Мицкоски на средбата доаѓа откако пред неколку дена за дел од медиумите посочи дека според него, СЈО не ги исполнило очекувањата, а кажа и дека остануваат на ставот јавниот обвинител да се бира на предлог од опозицијата. Премиерот Заев пак во неколку наврати кажа дека очекува законот за СЈО да биде донесен со консензус.
За носење на новото законско решение со кое се регулира статусот на СЈО потребно е 2/3 мнозинство, за кое од владејачкото мнозинство кажаа дека се уште го немаат обезбедено. Универзитетскиот професор Гордан Калајџиев во емисијата Само Вистина посочи дека предлог законот дава можност за автономија на СЈО.
Со новиот закон се предвидува СЈО во иднина да биде дел од ОЈО, задолжено да гони висок профил на корупција и криминал и да биде надлежно за гонење на избрани или именувани функционери. Оние истраги и предмети за кои ќе нема надлежност ќе ги преземе редовното обвинителство.
Клучната новина во законот е тоа што СЈО ќе добие надлежност да продолжи да ги води и предметите што ги отвори по јуни 2017-та, кои беа оспорени со начелното мислење од Врховниот суд. Но, во овие истраги СЈО нема да може да ги користи бомбите како докази.
Носењето на законот за СЈО ќе влијае и врз текот на преговорите со ЕУ, бидејќи е дел од пакетот реформски закони кои се неопходни за позитивна препорака од ЕК.