На повидок ли е решение на црковниот спор и признавање на МПЦ-ОА?

Цариградскиот  патријарх Вартоломеј на заедничка средба  ќе повика претставници на Македонската православна црква-Охридска архиепископија и на Српската православна црква.

Цариградскиот патријарх Вартоломеј на заедничка средба во Вселенската патријаршија во Истанбул ќе повика претставници на Македонската православна црква-Охридска архиепископија и на Српската православна црква со цел изнаоѓање заемно прифатливо решение на црковниот спор. Оваа одлука произлегла по вчерашната посета на премиерот на преодната влада Оливер Спасовски и претседателот на СДСМ, Зоран Заев пишува весникот „Ortodox times“. Објавувајќи детали од разговорите , весникот се повикува на соопштение од Вселенската Патријаршија во кое меѓу другото стои дека на средбата одблиску се разгледал црковниот проблем и сите досегашни фази.

- Во текот на разговорот беа ставени на тапет претходните фази на прашањето, како и желбата на тамошната Црква да се врати во каноничност, под името Охридска архиепископија, согласно своевремено поднесената молба за апелација односно еклитон од нејзина страна. Господинот премиер и тие со него ја изразија својата почит и доверба кон Мајката Црква, чиј благослов го добија за целиот тамошен клир и народ.

Се наведува во соопштението од Вселенската патријаршија. Дека патријархот Вартоломеј работи на решавање на спорот меѓу МПЦ и СПЦ со цел решавање на статусот , вчера за Канал 5 потврди владиката Тимотеј , а со надеж за интензивирање на дијалогот и решавање на проблемот, ден по разговорите со Вартоломеј изнесе и премиерот Спасовски.

Од Српската православна црква засега молк за средбата на Вартоломеј со Македонските официјални лица. Се занимаваат само медиумите-дел објавуваат куси информации а други пишуваат дека со тоа што Вселенската патријаршија прифатила да го разгледува прашањето на МПЦ-ОА, почнала ревизија на својот Томос за СПЦ од 1922 година. Некои медиуми потсетуваат на изјавата на американскиот амабасадор во Ватикан до Српскиот епископ во 2007-та дека Српско црковно прашање во Македонија, за Америка не постои. Други пак на минатогодишната изјава на Рускиот патријарх Кирил дека Вселенскиот патријарх можело да го примени ,, украинското сценарио“ за признавање ан автокефалноста на МПЦ-ОА.

Заев го доби мандатот, вети европска, демократска и одговорна влада ослободена од етнички предрасуди

Лидерот на СДСМ, Зоран Заев го доби мандатот за составување нова влада од претседателот на државата Стево Пендаровски.

Во обраќањето пред претседателската вила Водно, откако мандатот му беше врачен, Заев рече дека најверојатно, пред да помине законскиот рок од 20 дена, земјава ќе добие ефикасна влада, влада која ќе го продолжи вистинскиот пат – кон ЕУ, која ќе го развива концептот „едно општество за сите", ослободена од какви било национализми и етнички предрасуди.

– Чест и одговорност ми е што како предводник на СДСМ и коалицијата „Можеме" денеска од претседателот Пендаровски го добив мандатот за составување нова, европска, демократска одговорна влада со институции кои уште подобро ќе им служат на граѓаните. Од овој момент, во рок од 20 дена имаме задача да создадеме програма и кадри на кои Собранието ќе има додели мандат да им служат на граѓаните, нагласи Заев.

Според него, Македонија ќе добие влада која ќе го продолжи јасниот правец – ЕУ, просперитет и долгорочна стабилност. Владата ќе има квалитетни, одговорни и отчетни кадри, а приоритет ќе бидат економијата, борбата со криминалот и корупцијата, како и прочистувањето на праводсутвото.

– Владината програма ќе биде во најголем дел посветена на економијата, на раст на плати и пензии, на вложувања во младите, во раст и развој, во грижа за најсиромашните, во поддршкја на домашното стропанство. Ќе водам влада која не знае за скршнување од патот и која по членството во НАТО, продолжува кон членство во ЕУ, истакна Заев и во оваа прилика упати честитки за Рамковниот договор зашто денес се навршуваат 19 години од неговото потпишување.

Претседателот Пендаровски пред да го довери мандатот се обрати кусо.

-Врз основа на член 84, согласно член 90 од Уставот и предлогот на коалицијата „Можеме", за мандатар за состав на влада го определувам Зоран Заев, претседател на СДСМ и пратеник во Собранието, рече Пендаровски.

Според член 90 од Уставот, по добивањето на мандатот, мандатарот во рок од 20 дена на Собранието треба да му поднесе програма и да го предложи составот на Владата. Владата, на предлог на мандатарот и врз основа на програмата, ја избира Собранието со мнозинство гласови од вкупниот број пратеници. /МИА.

Ахмети организира средба на албанските партии на годишнината од рамковниот договор

Попладнево  претседателот на ДУИ, Али Ахмети организира средба на лидерите на партиите од албанскиот кампус.

Средбата ја следи Мирјана Мирчевска Јовановиќ.

На оваа тема гостин во вонредните вести на Канал 5 е организацискиот секретар на ДУИ Артан Груби.

Пристигна ли некој од поканети и што во ДУИ очекуваат да произлезе од оваа средба, кој се организира на денот кога се навршуваат 19 години од потпишувњето на Охридскиот рамковен договор?

Целиот разговор погледнете го во видеото.

„Само Вистина“ вечерва со Тодор Петров и Абдулади Вејсели

Во вечерашната „Само Вистина“ ќе дебатираат Тодор Петров и Абдулади Вејсели.

Почитувани гледачи, ќе бидат ли „мекици“ причина за одложување на конститутивната седница, вечерва во Само Вистина ќе дебатираат Тодор Петров и Абдулади Вејсели.

Поминаа 19 години од потпишување на Рамковниот договор, колку изгубија Македонците , а колку добија Албанците сиот овој период?

Влеговме во НАТО, заглавивме во европската чекална, дали националистичките побарувања ќе не направат поголеми европјани?

Промена на грб, знаме, химна и двојазични униформи, што уште ќе се измисли во „дух“ на Рамковниот договор?

Почнува ли повторно од далечина да се слуша звукот на оружјето?

Ќе се разбудат ли „демоните“ од 2001 година?

Денов најверојатно „долго“ ќе трае, кој ќе дојде на состанок кај Ахмети, а кој ќе оди на средба со Заев?

Размислува ли можеби ДУИ за коалиција со ВМРО-ДПМНЕ и Левица?

Бизнисот „моли“ за поскоро составување влада, граѓаните на штрајк за поскапување на струјата, политиката ги става во сенка проблемите на граѓаните, а вечерва во Само Вистина, копјата ќе ги „кршат“ Тодор Петров и Абдулади Вејсели, на Канал 5 Телевизија.

притисни ентер