Македонија

Мицкоски и Филипче во отворен судир за еврпската перспектива

Додека Брисел го држи проширувањето високо на својата агенда, Македонија останува надвор од европската мапа поради погрешните политики на Владата на ВМРО ДПМНЕ, обвини претседателот на СДСМ Венко Филипче.

Во пресрет на т.н „супер вторник“ на 14 јули кога како што потврди ирското претседателство со Унијата, Украина и Молдавија ќе отворат по еден, а Албанија и Црна Гора ќе затворат по неколку кластери од преговорите, Филипче предупредува дека државата останува на страна токму во момент кога поддршката за земјите-кандидати е најсилна.

-Со конкретни чекори Европската Унија кажува дека проширувањето е високо на листата на приоритети во нивната агенда. Вчера и од Европската Унија стигна доказ дека ние не постоиме на европската агенда. Очигледно е дека, благодарение на премиерот Христијан Мицкоски и ВМРО-ДПМНЕ, ние на тој пат повеќе не сме. Наместо да се спроведуваат реформите, наместо да се чекори напред кон Европската Унија, сега, кога очигледно вратите се отворени како никогаш досега и кога никогаш досега земјите-кандидати немале поголема поддршка да станат земји-членки на Европската Унија, ние остануваме на страна. – Венко Филипче – Претседател на СДСМ

Премиерот Христијан Мицкоски пак порача дека земјава ќе продолжи со реформите но нема да прифати безусловна промена на Уставот според условите од претходната власт. Тој нагласи дека Владата останува отворена за дијалог и барање компромисно решение, но отфрла можност за, како што рече, „капитулација“.

-Го покажавме и во декемврискиот извештај а ќе покажеме и сега во јунскиот извештај дека ние сме во суштина најнапредната држава во регионот кога станува збор за испорака на реформи. За мене промена на Устав и прифаќање на тоа што прифатила претходната Влада не е реформа. Нашиот став е јасен и прецизен. Граѓаните од лидерството во македонската Влада очекуваат да го заштити македонскиот национален идентите и ние тоа го правиме и нема цена, но безусловно потпис да ставам на нешто што прифатила претходната Влада или т.н капитулација додека сум јас ова што сум, тоа нема да го направам. – Христијан Мицкоски – Претседател на Влада

Инаку проширувањето на ЕУ и европската перспектива на Западен Балкан беше во фокусот на дискусиите во Рим на состанокот на министрите за надворешни работи на Групата „Пријатели на Западен Балкан“, каде се слушнаа и пораки дека е нефер Украина да биде ставена на брза лента на сметка на Западен Балкан.

-За Италија односите со Западен Балкан се политички приоритет, за нас е од клучно значење да се работи напорно да се отвори патот за целосно членство на земјите од Западен Балкан. Ние сме за членство на Украина, но претходно тука е Западен Балкан, затоа што ќе биде голема грешка да ја згубите средбата со Европската Унија. – Антонио Тајани - Министер за надворешни работи на Италија

Пристапниот процес за Македонија останува блокиран. Еврокомесарката за проширување Марта Кос, при посетата на Скопје порача дека ниту една земја кандидат никогаш не добила гаранција дека во текот на пристапувањето нема да се појави нов спор. Таа нагласи дека проширувањето функционира преку исполнување на преземените обврски и градење доверба меѓу кандидатите и земјите членки.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Црна хроника

Три лица лишени од слобода за семејно насилство во изминатото деноноќие

Три лица лишени од слобода, вкупно четири пријави за семејно насилство во изминатото деноноќие

Ноќеска (11.07.2026) во 01:20 часот во струмичко село полициски службеници од СВР Струмица лишија од слобода 49-годишен жител од тоа село. Според пријавеното тој на 10.07.2026 околу 22:30 часот во семејниот дом физички го нападнал неговиот 68-годишен татко и му нанел повреди. Лицето е задржано во Полициската станица Струмица, а за настанот е известен јавен обвинител од Основното јавно обвинителство Струмица. По документирање на случајот против него ќе биде поднесена соодветна пријава.

