Според информациите на Канал 5 станува збор за директорот на специјализирана болница за Геријатриска и палијативна медицина „13 ноември“ Скопје, Мухсин Арифи. Освен него уапсено е уште едно лице кое имало улога на посредник. Неофицијално, двајцата барале и примиле поткуп во износ од 20.000 евра за болно и неподвижно лице да биде сместено во геријатриска установа. Акцијата е спроведена координирано помеѓу Обвинителството и полицијата.
-Во координирана акција на Основното јавно обвинителство за гонење на организиран криминал и корупција и Министерството за внатрешни работи приведени се две лица под сомнение за кривични дела примање поткуп и примање награда за противзаконито влијание. Се постапува за целосно расчистување за настанот,- изјави – Гоце Андреевски – Портпарол на МВР.
Засега нема информација дали ќе се бара притвор или други мерки за осомничените, нема ниту детали дали биле фатени со обележани банкноти. Од Министерството за здравство велат дека се залагаат за што побрзо расчистување на случајот. Оттаму велат дека стојат на располагање доколку се потребни какви било информации по службена должност.
Арифи претходно беше и в.д директор на Психијатриската болница Скопје поставен како кадар на Алијанса за Албанците. Арбен Таравари во писмено соопштение ги повикаа надлежните органи да спроведат брза и ефикасна истрага.
-Албанскиот народ не заслужува да го претставуваат лица кои евентуално се обидуваат нелегално да се збогатат на здравствените маки на граѓаните. Ова е недозволиво и надвор од принципите кои ги застапуваме. Партиските органи на АА ќе ги преземат сите неопходни статутарни чекори за зачувување на угледот на партијата,- - Алијанса за Албанците.
Последен случај на примање поткуп во здравството имаше пред два месеци во Битола кога беше уапсен хирург во просториите на Клиничката болница. Тој по операција на жолчка на пациентка побарал од нејзиниот син 150 евра за како што соопшти тогаш обвинителството, да се почастел за извршената работа.