Европа

Лидерите на ЕУ постигнаа договор за финансирањето на Украина преку задолжување на блокот

Шефовите на држави или влади на членките на ЕУ во рамки на вчера започнатиот Самит рано изутринава постигнаа договор за начинот на финансирање на Украина за 2026 и 2027 година преку кредит .

Шефовите на држави или влади на членките на ЕУ во рамки на вчера започнатиот Самит рано изутринава постигнаа договор за начинот на финансирање на Украина за 2026 и 2027 година преку кредит за кој средства ќе бидат обезбедени врз основа на задолжување на Унијата на пазарите на капитал, поддржано од нејзиниот долгорочен буџет.

- Имаме договор. Одлуката за обезбедување поддршка од 90 милијарди евра за Украина за 2026-27 година е одобрена. Се обврзавме, исполнивме, наведе претседателот на Европскиот совет, Антонио Кошта во објава на Икс нешто пред 3 часот.

Со договорот се предвидува Украина да го врати кредитот, дури откако Русија ќе и исплати репарации за предизвиканите штети за време на инвазијата, додека во исто време ЕУ го задржува правото на користење на замрзнатите руски средства за финансирање на заемот.

Дополнително, со договорот лидерите ѝ даваат мандат на Комисијата „да продолжи да работи на заемот за репарација врз основа на замрзнатите руски средства“.

За да се избегне евентуална блокада од Словачка, Унгарија или Чешка, кои изразуваат противење на дополнително задолжување на ЕУ, со договорот се предвидува дека „секое мобилизирање на ресурси од буџетот на Унијата како гаранција за овој заем, нема да има влијание врз финансиските обврски“ на трите земји.

Бриселските медиуми веќе оценија дека овој договор претставува пораз за претседателката на Европската комисија, Урсула фон дер Лајен и германскиот канцелар Фридрих Мерц, кои беа најжестоки приврзаници на планот за т.н. заем за репарации за Украина, за чија исплата би биле користени замрзнатите руски средства во ЕУ.

На прес-конференцијата по завршувањето на Самитот, Кошта изјави дека целта на ЕУ со ваквиот договор не е продолжување на војната во Украина, туку дека тој дава клучен придонес за постигнување праведен и траен мир.

- Бидејќи единствениот начин да се донесе Русија на преговарачката маса е зајакнување на Украина, денешната одлука ќе ѝ ги обезбеди на Украина потребните средства за да се одбрани и да го поддржи украинскиот народ, изјави Кошта на заедничката прес-конференција со Фон дер Лајен и данската премиерка Мете Фредериксен, чија земја е актуелен претседавач со Советот на ЕУ.

Според Кошта, со постигнатиот договор се испраќа кристално јасна порака до Москва дека не успеала да ги постигне своите цели во Украина, дека Европа стои зад Киев – денес, утре и онолку колку што е потребно и дека Русија мора да седне на преговарачката маса на сериозен начин и да прифати дека нема да ја добие оваа војна.

- Единствениот пат напред е прекин на огнот и договорен мир. Нашата политичка и финансиска поддршка за Украина нема да се намали: во војна, во мир и во обнова. Ние сме посветени на градење слободна и просперитетна Украина во рамките на Европската Унија, додаде Кошта.

Запрашана за коментар за неуспехот на нејзиниот план за заемот за репарации и дали е разочарана поради тоа, Фон дер Лајен рече дека Унијата имала многу јасна цел да обезбеди финансирање за Украина и ако Комисијата не го предложела тој план, претпоставува дека земјите членки ќе немале храброст или политички моментум за трајно да ги замрзнат руските средства.

- Тоа е големата победа. Со тоа, нивното замрзнување е трајно обезбедено и тие можат повторно да бидат деблокирани само со одлука со квалификувано мнозинство. Тоа беше најважниот дел, додаде Фон дер Лајен.

Таа нагласи дека сите лидери споделуваат јасна цел за праведен и траен мир за Украина и тоа ќе може да се постигне со денеска постигнатиот договор за покривање на финансиските потреби на Украина за следните две години.

Фредериксен истакна дека постигнатиот договор за „стабилно финансирање“ за Украина, во основа претставува комбинација на двете опции што ги понуди Европската комисија – дополнително задолжување и користење на замрзнатите руски средства.

- Со ова нашата поддршка за Украина е загарантирана. Тоа е важно од повеќе причини. Пред сè затоа што ние ја гледаме Украина како наша прва линија на одбраната, а во исто време и затоа што мора да се вооружиме и мора да ја гарантираме безбедност за секој европски граѓанин, додаде Фредериксен.

