Како ќе го контролираме тој механизам, од кај ќе доаѓаат писмата? Дали вие сакате некој наш сограѓанин кој живее во дијаспора да го изложиме на ризик некој во негово име да прати писмо од некаде?- Венко Филипче – претседател на СДСМ

По четиримесечните преговори во работната група во правда, политичките партии имаа неколку обиди во рамки на собранието да се договорат за деблокада на Изборниот законик, кој е закочен со над 13 илјади амандмани. На маса се повеќе прашања, меѓу кои и изборниот модел и финансирањето, за кои власта тврди дека ќе даде зелено светло, но и за нив засега нема консензус од партиите. Дали ќе има поместување во позициите ќе се знае од следната недела, за кога Левица најави дека ќе иницира средби со СДСМ и ДУИ. Целта на владејачката коалиција е да се стигне крајниот рок за исполнување на реформската агенда до среда.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Црна хроника

Три лица лишени од слобода за семејно насилство во изминатото деноноќие

Три лица лишени од слобода, вкупно четири пријави за семејно насилство во изминатото деноноќие

Ноќеска (11.07.2026) во 01:20 часот во струмичко село полициски службеници од СВР Струмица лишија од слобода 49-годишен жител од тоа село. Според пријавеното тој на 10.07.2026 околу 22:30 часот во семејниот дом физички го нападнал неговиот 68-годишен татко и му нанел повреди. Лицето е задржано во Полициската станица Струмица, а за настанот е известен јавен обвинител од Основното јавно обвинителство Струмица. По документирање на случајот против него ќе биде поднесена соодветна пријава.

На 10.07.2026 во 20:40 часот полициски службеници од СВР Куманово го лишија од слобода Ч.С.(49) од кумановско затоа што физички ја нападнал неговата 33-годишна сопруга. Тој бил приведен во полициска станица и по целосно документирање на случајот против него ќе следува соодветна пријава.

На 11.07.2026 во 00:10 часот во Полициската станица Тетово, 54-годишна жена од Тетово пријави дека на 10.07.2026 околу 21:00 часот во нивниот семеен дом, по претходна расправија за пари, нејзиниот син К.В. физички ја нападнал, нанесувајќи ѝ повреди. На оштетената ѝ била укажана лекарска помош во Клиничката болница Тетово. Се преземаат мерки за пронаоѓање на сторителот и расчистување на случајот.

На 11.07.2026 во 00:20 часот, во СВР Охрид лишена од слобода е Е.В.(36) од охридско која претходно, во семејниот дом, физички ја нападнала својата мајка. По целосно документирање на настанот, против неа ќе биде поднесена соодветна пријава.

Тагови: семејно насилство

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Свет

Шпанските спасувачи трагаат по 23 исчезнати во пожарот кој однесе 12 жртви

Шпанските спасувачи трагаат по најмалку 23 исчезнати во големиот шумски пожар во шпанскиот регион Андалузија, во кој досега загинаа 12 лица.

Пожарот сè уште се шири поради неповолните временски услови и тешките временски услови, а досега зафати околу 4.000 хектари вегетација. Во битката со огнот, учествуваат повеќе од 500 служби за итни случаи, со поддршка на 32 авиона. Илјадници жители се евакуирани од погодените области, а повеќе од 1.400 луѓе моментално се наоѓаат во привремени засолништа првичните истраги покажуваат дека паднат далновод бил причина за пожарот. Властите стравуваат дека пожарот би можел да стане еден од најсмртоносните во Андалузија и еден од најкатастрофалните во Шпанија во последните децении.

Тагови: пожар

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

Сиљановска-Давкова им додели сертификати на учесниците на „Охрид камп за високо-технолошка извонредност“

Претседателката Гордана Сиљановска-Давкова денеска присуствуваше на затворањето на шестиот „Охрид камп за високо-технолошка извонредност“, што се одржува под нејзино покровителство, а во организација на „Македонија 2025“.

Таа оцени дека ваквите иницијативи не само што придонесуваат за стекнување напредни знаења и вештини во областа на роботиката, програмирањето, инженерството и иновациите, туку ги подготвуваат младите да бидат активни актери во обликувањето на иднината, наместо пасивни набљудувачи на промените.

Според неа, особено важно е младите да размислуваат критички, да создаваат иновативни решенија и да ги користат современите технологии како средство за општествен напредок, одржлив развој и подобар квалитет на животот.

Сиљановска-Давкова порача дека талентот треба да се препознава, негува, стимулира и наградува, а младите да ги „инфицираат“ и другите околу себе со љубов кон знаењето и науката.

Потсетувајќи на роботот Протеус, кој се свртел против својот творец, таа нагласи дека човештвото мора мудро да се однесува кон новите технологии, оти тие треба да останат во служба на човекот, а не да станат причина за губење на човечката димензија.

Учесниците ги споделија своите искуства од кампот, истакнувајќи дека програмата им овозможила да стекнат нови знаења и вештини, да работат на иновативни проекти и да воспостават пријателства со врсници од различни земји.

Тие ги презентираа проектите изработени за време на кампот, по што претседателката, во својство на покровителка, им ги врачи сертификатите за успешно завршување на програмата.

Годинава, кампот обедини 24 млади на возраст од 11 до 15 години од македонската дијаспора во САД, Малта, Србија, ОАЕ, Германија и од неколку градови низ државата.

Тагови: Гордана Сиљановска-Давкова

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.