Можен ли е консензус меѓу партиите за реформската агенда? - Канал 5

Македонија

Можен ли е консензус меѓу партиите за реформската агенда?

Реформска агенда во пракса со очекување за напредок или застој во европскиот пат поради политичка вина?

Можен ли е консензус меѓу партиите за реформската агенда?

Се интензивираат меѓупартиските препукувања околу евроинтеграциите на Македонија, кои власта и опозицијата ги гледаат низ различен диоптер. Политичкиот аналитичар Благојче Атанасоски не очекува двата табора да најдат заеднички јазик и на дело да покажат дека Македонија заслужува да оди скалило погоре. Тој оценува дека реалните реформи во земјава може да се случат само кога земјава ќе ги почне преговорите со унијата.

-Јас сум скептик бидејќи во овие 35 години покажавме дека во состојбите поврзани со правосудството, ефикасноста, независноста на институциите на системот, јавната администрација и сите тие работи кои значат подобрување на целокупното општествено живеење не се покажавме како држава и само политичките партии се препукуваат меѓу себе за тоа кој ја кочи реформската агенда. Навистина Македонија 35 години нема институционален капацитет за политичките елити да ја спроведат таа реформска агенда,- Благојче Атанасоски – политички аналитичар.

Во меѓувреме соседна Бугарија е на чекор до официјално формирање на политичката влада на чело со Румен Радев, а од македонска страна беше најавено дека со тоа ќе почне и интензивен ангажман за продлабочување на соработката со цел да се решат отворените прашања. Атанасоски е песимист дека односите ќе се подобрат, напротив - вели дека Радев и досега ја покажал неговата остра политика кон Македонија.

-Станува збор за човек кој ќе има концентрирана најголема политичка моќ во Бугарија, кој беше де факто архитект на ветото кое се употреби на македонските евроинтеграции, станува збор нели за поранешниот претседател на Република Бугарија, Румен Радев.. Ќе нема потреба да преговара за да формира коалициска влада, ќе има стабилно и комотно мнозинство за во следните 4 години и мислам дека оттука ќе диктира многу поригидна и потврда политика во однос на Македонија и македонските евроинтеграции,- Благојче Атанасоски – политички аналитичар.

Пред неколку дена ресорните министри и премиерот Мицкоски одржаа состанок на кој заклучиле дека од 10 задачи од реформската агенда, Македонија ќе има застој само во две, меѓу нив Изборниот законик кој опозициската СДСМ го бојкотира во работната група. Сепак и тој и шефот на дипломатијата Муцунски уверуваат дека земјава испорачува резултати и затоа Европа треба да направи исчекор кон проширувањето.

YouTube video

Тагови: реформи

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Европа

Се урна хеликоптер во Италија: Има жртви

Најмалку едно лице загина денес, а тројца се повредени во хеликоптерска несреќа во северна Италија, објави Анса.

Се урна хеликоптер во Италија: Има жртви

Несреќата се случила во областа на градот Солчо ди Леза на езерото Маџоре.

Приватниот хеликоптер се урна кратко по полетувањето од вила во областа.

Тагови: хеликоптер

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Свет

Зеленски: Пешадијата на фронтот би можела да заработува до 6.000 евра месечно

Украина ќе ги зголеми платите на војниците и ќе се обиде да привлече повеќе борци од странство, објави во петок претседателот Володимир Зеленски.

Зеленски: Пешадијата на фронтот би можела да заработува до 6.000 евра месечно

Овие потези доаѓаат во време кога армијата се соочува со сериозен недостиг на персонал по четиригодишната војна со Русија, објави Ројтерс.

Владата на Зеленски објави во мај дека ќе разгледа можни мерки за зголемување на бројот на војници, откако разговорите со Русија за завршување на војната беа во застој. По состанокот со клучните министри, Зеленски во своето дневно обраќање рече: „Се договоривме како финансиски да ја зајакнеме нашата одбрана и да продолжиме со трансформацијата на украинската армија“. Тој додаде дека владата ќе одобри специфичен механизам и дека првите нови исплати треба да започнат уште во јуни.

Зголемени трошоци за одбрана

Украина обезбеди заем од 90 милијарди евра од Европската Унија, што ѝ овозможува на владата да ги зголеми трошоците за одбрана оваа година на рекордни 4,4 трилиони гривни (околу 82,5 милијарди евра), а средствата се очекува да почнат да пристигнуваат овој месец. Зеленски објави дека владата ќе ја зголеми основната воена плата за една третина, за 30.000 гривни (околу 600 евра).

Воените аналитичари и економисти велат дека овој потег има за цел да ја усогласи со просечната месечна плата во земјата, која постојано растеше поради недостиг на работна сила за време на војната. Пешадијците на фронтовската линија ќе добиваат просечна месечна плата од 300.000 гривни (околу 6.000 евра), во однос на сегашните 100.000 до 150.000 гривни. Исто така, ќе им биде понуден нов вид договор на одредено време за борбени мисии, со времетраење од 10, 14 или 24 месеци.

Потрагата по странски борци

Киев, исто така, сака да регрутира повеќе странски борци. „Наредив да се создадат значително повеќе можности за регрутирање странски волонтери во украинската армија и да се отворат повеќе канали за регрутирање во оваа смисла“, рече Зеленски.

Според проценките на украинските воени публикации, околу 10.000 странски волонтери од повеќе од 70 земји се приклучиле на украинската армија од почетокот на војната.

Извор: Индекс.хр

Тагови: Володимир Зеленски

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Свет

Путин пред војници: Не напредуваме толку брзо колку што би сакале

Рускиот претседател Владимир Путин објави дека руските сили ќе ги интензивираат нападите врз украинската инфраструктура со цел да ги „одвратат“ нападите врз цели во Русија.

Путин пред војници: Не напредуваме толку брзо колку што би сакале

Според руските медиуми, Путин го рекол ова на состанок со припадници на руските вооружени сили.

„Со оглед на тоа што прават, ние мораме, а ова е нашата следна задача, соодветно да одговориме. Ние го правиме ова и ќе продолжиме да ги интензивираме нападите врз непријателската инфраструктура со цел да ги одвратиме од напади врз нашите цивилни објекти“, рече Путин.

Тој додаде дека украинските напади предизвикуваат штета на руската економија, но тврди дека таа брзо се опоравува. „Што се однесува до економијата, се разбира, се предизвикува штета. Но, сè брзо се опоравува, нема да може да ни создаде сериозни проблеми“, нагласи тој.

„Ги враќаме нашите територии под контрола“

Тој го наведе фактот дека повеќе од 700.000 руски војници се распоредени во зоната на „специјална воена операција“. Тој нагласи дека руската влада разгледува образовни програми за учесниците во „специјалната воена операција“, како и можностите за медицинска рехабилитација и вработување по враќањето од служба.

Тој призна дека руските сили во Украина не напредуваат „толку брзо колку што би сакала Москва“, но истакна дека тие сè уште постепено напредуваат од ден на ден. „Полека, чекор по чекор, ги враќаме нашите територии под контрола. Ќе го постигнеме тоа, никој не може да се сомнева во тоа“, рече Путин.

Украинските воздухопловни сили претходно предупредија дека постои голема веројатност за лансирање руски балистички ракети од полигонот Капустин Јар во следните 24 часа. Русија претходно лансираше балистички ракети со среден дострел „Орешник“ од таа област.

Извор: Индекс.хр

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

притисни ентер