Инаку, и на овој Самит, како и на неколку претходни, не беше постигнат консензус за усвојување предложените заклучоци за Украина, кои, како што соопшти Европскиот совет. биле „цврсто поддржан од 25 шефови на држави или влади“.

Конечниот договор беше постигнат по повеќечасовна дебата меѓу лидерите, во еден момент дури и сами и без мобилни телефони, откако претходно пропадна предлогот за исплата на кредит на Украина, исто така во износ од 90 милијарди евра, но обезбеден од замрзнатите руски средства.

Со овој предлог се предвидуваше и „целосна (и неограничена) солидарност и поделба на ризикот од Европската Унија и нејзините земји членки со погодените земји членки и финансиските институции во ЕУ, во контекст на заемот за репарација“.

[Како одминува времето, растат шансите дека лидерите ќе донесат одлука за одобрување на планот за заемот за репарации, кој предвидува користење на замрзнатите руски средства во ЕУ за покривање]

Извори запознати со текот на преговорите посочија дека во овој предлог биле вклучени многу од основните барање на белгискиот премиер Барт де Вевер, на кои тој инсистираше за да се согласи на прифаќање на заемот за репарации.

Сепак, според истите извори, Де Вевер, кој цело време конструктивно учествувал во дебатата, за поддршка на предлогот барал „неограничени финансиски гаранции“. Според неговото толкување, „неограничени“ би значело дека останатите земји членки ќе се обврзат во случај на потреба да и надоместат на Белгија неограничен износ на пари, чија сума би можела да биде поголема и од износот на самиот заем за репарации, кој се предвидуваше да достигне до 210 милијарди евра.

На ваквиот предлог меѓутоа забелешки имале неколку други земји, вклучително и дел од поголемите, кои оцениле дека тој „оди предалеку“ во прифаќањето на барањата на кои инсистира Белгија, каде се наоѓаат најголемиот дел од замрзнатите руски средства или околу 185 милијарди евра.

Дел од овие земји нагласиле дека за да се согласат на предлогот тој треба да претрпи „суштински промени“. Тие оцениле и дека барањето на Белгија за „неограничени финансиски гаранции“ е претерано, потенцирајќи дека тоа би значело дека останатите земји членки би требало своите буџети да ги претворат во „бунар без дно, од кој Белгија ќе може да црпи колку сака“.

Инаку, за „закрепнување“ на лидерите во текот на долгите ноќни преговори, Данска во својство на актуелен претседавач со ЕУ, на располагање им ставила закуска составена од сендвичи со риба, свинско филе и пудинг од ориз.

Тагови: ЕУ фондови украина

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

Малолетник со убодна рана донесен во болница, тврди дека бил повреден при игра

15 годишник со убодна рана во градниот кош ноќеска бил донесен во Градската болница Св. Наум Охридски во Скопје.

Од МВР информираат дека во еден часот и 12 минути по полноќ од болницата било пријавено дека кај нив со повреди од остар предмет на градниот кош бил донесен 15-годишник од Скопје.

Во разговор со полициски службеници тој изјавил дека бил повреден во населбата Гази Баба од малолетник кој го познавал, но дека бил повреден при игра без намера да се случи повредата.. Полицијата презема мерки за расчистување на овој случај.

Живот

Спектакуларна свадба на соработничка на Трамп на грчкиот остров Миконос- подготовките траеле две години (ВИДЕО)

Раскошната свадбена прослава во бајковита атмосфера, организирана од соработничката на Доналд Трамп, родена во Грција и директорка на Канцеларијата за посетители на Белата куќа, Александра Велечи, на Миконос имаше сè.

Раскошната свадбена прослава во бајковита атмосфера, организирана од соработничката на Доналд Трамп, родена во Грција и директорка на Канцеларијата за посетители на Белата куќа, Александра Велечи, на Миконос имаше сè - од вечера за добредојде во Интерини до забава на плажа во Скорпиос, објави грчкиот портал Њумани.

Тоа беше свадбата што целата елита собрана околу Белата куќа, па и пошироко, ја чекаше. Александра Велечи, блиска соработничка на американскиот претседател Доналд Трамп, се омажи минатата недела за својот избраник, Метју Гуарино, кој работи во банкарскиот и финансискиот сектор.

Свадба од соништата

Постојат свадби кои се планирани околу еден датум, а има и такви кои градат цел свет. Свадбата на Александра и Мет на Миконос беше токму тоа.

Подготовките започнаа во 2024 година, со една јасна желба. Не само да се одржи свадбата на еден од најкосмополитските острови во светот, туку и да им се пренесе на гостите вистинското чувство на грчко лето.