На 10.07.2026 во 20:40 часот полициски службеници од СВР Куманово го лишија од слобода Ч.С.(49) од кумановско затоа што физички ја нападнал неговата 33-годишна сопруга. Тој бил приведен во полициска станица и по целосно документирање на случајот против него ќе следува соодветна пријава.

На 11.07.2026 во 00:10 часот во Полициската станица Тетово, 54-годишна жена од Тетово пријави дека на 10.07.2026 околу 21:00 часот во нивниот семеен дом, по претходна расправија за пари, нејзиниот син К.В. физички ја нападнал, нанесувајќи ѝ повреди. На оштетената ѝ била укажана лекарска помош во Клиничката болница Тетово. Се преземаат мерки за пронаоѓање на сторителот и расчистување на случајот.

На 11.07.2026 во 00:20 часот, во СВР Охрид лишена од слобода е Е.В.(36) од охридско која претходно, во семејниот дом, физички ја нападнала својата мајка. По целосно документирање на настанот, против неа ќе биде поднесена соодветна пријава.

Тагови: семејно насилство

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Свет

Шпанските спасувачи трагаат по 23 исчезнати во пожарот кој однесе 12 жртви

Шпанските спасувачи трагаат по најмалку 23 исчезнати во големиот шумски пожар во шпанскиот регион Андалузија, во кој досега загинаа 12 лица.

Пожарот сè уште се шири поради неповолните временски услови и тешките временски услови, а досега зафати околу 4.000 хектари вегетација. Во битката со огнот, учествуваат повеќе од 500 служби за итни случаи, со поддршка на 32 авиона. Илјадници жители се евакуирани од погодените области, а повеќе од 1.400 луѓе моментално се наоѓаат во привремени засолништа првичните истраги покажуваат дека паднат далновод бил причина за пожарот. Властите стравуваат дека пожарот би можел да стане еден од најсмртоносните во Андалузија и еден од најкатастрофалните во Шпанија во последните децении.

Тагови: пожар

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

Сиљановска-Давкова им додели сертификати на учесниците на „Охрид камп за високо-технолошка извонредност“

Претседателката Гордана Сиљановска-Давкова денеска присуствуваше на затворањето на шестиот „Охрид камп за високо-технолошка извонредност“, што се одржува под нејзино покровителство, а во организација на „Македонија 2025“.

Таа оцени дека ваквите иницијативи не само што придонесуваат за стекнување напредни знаења и вештини во областа на роботиката, програмирањето, инженерството и иновациите, туку ги подготвуваат младите да бидат активни актери во обликувањето на иднината, наместо пасивни набљудувачи на промените.

Според неа, особено важно е младите да размислуваат критички, да создаваат иновативни решенија и да ги користат современите технологии како средство за општествен напредок, одржлив развој и подобар квалитет на животот.

Сиљановска-Давкова порача дека талентот треба да се препознава, негува, стимулира и наградува, а младите да ги „инфицираат“ и другите околу себе со љубов кон знаењето и науката.

Потсетувајќи на роботот Протеус, кој се свртел против својот творец, таа нагласи дека човештвото мора мудро да се однесува кон новите технологии, оти тие треба да останат во служба на човекот, а не да станат причина за губење на човечката димензија.

Учесниците ги споделија своите искуства од кампот, истакнувајќи дека програмата им овозможила да стекнат нови знаења и вештини, да работат на иновативни проекти и да воспостават пријателства со врсници од различни земји.

Тие ги презентираа проектите изработени за време на кампот, по што претседателката, во својство на покровителка, им ги врачи сертификатите за успешно завршување на програмата.

Годинава, кампот обедини 24 млади на возраст од 11 до 15 години од македонската дијаспора во САД, Малта, Србија, ОАЕ, Германија и од неколку градови низ државата.

Тагови: Гордана Сиљановска-Давкова

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.