Култура

Македонскиот филм „Игра и спас“ на фестивал во Нови Сад

На 13 декември македонскиот кусометражен игран филм „Игра и спас“ во режија на Горан Тренчовски, како единствен селектиран од нашава земја, ќе се прикаже во Нови Сад, на интернационалниот фестивал „Shortz“, во тематската селекција “Мала продавница на социјални стравувања“. Филмот беше поддржан од Филмскиот фонд на Македонија, a е во продукција на „Револушн“ од Скопје и во изминативе месеци е прикажуван на десетина фестивал од регионов и во земјава.

Дејствието всушност се случува пред и по последните немири на векот, во филмска иконографија на еден фикционален свет составен од интимистички и хиперреални секвенци од животот на еден младич од периферијата.

Глигор, навраќајќи се на драматичните сцени од своето минато, кога славата и возбудата биле едиствената поткрепа за верба во времето што наближува - од пукотливите игри за стрeлање птици, од нежните мигови со Марија, од туѓиот подбив и од бесмислените херојства - конечно на крајот излегува од тој апсурден обрач, како нов, пречистен и преобразен човек, посветен кон родното огниште и Божјото спасение.

„Игра и спас“ трае 15 минути и негов лајтмотив е подигрувањето, вечната игра помеѓу животот и смртта раскажана низ она што е помеѓу.

Главните улоги ги толкуваат младите Коста Ангов, надежен актер кој дипломирал актерство во Бугарија и фотогеничната Мартина Тапарчевска која има завршено актерство на ФДУ во Скопје. Покрај нив, во споредните улоги настапуваат актерите Салаетин Билал (Таткото), Зора Ѓоргиева (Мајката) и Дине Дрваров (Соседот). Во филмот учествуваат и повеќе статисти и натуршчици. Филмот е снимен минатата година на автентични локации на Суви Лаки, Преведена и Хамзали – сите во Источна Македонија, недалеку од Струмица, при што за првпат се откриваат некои импресивни природни филмски екстериери.

Продуцент е Дејан Милошевски, сценарист е писателот Васе Манчев, директор на фотографија Слаѓан Милошевски, монтажер Аристид Филактов, тон мајстор Виктор Иванов, костимите се на Томе Филев и Ѓорги К’рм’зов а оригиналната музика ја компонираше Драган Даутовски.
За неполни осум месеци, филмот е прикажан на десетина фестивали и манифестации во Македонија и странство.

Филмот имаше премиера на 6 април, како единствен македонски филм кој беше селектиран на јубилејниот 60-ти престижен Белградски фестивал кој е најстариот балкански фестивал на краток филм и еден од најетаблираните во светот. Исто така, тој беше прикажан на фестивалот на Југоисточна Европа во Париз, како и на фестивалите „Гледам Бог“ во Москва и „Other Movie“ во Лугано. За филмот веќе се заинтересирани повеќе странски дистрибутери, така што тој следниот период ќе се прикажува на повеќе дестинации во Европа и САД.

Карактеристично за „Игра и спас“ е тоа што тој е еден од ретките кој има своја побарувачка од страна на публиката низ повеќе градови низ Македонија (Крива Паланка – на манифестацијата „Град на културата“, Штип – на „УГД-Сцена“, Битола – на фестивалот „Браќа Манаки“, Струмица – на „Струмица Опен Фест“), што е реткост кога станува збор за кратката филмска форма.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Култура

Премиера на „Татко“ на НУ Народен театар Битола за Денот на ослободувањето на градот

Премиера на “Татко“, 12. издание на Битола Шекспир фестивалот и подготовки на претставата „Ни треба пејачка“ за месец ноември во НУ Народен театар Битола.

Народниот театар Битола во текот на месец ноември реализира неколку значајни програмски активности, кои имаат особено значење за културниот живот на градот, но и за меѓународната афирмација на македонското театарско творештво.