Александра, директорката на Канцеларијата за посетители на Белата куќа, која секоја година се враќа на Миконос, сакаше да сподели со луѓето што ги сака начинот на кој го доживува островот: слободна, светла, безгрижна и полна со живот.

Двојката размени завети за вечна љубов во црквата Свети Харалампиос, под ветерниците на Алефкандра, додека околу 200 влијателни гости од Соединетите Американски Држави уживаа во единствената сцена.

Фантазмагоричната свадбена вечера, дизајнирана и реализирана од The Event Company, компанија позната по бројни меѓународни проекти, беше исто така единствена. Креативниот правец е сумиран во една реченица: „Секси риба се среќава со Миконос“. Тоа беше комбинација од експлозивната, театарска естетика на ресторанот „Секси риба“ и елеганцијата на Егејското Море . Резултатот не беше ниту тематска забава ниту верна реплика на Миконос. Тоа беше сосема ново искуство за дестинација, дизајнирано исклучиво за оние малкумина избрани луѓе кои ќе го доживеат.

Речиси една недела, изнајмена приватна вила во Калафатис беше трансформирана во живо градилиште. Од празно платно, се роди цел микрокосмос. Беа изградени специјални подови, патеки, перголи и архитектонски инсталации, додека десетици парчиња мебел по нарачка беа дизајнирани и изработени исклучиво за оваа свадба. Секој агол имаше различен допир, секоја патека водеше кон ново искуство, а секој простор откриваше различна верзија на Миконос.

Ништо не беше избрано случајно. Материјалите патуваа од Соединетите Американски Држави за да се спојат со грчките ракотворби, создавајќи дијалог помеѓу меѓународната естетика и грчкото занаетчиство. Продукцијата не застана само на декорацијата; беше замислена како сеопфатно просторно искуство.

Морето беше главен протагонист. Школки, морски ежови, камен, октоподи и препознатливиот миконски пеликан дискретно се појавуваа по целата рута по која се движеа гостите, создавајќи заедничка наративна нишка што го поврзуваше секој простор од настанот. Скулптурален бар во форма на октопод, чии пипала се ширеа низ целиот простор, стана највпечатлив детаљ на вечерта. Коктелите со препознатлив карактер беа послужени во различни тематски чаши инспирирани од школки, додека секоја маса имаше свој визуелен идентитет во боја, комбинирајќи ја сината и белата боја на Егејското Море со жолта, фуксија, портокалова и розова боја. Бугенвилиите, перголите и десетици различни ламби што лебдеа над масите создаваа чувство на летна ноќ во уличките на Миконос.

Подароците за гостите (кутии со чоколадо) беа изработени ексклузивно за двојката во позната грнчарска работилница на Парос. Инспирирани од морски еж, тие ги сокриле иницијалите на Александра и Мет внатре, суптилен пример за грчко занаетчиство. Искуството, сепак, не беше само во дизајнот. Тоа беше континуирана низа моменти. Гостите беа пречекани од гатач, додека бутикот во вилата нудеше колекционерски предмети - капи, костими за капење, торби за плажа и маички со препознатливиот амблем на пеликанот - а тезгите со храна доцна во ноќта ја одржуваа енергијата до раните утрински часови.

Музичката програма го следеше примерот. Седрик Жервејс и диџеј Бето го презедоа меѓународниот музички идентитет на вечерта, додека блискиот пријател на Александра, диџеј Андреас, им подари на гостите автентичен грчки момент, со песни што го претворија подиумот за танцување во летна забава.

Три дена прослава

Прославата траеше неколку дена и се одржа на некои од најпознатите локации во Миконос. Се започна со вечера за добредојде во Интерни, продолжи со забава на плажа во Скорпиос, кулминираше со самата свадба и заврши со собири во Принципоте. На денот на свадбата, гостите прво присуствуваа на прием покрај базенот, потоа беа однесени во просторијата за вечера, а потоа на забавата, која прерасна во прослава доцна во ноќта до изгрејсонце, кога последните гости ја пречекаа првата дневна светлина над Егејското Море.

Тагови: Миконос свадба

Свет

Куба го враќа ударот: Формирале тајна мрежа на шпиони и активисти на универзитетите во САД

Куба со децении водеше тајна кампања на инфилтрација во Соединетите Држави преку шпионажа и идеолошко влијание, според новиот извештај на Стејт департментот во кој Хавана се нарекува „главен град на комунизмот од 21 век“.

Државниот секретар на САД, Марко Рубио, рече дека извештајот има за цел да го разоткрие она што тој го опиша како децениска кампања на Хавана против Соединетите Држави.

