На конференцијата, која се одржа вчера и денеска, беа разгледани теми кои имаат импликации за климатските амбиции пред и по 2020 година.
– Техничките аспекти, особено од воведувањето на нови пазарни механизми во рамки на Договорот од Париз, се разгледуваа во текот на првата недела, а во моментов се одвива високиот сегмент, каде министрите одговорни за креирање на климатските политики разговараат за ублажување, обезбедена поддршка и активности на Маракешкото партнерство за глобално климатско дејствување, соопштуваат од МЖСПП.
Министерот Нуредини на своето обраќање ја истакнал потребата од интегриран, отворен и транспарентен пристап базиран на знаење и ја изнесе подготвеноста на државата за засилување на амбицијата за национален придонес кон ублажувањето на климатските промени до крајот на 2020 година. Дополнително, министерот ја поставил паралелата помеѓу висока амбиција и можност за нискојаглероден раст и развој, зелени работни места и праведна транзиција кон чиста енергија.
– Конференцијата за климатски промени во 2019 година се одржува во време на повици кон земјите да ги засилат сопствените и колективните амбиции на нивните придонеси за намалување на климатските промени. Чилеанското претседателство ја именува конференцијата како „Време за акција", а многумина ја гледаат оваа конференција како пресврт во климатските амбиции кон Парискиот договор.Во оваа насока, треба да се забележи дека Република Македонија се приклучи и кон Алијансата за климатска амбиција (Climate Ambition Alliance), најавувајќи зголемен национален придонес до 2020 година, се посочува во соопштението на МЖСПП.
На маргините на конференцијата, министерот Нуредини остварил и билатерална средба со грчкиот министер за животна средина и енергија, Костис Хатцидакис, со кого разговарале за можните начини на продлабочување на соработката за клучните прашања од областа на животна средина од значење на двете страни.
– Како главни точки за кои е потребна понатамошен заеднички ангажман беа издвоени управувањето со речниот слив на реката Вардар, како и менаџментот на Дојранското и Преспанското Езеро, како и прашања врзани со заедничката енергетска и климатска политика. Министрите се согласија да се заложат за воспоставување на заедничка експертска работна група која ќе ги разработи подетално активностите со кои ќе се унапреди соработката и менаџирањето со предметните водни ресурси, истакнал Нуредини.
Исто така, Нуредини остварил средба со министерот за животна средина и просторно планирање на Република Словенија Симон Заиц, со кого разговарале за соработка во областа на управувањето со отпадот и заштитата на природата.
Министеррот за животна средина се сретнал и со новоназначениот генерален директор на Меѓународна агенција за атомска енергија – ИАЕА Рафаел Гроси, генералниот директор на УНИДО Ли Јпнг, како и со амбадорот Кире Илоски, директор на Економска комусија за Европа на Обединетите Нации – УНЕЦЕ. Тие дискутирале, како што посочуваат, за начините за зајакнување на соработката со нашата држава. Меѓу другото зборуваа и за проектните активности кои во моментот се спроведуваат во Македонија, а особено за оние поврзани со отстранувањето на линданот во Охис и за енергетската ефикасност на индустријата.
Покрај во официјалниот сегмент, министерот за животна средина Нуредини учествувал и во дел од настаните во придружната програма, меѓу кои и настанот на високо ниво на „Action for Climate Empowerment" (ACE), состанокот во рамките на коалицијата на министри за финансии за лансирање на акцискиот план Сантијаго за 2020 (во функција на иницијативата на МЖСПП за пристапување кон партнерството за национални придонеси), лансирањето на извештајот на Обединетото кралство на темата „Забрзување на нискојагледорната транзиција", како и настанот во организација на ЕУ и УНЕСКО, а посветен на ефектите на климатските промени врз природното и културното наследство. /МИА