Таков допис уште во понеделникот го доставиле до владата, два дена пред препораката на комисијата за заразни болести за 58 часовен викенд карантин за празникот. Во текстот кој на социјалните мрежи го објави реисот Сулејман Реџепи, меѓудругото стои дека тие како верска институција постојат за да им служат на верниците, и додаваат дека ќе ги почитуваат сите препораки за заштита од вирусот. Дополнително, се додава и дека доколку се воведе полициски час, надлежните ќе ја изгубат цела доверба од верниците, во пресрет на предвремените избори.

-Ако се воведе полициски час целиот викенд, тогаш вие како компетентни органи, ќе ја изгубите довербата од сите верници од исламската вероисповед, имајќи предвид дека нашата земја се наоѓа пред одржување на парламентарни избори. Додека ние како верска институција постоиме за да им служиме на верниците и нема да носиме товар над грб за откажување намазот на Фитер Бајрам во џамија. -ИВЗ.

Реџепи на социјалната мрежа фејсбук ги објави и мерките кои треба да се спроведуваат во секоја џамија, од дезинфекција при влез во верските објекти, до одржување соодветна дистанца меѓу верниците. Во образложението на одлуките, стои дека верниците треба утринската молитва да ја направа дома, а за останатите молитви во верските објекти да ги почитуваат препораките. Дополнително, традиционалната централна манифестација за празникот е откажана. Дел од верниците, кои ги анкетиравме, велат дека мерката за викенд карантин не е оправдана и дека, и покрај препораките, сепак ќе ги посетат верските објекти.

За препораката од комисијата се огласија и од опозициската ВМРО-ДПМНЕ. Од партијата велат дека мерката според нив е нелогична, а со неа според нив се нарушуваат човековите права.

-Нелогично е да се најавува дека рестораните ќе работат од вторник, а да е задолжително седење дома за време на целиот продолжен викенд. Со други зборови недела и понеделник за Владата на СДСМ е опасно, а вторникот не е. Според кои критериуми е донесена ваква препорака? ВМРО-ДПМНЕ сметаше дека е престрога мерката и за целосен полициски час за празникот Велигден, и сега кога е празникот Бајрам. На овој начин се нарушуваат човековите слободи и права.- ВМРО-ДПМНЕ.

Во меѓувреме, со став се огласи и лидерот на ДПА, Мендух Тачи, кој предлага Македонија за Рамазан Бајрам да го следи примерот на Турција, која определи четири дневен карантин за празникот.

Иако ние како земја не сме дел од високоразвиените земји и мора да следиме како се однесуваат развиените западни земји. Од друга страна, како муслимани, ние мора да ги следиме и развиените земји кои имаат муслиманско мнозинство, во овој случај да ја земам Турција како пример. Особено ја следев позицијата на турската влада и нивните препораки за намалување на движењето за време на празникот. Мора да бидеме крајно внимателни, пандемијата не помина, вели Тачи

Комисијата за заразни болести, вчера предложи полицискиот час за време на Рамазан Бајрам и Свети Кирил и Методија да започне од 19 часот во сабота и да трае до 5 часот наутро во вторник. Препораката која треба да ја потврди или преиначи Владата, како што појасни министерот Филипче е бидејќи дел од граѓаните не ги почитуваат доволно рестриктивните мерки.