Ѕвездата на Сантос беше исклучена по судир со Родриго Нестор, а потоа се обиде физички да го нападне противничкиот фудбалер. Во тоа беше спречена од другите играчи, кои мораа да ја смират ситуацијата на теренот.

Конфликтот започна во 31-та минута, кога Нестор го фаулираше Нејмар. Бразилецот луто ја фрли топката кон противникот, кој падна на тревникот. Нејмар потоа се обиде да ја подигне, по што дојде до туркање на играчи од двата тима. Судијата Савио Переира Сампајо му покажа жолт картон на Нејмар.

Веќе на полувремето, Нестор го обвини Нејмар дека го навредил во интервју за Sportv. Тој рече дека играчот на Сантос му упатил низа навредливи зборови, но не сакаше да открие што точно му рекол.

„Тој знае што ми кажа. Тоа беше големо непочитување кон мене и дресот на Баија. Мислам дека како играч е идол за сите, но денес тој потфрли како личност со своето однесување. Никогаш не би рекол нешто такво. Не сакам да ги повторувам неговите зборови, има многу луѓе и деца кои го гледаат ова“, рече Нестор.

Нејмар доби црвен картон и се обиде да го нападне Нестор

Кавгата продолжи пред почетокот на второто полувреме. Нејмар повторно му се приближи на Нестор и му ја покри устата со раката за време на разговорот. Играчот на Баија веднаш го извести судијата, кој по интервенцијата на ВАР ја прегледа снимката и му покажа директен црвен картон на Нејмар.

Neymar loses his temper and tries to assault a Bahia player
by u/cocacolapepsifanta in soccer

Одлуката е донесена врз основа на таканареченото правило Винисиус Јуниор, воведено во Бразил за да се спречи прикривање на навреди и расистички испади за време на натпреварите. Според ова правило, играч може да биде исклучен ако за време на конфронтација со противничкиот играч намерно ја покрие устата за да скрие што зборува.

Нејмар целосно го изгуби трпението откако беше исклучен. Тој не сакаше веднаш да го напушти теренот, а потоа тргна кон Нестор, кој беше заштитен од неговите соиграчи и други играчи. Поради целиот инцидент, паузата помеѓу полувремињата траеше повеќе од 25 минути. Погледнете го видеото од инцидентот ТУКА.

Нејмар: Сепак ќе го фатам

По напуштањето на теренот, Нејмар ја објасни својата верзија на настаните и призна дека направил грешка кога ја покрил устата со раката.

„Бев на средина од теренот, се шегувавме и се смеевме, а потоа отидов да разговарам со Нестор. Направив грешка со ставањето на раката преку устата, но дури и не му реков ништо сè уште, а тој веќе ја крена раката. Тоа е најголемата подлост во фудбалот. Но, сепак ќе го фатам“, рече Нејмар.

Подоцна, тој се огласи и на социјалните мрежи. Им се извини на навивачите на Сантос и призна дека исклучувањето било оправдано, но го обвини Нестор за злоупотреба на правилото против расизмот за да му даде предност на својот тим.

„Она што Нестор ми го направи денес е многу сериозно. Ова правило е создадено за борба против расизмот, а тој сакаше да го искористи за да добие предност на натпреварот. Не му реков ништо. Секако дека се навредувавме и провоциравме, но тоа е дел од фудбалот. Она што го направи беше навистина злобно“, рече Нејмар. Поради исклучувањето и третиот жолт картон, Нејмар ќе ги пропушти следните два натпревари на Сантос, против Палмеирас и Ред Бул Брагантино. Сантос го заврши натпреварот со нерешен резултат 1-1. Баија поведе со голот на Лучано Џубе, а домаќините добија бод со голот на Луан Перез во судиското продолжение.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Тие се нејзината енергија, нејзиниот глас и силата што може да донесе нови идеи, поинаков пристап и вистински промени. Токму со таа порака, на Пелистер денеска се одржа Првата изборна конференција на Клубот на млади на Движењето ЗНАМ – За наша Македонија, на која за претседателка беше избрана Мила Петрушевска, магистер по правни науки од областа на казненото право и членка на Советот на Општина Куманово. Конференцијата претставува важен чекор во организациското јакнење на Движењето и отворањето ново поглавје во организирањето на младите.

Формирањето на Клубот на млади е дел од Акцискиот план на ЗНАМ, со јасна цел, создавање организиран, активен и функционален младински подмладок, во кој младите ќе имаат простор да ги изразат своите ставови, да предлагаат иницијативи и непосредно да учествуваат во креирањето на политиките и насоките на Движењето.

Обраќајќи им се на делегатите, новоизбраната претседателка Мила Петрушевска истакна дека довербата што ја добила ја доживува пред се како одговорност, со визија за младинска организација што ќе биде присутна меѓу младите, ќе ги слуша нивните потреби и ќе создава можности за нивен личен и професионален развој.