На 10 и 11 ноември 2026 година, Народниот театар Битола ќе ја има својата најнова премиера – „Татко“ од Август Стриндберг, во режија на Благој Мицевски. Претставата е дел од официјалната програма на Општина Битола по повод одбележувањето на 4 Ноември – Денот на ослободувањето на градот Битола. Со оваа премиерна изведба, театарот дава свој придонес кон одбележувањето на еден од најзначајните датуми во историјата на градот.

Освен режијата, Мицевски стои и зад сценографијата и костимите. Во претставата работена по делото на Август Стриндберг играат: Петар Горко, Катерина Аневска-Дранговска, Сандра Грибовска Илиевска, Никола Пројчевски, Живко Борисовски, Соња Михајлова.

Асистент на режија е Дамјан Димовски, композитор Марјан Нечак, тон Александар Димовски, светло Горан Петровски, суфлер Гордана Михајловска, реквизит Цветан Јовановски, испициент Оливер Петровски.

Се работи за длабоко потресна психолошка драма за распадот на интимноста, осаменоста, недовербата и кревките граници на моќта во семејството. Каде исчезнува љубовта кога меѓусебното разбирање ќе го заменат сомнежот и борбата за надмоќ? И колку далеку може да оди човекот кога ќе се соочи со сопствената ранливост?

Преку ова безвременско драмско дело, режисерот Благој Мицевски ги отвора прашањата за односот меѓу мажот и жената, за семејните односи и за трагедијата на човекот кој постепено го губи тлото под нозете.

Што се случува со човекот кога ќе остари? Кога љубовта ќе се претвори во борба за моќ, а бракот во бојно поле на кое детето станува најневината жртва?

Особено значаен датум за НУ Народен театар Битола е и 14 ноември, кога се одбележуваат 82 години од постоењето на оваа институција. Овој значаен јубилеј ќе биде одбележан со свеченото отворање на 12. издание на Битола Шекспир фестивалот, кој годинава ќе започне со претставата „Кориолан“ од Вилијам Шекспир, која токму на отворањето на фестивалот ќе ја има својата прва премиерна изведба во матичната куќа.

Годинашното издание на фестивалот ќе го збогатат театарски продукции и учесници од Италија, Ерменија, Соединетите Американски Држави, Романија, Грузија и Малта. Присуството на театри и уметници од шест држави уште еднаш ја потврдува меѓународната позиционираност на Битола Шекспир фестивалот и неговото значење како релевантна меѓународна театарска платформа, која ја поставува Битола на светската театарска мапа. Воедно се подготвува и претставата „Ни треба пејачка“ во режија на Ненад Витанов.

Со овие активности, Народниот театар Битола продолжува да ја исполнува својата мисија во развојот и промоцијата на театарската уметност, негувањето на домашното творештво и воспоставувањето меѓународни културни соработки, истовремено потврдувајќи ја својата улога како значаен културен чинител во земјата и пошироко.

НУ Народен театар Битола

Тагови: НУ Народен театар – Битола

Автомобилизам

Ова е германскиот автомобил на годината – дали се согласувате со изборот?

Наградата „Германски автомобил на годината“ (GCOTY) ја освои едно електрично возило – „Volkswagen ID. Polo“.

Електричниот наследник на многу омилениот модел „Polo“ најпрво победи во категоријата „Буџет“ (за автомобили со цена под 25.000 евра), а потоа ја однесе и главната победа.

Без да навлегуваме во тоа дали можеби имало некаква пристрасност во процесот на избор, со оглед на тоа што станува збор за германски бренд, вреди да се напомене дека жирито се состоело од 47 германски и меѓународни автомобилски новинари. Понатаму, во финалниот круг, „ID. Polo“ ги надмина моделите „Kia PV5“, „Mercedes-Benz GLC“, „Xpeng X9“ и „Hyundai Ioniq 6 N“.

Томас Шефер, извршен директор на „Volkswagen“, изјави дека „ID. Polo ја носи електричната мобилност таму каде што таа може да има најголемо влијание – во секојдневниот живот на луѓето“.

