Автомобилизам

Франција ги намалува субвенциите за купување електрични автомобили

Франција ги намалува субвенциите од државата за купување за електрични автомобили, од максимални 7.000 евра на максимални 4.000 евра со моментално стапување во сила, јави ДПА.

За домаќинства со средни до високи приходи, субвенциите за купување ќе изнесуваат 3.000 евра, односно 2.000 евра, најави владата.

Во 2025 година, купувањето на електрични автомобили ќе биде субвенционирано со вкупно 700 милиони евра, додека за оваа година за субвенции се предвидени 1,5 милијарди евра.

Пазарниот удел на електричните возила во продажбата на нови автомобили во Франција изнесува 17,1 отсто од почетокот на годината, што е над европскиот просек, според официјалните податоци.

Владата изјави дека програмата за лизинг на електрични автомобили, која започна во 2024 година, ќе продолжи.

Во рамки на оваа програма, државата ги дава на лизинг автомобилите по цена од само 100 евра месечно. Оваа понуда е наменета за луѓе со ниски приходи кои зависат од автомобил за работа и кои живеат најмалку 15 километри од местото на работа.

Околу 50.000 домаќинства – многу повеќе отколку што се очекуваше – досега ја искористиле оваа понуда за лизинг.

Владата најави дека точните детали за новото издание на понудата за следната година се уште се работат. /МИА

Македонија

Студено наутро, преку ден сончево со мала до умерена облачност

Времето денеска наутро ќе биде студено со појава на магла, а преку денот сончево со мала до умерена облачност. Минималната температура ќе биде во интервал од -9 до 0, а максималната ќе достигне од 2 до 8 степени.

Во Скопје наутро студено со услови за појава на магла, преку денот сончево со мала облачност. Минималната температура ќе се спушти до -3, а максималната ќе достигне до 6 степени.

Како што информира УХМР, во следните денови ќе преовладува стабилно време со позитивни дневни температури кои ќе бидат во постепен пораст. Утринските температури насекаде ќе бидат под нула, а наместа ќе се спуштат и под -8 степени. По котлините ќе има појава на магла и во долините со магла дневните температури ќе остануваат пониски. Од понеделник се очекува зголемување на облачноста.

Свет

Трамп ги назначи Сталоне, Гибсон и Војтс за свои амбасaдори во Холивуд

 Новоизбраниот претседател на САД Доналд Трамп ги назначи актерите Силвестер Сталоне, Мел Гибсон и Џон Војт за специјални амбасадори во Холивуд, а со цел да ја направеле филмската индустрија „посилна од кога било досега“.

Тројцата актери, добитници на 10 номинации за „Оскар“ и три „Оскари“, се издвоија во Холивуд со поддршката на републиканецот Трамп, за разлика од многумина нивни колеги кои традиционално ја подржуваат Демократската партија.

-Голема чест ми е да објавам дека Џон Војт, Мел Гибсон и Силвестер Сталоне ќе бидат специјални амбасадори во големиот, но многу проблематичен Холивуд, во Калифорнија, напиша Трамп синоќа на својата социјална мрежа „Truth Social“.

-Тие ќе бидат мои специјални претставници да го вратат Холивуд, да биде голем, подобар и посилен од кога било, а кој во последните четири години загуби многу бизниси поради странска конкуренција.

Републиканците традиционално не се популарни меѓу претставниците на шоу бизнисот во САД, и многу ѕвезди како Тејлор Свифт и Џорџ Клуни, на претседателските избори во 2024 година ја поддржаа Камала Харис, кандидатка од Демократската партија.

Сепак, премостувајќи ги традиционалните холивудски кругови, кампањата на Трамп успешно се зближи со популарната публика на инфлуенсерите на Јутјуб и ја зајакна својата поддршка.

Македонија

Премиерот Мицкоски ќе ја пушти во употреба железничката пруга Куманово - Бељаковце

По повод завршување на градежните работи на делницата Куманово - Бељаковце (Коридор 8 Источна делница) премиерот Христијан Мицкоски денеска ќе присуствува и ќе ја пушти во употреба железничката пруга Куманово - Бељаковце.

Пругата Куманово - Бељаковце е со должина од 30,8 километри и на неа се изградени три нови железнички станици (Ново Куманово, реконструирана постоечката железничка станица Куманово, 6 стојалишта, 5 мостови, 1 тунел, пропусти со различен дијаметар, заштита на наклони, одводни канали, пристапни патишта, звучни бариери, потпорни ѕидови, горен строј и сигнализација и телекомуникација. На железничките станици и стојалишта е инсталирана сигнално-телекомуникациска опрема во вредност од 10 000 000 евра, алуминиумски седишта, челични настрешници, дисплеи, лед осветлување.

Како што информирара владината прес-служба, новинарите ќе имаат можност заедно со премиерот Мицкоски и министерот за транспорт Николоски да ја извозат со локомотива новоизградената железничка пруга.

притисни ентер