Исто како и во вториот натпревар од серијата, Џамал Мареј донесе одлука со победнички кош на четири секунди пред крајот, на кој Лејкерси не можеа да одговорат без тајмаут. Денвер победи со 108:106 и мина со вкупен сооднос 4:1.
Најдобар во редовите на поразениот тим завршувајќи ја својата 21 сезона во НБА беше Леброн Џејмс кој за 44:05 минути (најмногу во тимот) се доближи на трипл-дабл учинок, забележувајќи 30 поени, 11 асистенции и девет скока. Џејмс играше во просек речиси 41 минута во петте натпревари од серијата против Денвер, а толку минути во плеј-оф натпреварите немаше во просек од 2018 година, кога го водеше Кливленд во неговата последна сезона пред да им се приклучи на Лејкерс.
Во серијата против Денвер, Џејмс имаше просек од 27,8 поени додека шутираше 56,6%, што е најдобар процент во плеј-офот во целата негова кариера. Покрај тоа, тој забележа 8,8 асистенции, 6,8 скока и 2,6 украдени топки по натпревар, што е исто така рекорден просек во неговата плеј-оф кариера.
Се очекува Џејмс да игра уште две сезони, а до 29 јуни треба да се изјасни дали ќе ја користи опцијата играч за следната сезона и ќе остане во Лејкерси уште најмалку една година. Опцијата му гарантира 51,4 милиони долари за сезона. По поразот од Денвер, на прес-конференција беше запрашан дали тоа е неговиот последен натпревар за Лејкерси, а тој рече: „Го ценам вашето прашање, но одбивам да одговорам“.
Атлетик пишува дека Лејкерси имаат план да го задржат еден од најдобрите кошаркари на сите времиња. Лејкерси се подготвени на драфтот да го изберат синот на Леброн, Брони и со тоа да го исполнат последниот сон на Леброн - да игра со својот син во истиот тим.
Брони се пријави за овогодинешниот драфт и покрај тоа што го пропушти првиот дел од својата прва сезона во УСЦ поради срцев удар минатото лето. Брони, висок 192 см, играше 19 минути 25 пати во својата прва сезона на универзитет и имаше просек од 4,8 поени, 2,8 скока и 2,1 асистенции, со многу слаб шут од 36,6% од поле, 26,7% за тројка и 67,6% од слободни фрлања, но тој бил пофален како многу добар одбранбен играч.