Балкан

Хрватите ги демантираат Србите за опасниот црн пантер: Такво животно не постои

Многу жители од околните места ги вознемири веста дека црн пантер шета на границата меѓу Србија и Хрватска.

Од загрепската зоолошка градина тврдат дека црниот пантер воопшто не постои како вид и дека тоа се претежно јагуари со меланизам, пишува Дневник.хр.

За потсетување, компанијата Војводински шуми и државните служби на Србија ги предупредиле граѓаните на војводинскиот град Апатин, на границата со Хрватска, дека во нивната област е забележан црн пантер и да бидат внимателни. Од компанијата ги информирале граѓаните дека „предаторот е крајно опасен“ и дека треба „да се грижат за себе и за своите соседи“.

„Доколку некој забележи црн пантер, потребно е веднаш да ја извести соодветната полициска станица“, стои во известувањето потпишано од претставникот на шумското стопанство во Сомбор, Срѓан Пеурача.

Весникот „Нов апатинац“ наведува дека во потрагата по пантерот се вклучени сите институции, здруженија и организации, а известени се сите надлежни служби и поединци и подготвени се кафези, мамки и стапици.

„Проблемот е што се работи за голема површина и што има многу храна за пантерот. Има неколку извештаи дека е виден, но освен една матна слика од неговата силуета и стапалки, нема други докази. Сепак , на потерата ѝ се пристапи максимално сериозно“, вели изворот на тој весник.

Новосадскиот весник „Дневник“ пишува дека наводно се работи за животно кое побегнало од заробеништво пред повеќе од една година. Откако во српската јавност осамна веста за појавувањето на црниот пантер, се испостави дека ѕверот првично бил виден дваесет дена порано, но дека никој не сакал јавно да зборува за тоа, поради страв од потсмев.

Весникот пишува дека жителите на соседниот град Сонта го виделе животното и неговите траги. Градовите Апатин и Сонта се опкружени со природниот резерват Горње Подунавље, на источната страна на реката Дунав, која е природна граница меѓу Србија и Хрватска.

Објавено е видео на кое наводно се гледа пантер, а датира од пред 10 месеци.

Петар Сладиќ, жител на селото Сонта, кој го забележал животното од семејството мачки, за Дневник во Нови Сад изјавил дека му е грижа бидејќи неговите деца често сами возат велосипед во околината, во шумата и полињата. Тој вели дека во разговор со еден од тамошните ловџии потврдил дека се работи токму за овој животински вид.

„Преку термални двогледи, кои даваат малку изменета слика, овој ловец здогледал животно кое било многу поголемо од волк, кое исто така го нема на нашите простори, но со многу долга опашка која го карактеризира овој тип мачки, па затоа и не се сомнева дека станува збор, во најмала рака, за животно кое не е од нашето подрачје“, изјавил Петар.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Забава

Видео: Дали ова е најбизарниот спорт во светот? Натпреварувачки се удираат по задникот

Натпреварувачки се удираат по задникот, дали е ова најбизарниот спорт?.

Ако мислевте дека сте ги виделе сите можни боречки спортови, Романците најдоа начин да ги изненадат сите. Промоцијата RXF организира натпревар наречен „Booty Slap“, во кој жените се удираат со дланка по задникот.

Форматот е прилично едноставен. Две натпреварувачки стојат една спроти друга и наизменично упатуваат силни шлаканици со отворена дланка по задникот на противничката.

Според тековните правила на RXF, дуелот се состои од вкупно десет шлаканици, а победничката се одредува врз основа на силината на ударот – односно штетата што ја предизвикуваат ударите.

🍑 Romania has butt-slapping competitions Romanian promotion RXF even has a separate discipline called Booty Slap: contestants take turns slapping each other on the butt, with the winner decided by the force and effect of the hits. So… where do you sign up to be a judge?
— NEXTA (@nexta_tv) September 16, 2026

Натпреварувачките мора да имаат најмалку 18 години, а пред мечот нанесуваат специјална супстанца на рацете за да го максимизираат ефектот на шлаканиците. За разлика од класичниот „Power Slap“, целта овде не е да се нокаутира противничката со удар во главата.

