Американската вселенска компанија Blue Origin денеска успешно ја лансира својата најголема ракета, New Glenn, во орбитата на Земјата за прв пат, означувајќи пресвртница за основачот на Amazon, Џеф Безос, додека на ривалот SpaceX му прави сериозна конкуренција, објави Си-Ен-Ен.
Стоејќи висока 98 метри, приближно со големина на зграда од 30 ката, ракетата Њу Глен успешно полета околу 02:03 часот по локално време (07:03 GMT) од вселенската станица Кејп Канаверал во Флорида, и покрај неповолните временски услови.
Првиот лет на оваа моќна ракета се чекаше со години и неколку пати беше одложуван, а во понеделникот лансирањето дури беше откажано во последен момент поради технички проблем. Меѓутоа, доколку мисијата оди според планот, се очекува Њу Глен да стигне до орбитата, што ќе биде прво за приватната вселенска компанија основана во 2000 година.
„Сè што е над тоа, е бонус“, рече Дејвид Лимп, извршен директор на Blue Origin.
Иако компанијата веќе неколку години превезува туристи во вселената со својата ракета Њу Шепард, таа сè уште нема изведено ниту еден орбитален лет.
Сега, со многу помоќниот New Glenn, компанијата планира да се пробие на нов пазар – лансирање комерцијални и воени сателити во орбитата, како и вселенски летала и астронаути, со што ќе се натпреварува со SpaceX, кој е во сопственост на друг американски милијардер, Илон Маск.
Неговата компанија моментално доминира на пазарот со ракетите Falcon 9 и Falcon Heavy и работи на развој на нова, најголема ракета досега. И таа мега-ракета, наречена Starship, треба денеска да го изврши својот седми пробен лет, откако вчера беше одложен, доколку временските услови дозволуваат.

Џорџ Нилд, претседател на компанија која промовира приватни вселенски активности, смета дека лансирањето на Њу Глен е добра вест за целиот вселенски сектор бидејќи „добро е да се има конкуренција, да се има опција за избор“.
„Ова е исклучително важно за комерцијалната вселенска индустрија, но исто така и за владата и НАСА“, бидејќи не само што ги намалува трошоците, туку обезбедува и алтернатива „во случај на проблеми со опремата“, објасни тој за АФП пред летот.
Инаугуративната мисија на Њу Глен се очекува да трае шест часа. Тоа е мисија без екипаж. Доколку ова лансирање биде успешно, дополнителни летови на Њу Глен се очекуваат во текот на 2025 година.
Blue Origin веќе има потпишано договори со неколку клиенти, меѓу кои и американската вселенска агенција која ќе ја користи ракетата за беспилотна мисија на Марс и американската влада која ќе ја користи за мисии за национална безбедност.
Од комерцијална страна, Blue Origin планира да распореди интернет сателити за неколку компании и, како SpaceX со Starlink, да биде одговорен за лансирање сателити од групата Amazon.