„Повеќе од шест децении, кубанскиот режим е водечки спонзор на радикалната левица и третосветството во Соединетите Држави“, напиша Рубио на платформата за социјални медиуми X.

„Стејт департментот ја разоткрива целата историја на кубанската шпионажа и субверзивните активности во нашата земја. Американскиот народ заслужува да знае.“

Кубанскиот министер за надворешни работи, Бруно Родригез Париља, го отфрли извештајот како политичка пропаганда.

Во изјава објавена на социјалната мрежа X, Родригез го нарече извештајот „најнова измислица“ од Стејт департментот за Куба и ја обвини администрацијата на претседателот Доналд Трамп дека создава изговор за да продолжи со она што го нарече „сурова и криминална економска војна“ што Вашингтон ја води против островот.

Без да го спомене Рубио по име, тој го обвини „тој американски политичар од Јужна Флорида“ дека смислува „морничав план“ кој им служи само на интересите на „оние кои отсекогаш му плаќале“.

Во извештајот од 100 страници се вели дека кубанската кампања отишла далеку над опсегот на класична шпионажа. Во него се тврди дека Хавана негувала односи со американски активисти, регрутирала шпиони, поддржувала револуционерни движења и изградила врски со универзитети и организации кои претставуваат различни интереси, како дел од долгорочна стратегија за поткопување на интересите на САД и ширење на комунистичката идеологија.

„Речиси седум децении, кубанскиот режим водеше континуирана кампања на субверзија против Соединетите Американски Држави“, се вели во извештајот.

Cuba built covert network inside America through spies, activists and universities, State Dept allegeshttps://t.co/LrUi25E0BR
— BREAKING NEWZ Alert (@MustReadNewz) July 21, 2026

Во него се тврди дека кубанската разузнавачка служба се инфилтрирала во „највисоките нивоа на Стејт департментот, Советот за национална безбедност и Пентагон“ и помогнала во обликувањето на генерации левичарски политички движења.

Во извештајот понатаму се наведува дека Хавана развила децении врски со американски револуционерни и активистички групи, вклучувајќи ги Weather Underground, Black Panthers, Black Liberation Army и порторикански милитантни организации.

Исто така, се тврди дека оваа мрежа подоцна се проширила за да вклучи врски со движењето Антифа, организации кои се спротивставуваат на работата на Службата за имиграција и царина на САД (ICE), социјалистички групи и левичарски непрофитни организации.

The Cuban Communist regime continues to exploit its people and serve as the leading sponsor of radical leftism and political violence in our hemisphere. Today, I designated nine entities and two individuals associated with the dictatorship, including four malign actors profiting…
— Secretary Marco Rubio (@SecRubio) July 23, 2026

Во извештајот се заклучува дека најголемиот успех на Куба не е постигнат преку воена сила, туку преку влијание. Се вели дека комунистичкиот режим изградил меѓународна мрежа од активисти, академици, непрофитни организации и политички движења кои продолжиле да ја шират својата револуционерна идеологија долго по распадот на Советскиот Сојуз.

Извештајот посочува на неколку добро познати случаи на шпионажа, вклучувајќи ги осудените шпиони Виктор Мануел Роча, Ана Белен Монтес, Валтер Кендал Мајерс и членови на мрежата „Оса“.

Исто така, се цитира поранешниот шеф на контраразузнавањето на ЦИА, Џејмс Олсон, кој ја нарече кубанската разузнавачка служба „веројатно најсериозната разузнавачка служба против која некогаш сум работел“ и предупреди:

„Кубанците се инфилтрираа во нашата влада... Ние знаеме само врвот на ледениот брег“.

Во извештајот, исто така, се тврди дека Куба ги гледала американските колеџи и универзитети како центри за регрутирање, идентификувајќи политички симпатизерски студенти кои подоцна би можеле да бидат вработени за влијателни работни места во владата или приватниот сектор. Партнерствата меѓу Универзитетот во Хавана и десетици американски универзитети се посочуваат како примери за она што се опишува како напори за долгорочно влијание.

Исто така, се разгледуваат врските на Куба со револуционерните движења низ Латинска Америка и се тврди дека Хавана им обезбедила засолниште на американски бегалци поврзани со милитантни групи.

Во извештајот се наведуваат организации, вклучувајќи ги Бригадата Венцеремос, ICAP, Националната мрежа за Куба, Демократските социјалисти на Америка, Код Пинк и Националната адвокатска комора, тврдејќи дека тие со децении помогнале во одржувањето на прокубанскиот активизам во Соединетите Држави.

Тагови: куба шпиони