Наместо тоа, натпреварувачките се стремат да зададат што е можно посилна шлаканица, принудувајќи ја ривалката да изгуби рамнотежа или едноставно оневозможувајќи ја да ја издржи болката.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Шоу биз

Бред Пит ја „загубил“ девојката на свадбата на Тејлор Свифт

Еден од најголемите заводници во Холивуд, актерската ѕвезда Бред Пит откри дека за време на спектакуларната свадба на Тејлор Свифт и Тревис Келси накратко ја изгубил од вид својата девојка, Инес де Рамон.

Еден од најголемите заводници во Холивуд, актерската ѕвезда Бред Пит откри дека за време на спектакуларната свадба на Тејлор Свифт и Тревис Келси – настан одржан на 3 јули во њујоршкиот „Медисон Сквер Гарден“, кој тој го опиша како „свадба на векот“ – накратко ја изгубил од вид својата девојка, Инес де Рамон, на преполниот подиум за танцување.

„Тоа беше неверојатна ноќ“ .

Говорејќи на премиерата на филмот *Heart of the Beast*, актерот раскажа дека тој и Инес поминале „10, можеби 12 часа“ на свадбата, на која присуствувале околу 1.000 гости, истакнувајќи дека тоа била „неверојатна ноќ“.

Поради правилото што им забранувало на гостите да ги користат своите телефони, Пит рече дека накратко ја изгубил Инес од вид во гужвата на подиумот, но брзо ја пронашол со помош на другите гости, додавајќи дека целата прослава била внимателно испланирана, емотивна и многу забавна.

Двојката, која е заедно од 2022 година, ја официјализираше својата врска на Инстаграм за време на свадбата.

Инаку на свадбата на векот меѓу истакнатите гости беа Џиџи Хадид, Бредли Купер, Ед Ширан, Сабрина Карпентер, Хју Грант, групата „Хаим“ и Том Хенкс.

Во меѓувреме, новиот филм на Пит, *Heart of the Beast*, пристигнува во кината на 23 септември, според „Филм-њуз“ (Film-News).

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

ФУЕН едногласно ја усвои Резолуцијата на Македонското друштво „Илинден“-Тирана

Федералната унија на европските националности (ФУЕН), на својот конгрес што се одржува во Хелсинки, Финска, денеска едногласно ја усвои Резолуцијата поднесена од Македонското друштво „Илинден“-Тирана.

Овој чин претставува уште еден голем дипломатски и институционален успех за македонското национално малцинство во Република Албанија.

Со усвоената резолуција, ФУЕН упатува четири клучни барања до албанските и меѓународните институции:

1. Ратификација на Европската повелба: Република Албанија итно да ја потпише и ратификува Европската повелба за регионални или малцински јазици.

2. Заштита на идентитетот: Да се преземат ефективни и конкретни мерки за заштита на македонскиот идентитет од зачестените притисоци, негирања и асимилација.

3. Зачувување на Општина Пустец: Општина Пустец да остане посебна единица на локалната самоуправа и во рамките на претстојната нова административно-територијална реформа во Албанија.

4. Преименување: Општина Пустец официјално да се преименува во Општина Преспа.

Веднаш по гласањето на делегатите, претседателот на Македонското друштво „Илинден“-Тирана, Никола Ѓурѓај, во изјава за весникот „Македониум“ го истакна значењето на овој момент.

„Ова е значаен чекор за зачувување на македонскиот јазик, идентитет, култура и сите права на Македонците во Република Албанија. Веќе 11 години, како рамноправна членка на ФУЕН, активно учествуваме во работата на оваа реномирана европска организација и ги застапуваме интересите на нашиот народ. Ова е можност за нови искуства, зајакнување на соработката со другите национални малцинства во Европа и дополнителна афирмација на македонскиот идентитет, јазик, култура и традиција. Со голем гордост го претставуваме македонското национално малцинство на европско ниво“, изјави Ѓурѓај.

Резолуцијата во најкраток рок ќе биде официјално доставена до сите релевантни албански државни органи, како и до клучните меѓународни и европски институции за заштита на човековите и малцинските права.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.