Европскиот парламент со големо мнозинство и формално ја потврди поддршката за Македонија и Албанија. Со 412 гласа „за“, 136 „против“ и 30 воздржани, европратениците ја изгласаа резолуцијата со која ги повикуваат европските лидери на наредната средба да донесат одлука за почеток на преговори со двете земји. Очекувано мнозинството гласови дојдоа од најголемите политички групи Европската народна партија и Социјал-демократите, кои беа и подносители на резолуцијата. Во документот, меѓу другото, се изразува жалење за одлуката од последниот самит, со која се испраќа негативен сигнал до земјите кандидатки и отвора можност за други влијанија.
„Политиката за проширување на ЕУ е најефективниот инструмент за надворешна политика на Унијата, а понатамошното распаѓање на таа политика може да доведе до сè понестабилна состојба во непосредното соседство на ЕУ“, се вели во резолуцијата.
Француското вето и неуспехот на европските лидери да постигнат консензус три дена беше тема на дебата во Европскиот Парламент, во чии рамки се обратија неколку десетици европратеници и европски челници. Поголем дел од нив, договорноста директно ја вперија кон францускиот претседател Макрон и го обвинија дека го поктопува европскиот кредибилитет на Балканот.
-Макрон не покажа лидерство и политичка храброст. Овој неуспех го нарушува имиџот на ЕУ на Западниот Балкан, рече Пири додавајќи дека одлука на самитот во Загреб ќе биде „премалку и предоцна", изјави Кати Пири, пратеничка на Социјал-демократите
-Треба да знаете дека ќе помогнеме во реформата на преговарачкиот процес, но ве молам исправете ја грешката која ја направивте да ги оставите Северна Македонија и Албанија надвор, додека се реформираме внатре, рече Рајнхард Бутикофер, Европратеник на Зелените
-Одлуката може да се гледа како назадување за улогата на ЕУ на Западниот Балкан и за проширувањето како стратешка инвестиција во мирот, стабилноста и развојот на ЕУ, Тути Тупураинен, министерка за надворешни работи на Финска
Одлуката на Макрон ја бранеа неговите и пратениците од неколкуте десничарски и популистички партии од Франција, Италија и Германија. Иако усвоената резолуција не е обрвзувачка, туку советодавна, од Владата велат дека документот сепак испраќа јасен сигнал до евроскептиците. Денеска со свој став на Твитер се огласи и најголемата партија во европскиот парламент, Европската народна партија. Одлуката да се блокираат Северна Македониа и Албанија е стратешка грешка. Ја нагласуваме одговорноста на Емануел Макрон, се наведува меѓудругото во пораката.