Државата од вчера е со двајца претседатели, едниот признат од САД и ЕУ, другиот пак од Русија и Кина.
Најбогатата држава со нафта во латинска Америка, а воедно и најсиромашна на континентот, е на работ на граѓанска војна откако спикерот на парламентот Хуан Гуаидо и лидер на опозицијата се самопрогласи за В.Д. претседател, и со тоа тргна во отворен конфликт со досегашниот претседател Николас Мадуро.
Прогласот Гуаидо го направи пред собир на приврзаници на опозицијата, а неговиот легитимитет набрзо беше признаен од САД, ЕУ и организацијата на американски држави.
-Пред Господ, Семоќниот, Венецуела, со почит кон моите колеги во националното собрание, се колнам дека формално ги преземам национално извршните овластувања како претседател одговорен за Венецуела. – изјави Николас Гуаидо.
Како одговор претседателот Никола Мадуро кој е на власт скоро една деценија, ги протера сите американски дипломати од земјата. Во говор пред неговите приврзаници, тој порача дека прогласот на Гуаидо нема легитимитет и ги повика неговите следбеници да не потклекнат пред империјализмот.
Во согласност со моите функции, се колнам пред народот дека ја почитувам и ќе ја почитувам независноста и суверенитетот и мирот на републиката, и одлучив да ги прекинам дипломатските и политичките односи со империјалистичката влада на САД - изјави Николас Мадуро, претседател на Венецуела.
Одлуката на Мадуро предизвика лавина од реакции во САД, каде државниот секретар Мајк Помпео порача дека дипломатските односи со Венецуела, ќе ги спроведуваат преку владата на Гуаидо.
Американскиот претседател Трамп пак преку соопштение, го предупреди Мадуро да не презема чекори против безбедноста на граѓаните, а не исклучи и можна воена интервенција. Федерика Могерини пак порача дека ЕУ го поддржува потегот на Гуаидо и повика на нови избори.
Поддршка за Мадуро пристигна од официјална Москва од каде порачаа дека САД се мешаат во внатрешните односи на суверена држава, а со сличен став излегоа и властите во Пекинг, додека портпаролот на турскиот претседател на Твитер објави дека во телефонски разговор, Ердоган на Мадуро му изразил поддршка со зборовите, Мој брате Мадуро! Главата горе ние стоиме зад тебе.