Претседателот на Владата, Христијан Мицкоски и министерот за здравство, Сашо Клековски, денеска присуствуваа на настан по повод набавените сто нови, комплетно опремени амбулантни возила за Итната медицинска помош, за потребите на јавните здравствени установи низ државата.

– Зајакнувањето на службата за итна медицинска помош е еден од приоритетите на Владата и Министерството за здравство. Обезбедувањето сто нови возила за итната помош, со кои се дополнува возниот парк и се заменуваат амортизираните возила, е значајна инвестиција во вредност од 460 милиони денари. Секое возило располага со комплетна современа медицинска опрема за интервенција, стабилизација и транспорт на пациенти. Со оваа инвестиција ги унапредуваме условите за мониторирање, стабилизација и иницијален третман на пациентот уште за време на транспортот, истакна министерот Клековски на настанот.

– Обновата на возниот парк продолжува. Планот е возниот парк на итната помош од сегашните 140 да се зголеми на 200 возила. Веќе почнуваме разговори за набавка на уште 50 нови возила во 2027 година. Паралелно, континуирано ги следиме кадровските потреби и критичните точки во мрежата на итната помош, за ресурсите да бидат насочени таму каде што се најпотребни, изјави Клековски.

Министерот најави и пакет реформи со кои Итната медицинска помош ќе се постави на нови основи:

ИМП како посебна установа – во тек е процесот на трансформација на итната помош во посебна служба, одделена од Здравствен дом-Скопје.

воведување парамедици во тимовите на итна медицинска помош;

национален систем за тријажа, со кој ќе се изедначи постапувањето при повиците и интервенциите низ целата држава;

национален диспечерски центар со утврдени клучни показатели за успешност (KPI), кои ќе овозможат мерливо и транспарентно следење на работата на службата.

Клековски го поздрави основањето на Македонската асоцијација за ургентна медицина минатата година и ја истакна поддршката од Европското здружение за ургентна медицина за реформите.

– Новите возила се важен чекор, но не се доволни сами по себе. Целта на реформите е секој граѓанин, без разлика каде живее, да добие навремена и еднаква итна медицинска грижа, порача Клековски.

Возилата се опремени со напреден дефибрилатор/монитор со можност за пејсинг и мониторинг, кислородна и респираторна опрема за возрасни, деца и новороденчиња, автоматска носилка, хидрауличен систем за намалување на вибрациите при транспорт, интегриран систем за озонска дезинфекција, како и современи системи за активна безбедност на возилото.

Медицинскиот простор е целосно адаптиран за работа на екипите на ИМП и за транспорт и третман на пациентите, со независно греење и климатизација, вентилација, LED осветлување насочено кон пациентот, посебни места за медицинската опрема и три седишта за медицински персонал/придружба. Возилата овозможуваат ЕКГ и ST/QT мониторинг, како и следење пулс и неинвазивен крвен притисок.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Во периодот од јануари до септември, Кина увезла значително поголеми количества руски енергенси – особено течен природен гас (ТПГ) – во услови на прекини во снабдувањето од регионот на Персискиот Залив, објави во вторникот руската новинска агенција ТАСС, повикувајќи се на податоци од кинеските царински органи.

Од јануари до септември, увозот на руски ТПГ во Кина пораснал за 44,3 отсто во споредба со истиот период минатата година, достигнувајќи 7,19 милиони тони, пренесе ТАСС, повикувајќи се на кинески податоци.

Во истиот период, вредноста на испораките на руски ЛНГ (течен природен гас) за кинеските купувачи се зголемила за 38,5 отсто, достигнувајќи 3,92 милијарди долари. Како резултат на тоа, во првите девет месеци од годината, Русија го зазеде второто место меѓу водечките добавувачи на ЛНГ за Кина, пренесува ТАСС.

Кинеските купувачи во овој период набавиле речиси двојно поголема количина ЛНГ од Австралија – 15,01 милиони тони – иако тоа претставува намалување од 1,1 отсто во споредба со претходната година. Малезија е на третото место, со 6,2 милиони тони ЛНГ испорачани во Кина, што претставува зголемување од 26,1 отсто во однос на истиот период минатата година.

Во исто време, кинескиот увоз на ЛНГ од Катар драстично опаднал за 65,5 отсто, на 4,88 милиони тони. Испораките од Индонезија, исто така, забележаа значителен пад, намалувајќи се за 22,8 отсто, на 2,46 милиони тони.

Во истиот период, американските добавувачи испорачале нешто повеќе од 231.000 тони ЛНГ во Кина – намалување од 11 отсто во споредба со претходната година.