Андреас Миндт, шефот за дизајн во „Volkswagen“, исто така ја коментираше наградата. Пишувајќи на „Instagram“ за „ID. Polo“, тој истакна дека „сакале да создадат вистински „Volkswagen“ – автомобил со јасен дизајн, препознатлив идентитет и карактер“.

View this post on Instagram

A post shared by Andreas Mindt (@andymindtofficial)

Што се однесува до останатите победници по категории, листата е следна:

• Компактни (25.000 € – 40.000 €) – „Kia PV5“

• Премиум (40.000 € – 70.000 €) – „Mercedes-Benz GLC“

• Луксузни (над 70.000 €) – „Xpeng X9“

• Перформанси – „Hyundai Ioniq 6 N“

Специјални категории

• Најдобар однос цена-квалитет – „Geely E2“

• Најдобар дизајн на екстериерот – „Renault Twingo“

• Најдобар ентериер – „BMW iX3“

• Најдобар погонски систем – „Porsche 911 Turbo S“

• Семеен автомобил – „Škoda Peaq“

Наградата за личност на годината во индустријата за 2027 година му припадна на Клаус Зелмер, првиот човек на „Škoda“.

Извор: Б92

Тагови: автомобил на годината

Фудбал

ФИФА тестираше три нови правила, аут со нога,....

На премиерното Светско првенство и фестивал за играчи до 15 години, ФИФА тестираше три експериментални правила.

Натпреварите се играа со неограничен број замени, аутите се изведуваа со шутирање на топката, а прекршоците за офсајд се досудуваа само во зоната од 14 ментри пред голот.

Турнирот се одржа во Баку од 24 до 30 октомври, со учество на 189 екипи од сите шест конфедерации.

Титулата во највисоката „Категорија А“ ѝ припадна на Шпанија, која во финалето на 30 октомври ја совлада Чешка со 3–0. Во текот на една недела беа одиграни 932 натпревари, при што беа постигнати вкупно 4.505 голови – просек од 4,83 по натпревар.

На натпреварот со најмногу погодоци беа постигнати 21 гол.

Игра со осум играчи во поле и неограничени замени.

Целта на ФИФА беше да се овозможи динамична игра со многу напаѓачки акции, па затоа натпреварите се играа со осум играчи во секој тим и со неограничен број замени, со што се укина претходното ограничување од пет замени.

Ова им овозможи на тренерите почесто да ги ротираат играчите и да управуваат со нивното физичко оптоварување, истовремено давајќи им можност за настап на поголем број членови од тимот. Натпреварите се одвиваа на помали терени, со димензии 68 на 47 метри, при што се користеа голови со стандардни димензии.

Наместо да се уфрла со раце, топката се враќаше во игра со нозе. Со ова, ФИФА имаше за цел да го забрза продолжувањето на играта и да им овозможи на младите играчи повеќе допири со топката, како и повеќе можности за развој на нивната техника. Исто така, беше променето и правилото за офсајд: играчот можеше да се најде во офсајд само откако ќе влезеше во одредена зона, која започнуваше на 14 метри од голот на противникот.

„На оваа возраст, играњето е најважното нешто. На младите играчи им се потребни значајни натпревари, различни противници и разновидни фудбалски искуства за да напредуваат. Талент има насекаде, но можностите за младите не се секогаш еднакви. Овој турнир им дава шанса на играчи од целиот свет да се натпреваруваат, да учат и да се развиваат“, изјави Арсен Венгер, шеф на ФИФА за глобален развој на фудбалот.

Венгер додаде дека ФИФА сака да осигури секој талентиран играч да биде забележан, да добие можности за тренинг и играње, и на тој начин да може да го достигне својот полн потенцијал. На турнирот учествуваа играчи родени во 2011 и 2012 година. Натпреварите се состоеја од две полувремиња по 20 минути, а секој тим имаше право да пријави 14 играчи и до шест членови на стручниот штаб.

Тагови: ФИФА