Ѓоковиќ: Не сум најдобриот играч на светот во моментов

Најдобриот тенисер на сите времиња Новак Ѓоковиќ призна дека не е најдобриот играч на светот во моментов.

Со големи успеси на турнирите од почетокот на годината, младиот Италијанец Јаник Синер стигна до второто место на АТП листата, а Ѓоковиќ го избра за најдобар играч во светот во моментов.

Според српскиот ас, Јаник Синер го стекнал потребното искуство, научил од грешките и научил да победува на големи натпревари, кои му донесоа многу бодови оваа година. Синер го игра најдобриот тенис во кариерата, по Австралија опен ги освои Ротердам и Мајами, па заслужено доби големо признание од Новак.

-Јаник е најдобриот играч во светот оваа сезона досега. Имаше неверојатен успех. Многу се подобри. Целата негова игра, сервис, движење, психички е секогаш присутен. Разликата во важните натпревари што ги игра Јаник во последните шест месеци, и во периодот пред тоа, е што сега победува на големи натпревари. Научи од своето искуство претходно, што го направи потежок противник. Сега е играч за големи натпревари, заклучи Новак Ѓоковиќ. /МИА

Тошковски се сретна си претставници на Меѓународната организација за миграции

Претставниците на ИОМ му честитаа на министерот Тошковски за изборот и му изразија поддршка за најавените реформи во Министерството за внатрешни работи.

Министерот за внатрешни работи Панче Тошковски денеска одржа работен состанок со Лаура Лунгароти, субрегионален координатор за Западен Балкан на Меѓународната организација за миграции (ИОМ) и Соња Божиновска Петрушевска, шеф на канцеларијата на ИОМ во Република Македонија, соопшти МВР.

Претставниците на ИОМ му честитаа на министерот Тошковски за изборот и му изразија поддршка за најавените реформи во Министерството за внатрешни работи.

Лунгароти го истакна значењето на добрата соработка помеѓу Министерството за внатрешни работи и ИОМ, особено во делот на граничното управување.

Таа го информираше министерот Тошковски дека во моментот ИОМ е фокусиран на областа поврзана со доброволно враќање на мигранти, како еден од главните приоритети на Европската Унија и очекува успешна соработка и поддршка од страна на Министерството за внатрешни работи во овој дел.

Претставниците на ИОМ нагласија дека досегашната материјална и техничка помош што му беше пружена на МВР преку проекти финансирани од страна на ЕУ ќе продолжи и понатаму, како и дека ваквата поддршка може да биде зголемена во блиска иднина.

Министерот Тошковски се заблагодари за поддршката што Меѓународната организација за миграции ја дава на Министерството за внатрешни работи.

Тој истакна дека Министерството за внатрешни работи ќе работи кон јакнење на капацитетите за обезбедување на државните граници особено во делот за интегрираното гранично управување,а во исполнување на оваа цел ќе биде потребна поддршка и од страна на ИОМ, се наведува во соопштението од МВР.

Канцеларијата на Високиот комесаријат за човекови права го поздрави ослободувањето на Aсанж

Канцеларијата на Високиот комесаријат за човекови права на ОН го поздрави ослободувањето на Џулијан Асанж од британски затвор.

Канцеларијата на Високиот комесаријат за човекови права на Обединетите нации го поздрави пуштањето од затвор во Велика Британија на основачот на „Викиликс“, Џулијан Асанж.

„Го поздравуваме ослободувањето на Џулијан Асанж... во Велика Британија и значителниот напредок кон конечно решавање на овој случај без дополнително притворање“, изјави Елизабет Тросел, портпаролка на Канцеларијата на Високиот комесаријат за човекови права на Обединетите нации.

Асанж, чија сага трае речиси 15 години, се согласи да се изјасни за виновен пред американското правосудство за да биде ослободен по пет години минати во британски затвор.

Се очекува утре тој да се појави пред американскиот федерален суд на Маријанските острови. Потоа ќе му се даде право да патува во Австралија, соопшти Викиликс.

Според Тросел, „случајот Асанж“ покренува голем број прашања за човековите права.

„Премногу долгото задржување на Асанж е исто така причина за загриженост. Ќе продолжиме да го следиме развојот на ситуацијата во наредните денови“, рече Тросел.

Во Србија повлечена серијата на лекови Рудакол за третман на симптоми на иритабилна црева

Агенцијата за лекови и медицински помагала на Србија (АЛИМС) излезе со соопштение дека се повлечени од оптек серија лекови Рудакол кои се користат за лекување на симптоми на иритабилни црева, јави дописникот на МИА од Белград.

Како што наведуваат, за ова биле информирани од претставништвото на компанијата, која е носител на лиценцата за лекот во Србија.

Во известувањето се наведува дека претставништвото на компанијата доброволно ја повлекува од промет серијата лек Рудакол, капсула со продолжено ослободување, 30X200 mg.

-Лекот се повлекува од превентивни причини. Наведената серија се повлекува поради неисправност во квалитетот на лекот. Не се идентификувани потенцијални безбедносни ризици поврзани со таа неисправност, се наведува во соопштението.

Датумот на истекување на серијата на лекот што се повлекува е април 2025 година, а првата дистрибуција беше на 26 јули 2022 година.

Како што е наведено во упатствата за лекот, Рудакол се користи за лекување на симптоми на синдром на нервозни црева (SIC) и слични проблеми.

притисни ентер