Во периодот од јануари до септември, обемот на испораки на руска нафта за Кина е зголемен за 18,3 отсто во споредба со истиот период лани, достигнувајќи 87,58 милиони тони, пренесува ТАСС, повикувајќи се на податоци од кинеските царински органи.

Истовремено, вредноста на испорачаната нафта пораснала за 36,5 отсто, достигнувајќи 51,54 милијарди долари.

Во првите три квартали од оваа година, Кина најголемиот дел од нафтата го набавила од Русија – со значителна разлика пред останатите – пренесува ТАСС.

Според царинските податоци, Бразил е на второто место меѓу добавувачите, со испорачани 44,29 милиони тони – што претставува зголемување од 33,3 отсто во споредба со истиот период минатата година.

Во исто време, обемот на испораки од Саудиска Арабија е намален за 27,5 отсто, на 43,11 милиони тони.

Индонезија го зазема четвртото место на листата на добавувачи, со испорачани 27,96 милиони тони – повеќе од тројно во споредба со количината од минатата година. Од друга страна, добавувачите од Малезија испорачале 25,41 милион тони нафта во Кина – половина од обемот забележан во истиот период претходната година.

Во септември, Кина увезла двојно повеќе руски течен природен гас (ТПГ) отколку претходниот месец, што изнесува вкупно 1,85 милиони тони. Вредноста на овие пратки е повеќе од двојно зголемена во споредба со август, достигнувајќи 1,18 милијарди долари, според податоците на кинеските царински органи.

Што се однесува до руската нафта, месечните испораки се намалиле за 11,4 отсто, на 9,94 милиони тони. Сепак, нивната вредност се зголемила за 1,7 отсто во споредба со август, достигнувајќи 6,58 милијарди долари. Официјалните царински податоци покажуваат дека увозот на руски ТПГ во Кина забележал само благ пораст – од 3,3 отсто – во 2024 година, по скокот од 18,2 отсто претходната година, со што вкупната количина достигнала 9,79 милиони тони.

Во меѓувреме, испораките на руска нафта за Кина се зголемиле за 1,3 отсто во 2024 година, иако вкупниот увоз на „црно злато“ во Кина опаднал за 1,9 отсто.

Според царинските податоци, во 2025 година увозот на нафта во Кина пораснал за 4,4 отсто, достигнувајќи 577,72 милиони тони, додека руските испораки се намалиле за 7,1 отсто, на 100,72 милиони тони.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Заменик-претседателот на Владата и министер за транспорт, Александар Николоски, денеска оствари работна средба со градоначалникот на oпштина Карпош, Сотир Лукровски, на која разговараа за реализацијата на капиталните проекти што се спроведуваат преку Владата, а во соработка со Општината.

" Преку двата повици што веќе се активни, поддршката за Општина Карпош од страна на Владата е околу 11 милиони евра, од кои директно преку Министерството за транспорт се реализираат околу 5,5 милиони евра. Нема дел од општината каде што не работиме, каде што не решаваме инфраструктурни проблеми и продолжуваме да го правиме тоа во следниот период" истакна Николоски.

Вицепремиерот најави нова соработка и поддршка за општина Карпош

"Се договоривме за еден нов инвестициски циклус каде што ќе помогнеме во реализација на плоштади, во реализација на улици, атмосферска канализација, фекална канализација и уредување на просторот таму каде што е најпотребно во општината. Исто така, како што кажа градоначалникот, зборувавме за решение на свлечиштата особено во делот кој што гравитира кон населбите Козле, понатаму Трнодол, Жданец, да се санира целиот тој простор " изјави Николоски.

На состанокот се разговараше и за паркинг местата како еден од предизвиците на општината

"Во следниот период еден од главните предизвици е решавање на проблемот со паркирањето, особено во делот на населбите Карпош 1, Карпош 2, Карпош 3 и Карпош 4. Тука работиме заедно со Јавното претпријатие за стопанисување со станбен и деловен простор, на изнаоѓање на едно интегрирано решение кое што треба да значи решение на проблемот со паркинг преку изведба на катни гаражи кои што ќе бидат достапни за граѓаните, исто така подземно паркирање, подземни катни гаражи кои што ќе значат од една страна зеленило, паркови, а од друга страна решавање на проблемот со паркирање. Овие проекти ги работиме заедно со општината и со Јавното претпријатие за стопанисување со станбен и деловен простор. Онаму каде што има потреба или проектите веќе се при крај ќе влеземе во реализација, на другите места работиме на изработка на проекти и очекувам во следните две до три години целокупниот проблем со паркирање во Општина Карпош да биде решен на овој начин" додаде вицепремиерот Николоски.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.