„Мојата цел е да изградиме подмладок во кој младите нема само да бидат присутни на фотографии и настани, туку навистина ќе учествуваат, ќе предлагаат идеи и ќе имаат можност да влијаат врз одлуките. За мене е важно да не бидам само претседателка која ќе стои пред младите, туку некој што ќе стои зад нив, зад нивните идеи и иницијативи“ порача Петрушевска.

Таа нагласи дека нејзин приоритет ќе биде градењето цврста младинска структура, со активности на терен, едукација, обуки и конкретна поддршка за младите, со цел секој да добие можност да го покаже својот потенцијал и активно да придонесува во заедницата.

На конференцијата се обрати и претседателот на Движењето ЗНАМ – За наша Македонија, Максим Димитриевски, кој ја истакна важноста на младите како активни учесници во политичкиот и општествениот живот и потребата од создавање простор за нови генерации лидери. Тој порача дека силата на едно политичко движење не се мери само според резултатите што ги постигнува денес, туку и според луѓето што ги подготвува да ја преземат одговорноста утре.

„На младите не треба само да им ја препуштиме иднината, треба да им дадеме можност уште денес да ја создаваат. ЗНАМ сака млади луѓе со свои ставови, со храброст да предлагаат, со знаење да преземат одговорност и со енергија да ги претворат своите идеи во конкретни резултати“ истакна Димитриевски.

На Првата изборна конференција беше избрано и Координативното тело на Клубот на млади, кое заедно со претседателката ќе работи на поставување јасна организациска структура, утврдување приоритети и реализација на активности насочени кон поголемо младинско учество.

Со формирањето на Клубот на млади, ЗНАМ испраќа јасна порака дека младите не се декор на политиката, ниту публика што треба само да ги следи одлуките на другите. Тие се луѓе со идеи, знаење, амбиција и право да бидат дел од процесите што ја обликуваат нивната иднина.

Центар за комуникации и аналитика

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Британската војвотка од Сасекс Меган Маркл во последното писмо што му го испратила на својот татко Томас Маркл, со кого го прекинала контактот, изјавила дека е свесна за обвинувањата за сексуална злоупотреба на деца што му биле упатени, нагласувајќи дека одлуката да одбие контакт со своите деца ја донела за да ги заштити, пренесува британскиот весник The Sun, повикувајќи се на извори.

Според весникот, Меган го испратила писмото до нејзиниот татко во декември 2025 година, додека тој бил на болничко лекување на Филипините, по ампутација на ногата поради компликации предизвикани од згрутчување на крвта.

Во писмото, како што се наведува, таа вели дека нема да му дозволи да се сретне со нејзините деца и дека повеќе нема да биде во контакт со него.

Весникот наведува дека во писмото Меган упатила сериозни обвинувања против нејзиниот татко, вклучително и наводи за неговото наводно непримерно однесување кон малолетниците и дека била свесна дека случајот се разгледува.

Томас Маркл моментално е под истрага поради сомнеж дека поседува материјал кој прикажува сексуална злоупотреба на деца, што тој го негираше, пишува Сан.

Според весникот, спорниот материјал наводно бил пронајден во неговиот дом на Филипините, во неколку кутии.

Неговиот син Томас Маркл Јуниор, полубрат на војвотката од Сасекс, изјави дека дошол до материјалот и дека случајот го пријавил во надлежните институции во Соединетите Американски Држави.

Сан известува дека на 10 јули, Томас Џуниор го пријавил случајот во Федералното истражно биро (ФБИ), Националниот центар за исчезнати и експлоатирани деца и полицијата во државата Пенсилванија, каде што порано живеел неговиот татко.

Томас Маркл постариот ги отфрли обвинувањата во изјавата што ја даде за Дејли Меил во петокот.

Меган Маркл проговори за случајот во изјава за магазинот People во која изјави дека е длабоко потресена од информациите кои се појавија и дека нејзините мисли се со сите деца кои можеби биле повредени.

Таа исто така изјави дека во 2018 година, писмо со вознемирувачки наводи против нејзиниот татко било испратено до лондонската Метрополитен полиција и службата задолжена за заштита на членовите на кралското семејство и другите заштитени лица.

Меган и нејзиниот сопруг, принцот Хари, имаат две деца, седумгодишниот син Арчи и петгодишната ќерка Лилибет.

Томас Маркл не присуствуваше на нивната венчавка во мај 2018 година, кога беше придружувана по патеката од кралот Чарлс III.

Според магазинот People, Меган за писмото со обвинувања дознала по венчавката, а потоа, како што наведува извор запознаен со случајот, и било советувано да не зборува за тоа јавно за да не се загрози евентуалната истрага.

Изворот додаде дека таа е загрижена и за правните последици од јавното изнесување непотврдени тврдења.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.