Свет

Најмалку 25 лица загинаа, а 50 се ранети во израелски напади врз палестински шатори

Најмалку 25 лица загинаа синоќа, а 50 се ранети во израелското гранатирање на шатори за раселените Палестинци северно од градот Рафа, соопшти Министерството за здравство на Газа и вработените во Итната помош.

Тоа е најновиот смртоносен напад врз малата палестинска енклава каде стотици илјади луѓе ги напуштија своите домови по конфликтот меѓу Израел и Хамас.

Портпаролот на цивилната одбрана во Рафа, Ахмед Радван рече дека очевидци им кажале на спасувачите за гранатирање на две локации во крајбрежна област полна со шатори, а Министерството за здравство соопшти дека многу луѓе биле убиени и ранети во нападите.

Нападите се случија во непосредна близина на безбедната зона одредена од Израел.

Израелската армија соопшти дека проверува што се случило во наведените координати.

Израел претходно бомбардираше локации во таканаречената хуманитарна зона во Муваси, рурална област на брегот на Средоземното Море каде во последните месеци беа подигнати шатори за раселените.

Нападите дојдоа додека Израел ја продолжува својата воена операција во Рафа, каде што повеќе од милион Палестинци избегаа од конфликтот во другите делови на Газа.

Регион

Радев нема да ја предводи бугарската делегација на Самитот на НАТО

Претседателот на Бугарија, Румен Радев не го прифати предлогот на Советот на министри да ја предводи бугарската делегација на Самитот на НАТО во Вашингтон, што ќе се одржи од 9 до 11 јули.

Како што објави БТА, одлуката на Радев е поради тоа што тој „не прифаќа некои одредби од рамковните позиции усвоени од Советот на министри, кои се однесуваат на обврските што нашата земја ги презема во однос на војната во Украина“.

Министерскиот совет вчера ги одобри рамковните позиции на Бугарија за Самитот на НАТО. Со истата одлука се предлага претседателот Радев да ја предводи бугарската делегација и да ги презентира прифатените рамковни позиции. По одбивањето на Радев, бугарската делегација ќе ја предводи премиерот и министер за надворешни работи Димитар Главчев.

Радев е поранешен генерал и пилот на борбен авион. Тој уште првиот ден ја осуди руската агресија врз Украина, но постојано ја критикува воената поддршка на бугарската Влада за Киев. /МИА

Фудбал

Мартинез ја одби понудата од Саудиска Арабија

Ѕвездата на Интер, Лаутаро Мартинез ја одби понудата за трансфер во Саудиска Арабија, објави Скај Спортс. Менаџерот на Аргентинецот со официјално соопштение ја потврди информацијата.

-Лаутаро постигна договор со раководството на Интер да потпише нов договор. Тој е еден од лидерите на тимот. Тој е и капитен. Разговаравме за ситуацијата и тој нема желба да ја напушти Европа, изјави неговиот агент Алехандро Камандо.

Лаутаро за Интер игра од 2018 година. За гигантите од Милано има 282 натпревари и 129 гола. Два пати ја освоил Серија А и Купот на Италија, 3 пати Суперкупот, а играл по едно финале во Лигата на шампионите и Лигата на Европа.

Напаѓачкиот играч е дел од репрезентацијата на Аргентина за Копа Америка, откако постигна по еден гол во победите над Канада (2:0) и Чиле (1:0) во групната фаза на натпреварувањето. /МИА

Македонија

ЦУК: Падна карпа на булеварот „Никола Карев“ после влезот на касарната „Илинден“

Падна карпа на булеварот „Никола Карев“ во Скопје после влезот на касарната „Илинден“, информира Центарот за управување со кризи (ЦУК).

Привјавата за падната карпа, како што велат ја добиле на единствениот повикувачки број за итни случаи 112 во ЦУК.

Од Регионалниот ЦУК Скопје посочуваат дека веднаш ги информирале надлежните од Град Скопје за итниот случај.