Андов останува на ставот дека Фрчковски бил одговорен за атентатот врз Киро Глигоров

Поранешниот претседател на собранието на република Македонија Стојан рече дека стои зад се што напишал во неговата книга.

Поранешниот претседател на собранието на република Македонија Стојан  рече дека стои зад се што напишал во неговата книга која ја брануваше јавноста особено по тврдењето дека организатори на атентатот на Киро Глигоров се поранешните  функционери Бранко Црвенковски и Љубомир Фрчковски.

Тој прво одби да каже што напишал во книгата, а потоа за колумната на Фрчковски за порталот Либертас во која тој му одговара за обвинувањата, Андов рече дека не чита колумни на Фрчковски , а ги отфрли и обвинувањата на Мане Јаковлевски  кој е еден од основачите на ВМРО-ДПМНЕ на дека токму тој е еден од виновниците за атентатот на Киро Глигоров

Откако му  прочитавме дел од колумната напишана од Фрчковски, Андов се премисли па рече дека Фрчковски како министер за внатрешни е одговорен што не е расветлено убиството.

Инаку Фрчковски во негов стил деновиве му одговори на Андов

„Во време на атентатот на Киро, за тој трауматичен момент за нацијата и сите нас, посебно оние кои беа блиски до него – Стојан беше скандалозна невкусна, драма. Него само го памтиме како влетувач во кабинетот и фотелјата на Киро, следниот саат после атентатот кога сите бевме во шок и растрчани по болници и како разговара со Милошевиќ, а овој му нудел помош околу атентатот. Целата конструкција и злоупотреба со оваа траума за нацијата Стојан ја насочува на лични освети и импутирања сомнеж и конспирации. Во таа смисла, тоа е монструозен безобѕирен гест, независно каква амбиција стои зад тоа“, напиша Фрчковски.

Фрчкоска: Во вторник Јанева повторно ќе дава исказ пред Обвинителството

Специјалната јавна обвинителка Катица Јанева, која е разрешена од функцијата и е во притвор како осомничена во случајот „Рекет", во вторник повторно ќе дава исказ во Обвинителството за гонење организиран криминал и корупција.

Ова го најави нејзината адвокатка Ирена Данаилова-Фрчкоска во интервју за „360 степени" на ТВ Алсат.

– Повторно е повикана. Во вторник ќе дава исказ, рече Фрчкоска, одговарајќи на новинарско прашање.

Според Фрчкоска, било очекувано Јанева да биде разрешена од функцијата специјален јавен обвинител, но дикутабилна е одлуката на Советот за јавни обвинители за нејзино разрешување од функцијата јавен обвинител во Гевгелија.

– Сметам дека таа одлука на Советот за јавни обвинители е спорна и претпоставувам дека ќе биде предмет на некаква жалба, рече Фрчкоска.

Во однос на тоа дали требало да има присутен нотар при потпишувањето на дописите што Јанева ги испрати од затворот во Шутка, Фрчкоска вели дека нужност за присуство на нотар не постои, ниту пак законот го бара тоа.

– Секое притворено лице согласно член 178 од Закнот за кривична постапка има право да испраќа дописи до лица кои се наоѓаат надвор од притворот и на некој начин да врши некаква присмена коресподенција. Има ситуации кои притворени лица испраќаат молби или жалби некој да ги посети и тоа е сосема легитимно. И во овој случај е постапено на ист начин, нагласи Фрчкоска.

Во врска со реакциите кои уследија по неодамнешната изјава на премиерот Зоран Заев во која тој споменува дека разговарал со Фрчкоска, таа демантира дека станува збор за било каква координација на Јанева со премиерот преку неа.

Прашана дали има докази за инволвираност на Јанева во случајот „Рекет", Фрчкоска вели дека и биле презентирани селективни докази и оти од она што го видела не произлегува било каква инволвираност или индиции на постоење на основано сомнение дека Јанева го сторила делото за кое се сомничи.

За снимките во кои се слуша како Јанева комуницира со осомничени лице кое е предмет што го води СЈО, Фрчкоска вели дека тие разговори ги толкуваат во насока на изјавата на Јанева дека се работело за евентуална соработка како сведок во друга постапка.

Според Фрчкоска, ќе треба да се види дали овие снимки ќе може да бидат искористени како докази во кривичната постапка бидејќи тие не може да се поистоветат со снимките што ги користи СЈО во постапките.

– Не може да се поистоветат снимките што СЈО ги третираше како докази и овие снимки. Снимките од нелегалното прислушување беа озаконети со Закон за СЈО, а овие докази се третираат како докази кои се прибавени на незаконит начин и како такви треба да бидат издвоени од постапката, смета Фрчкоска. 

Царовска и Адеми на работен состанок со донаторската заедница за секторот – образование, вработување и социјална политика

Министерот за образование и наука Арбер Адеми и министерката за труд и социјална политика Мила Царовска денеска присуствуваа на работниот состанок со меѓународните донатори за секторот образование, вработување и социјална политика.

Изразувајќи благодарност до присутните од Донаторската заедница и до Делегацијата на ЕУ, Адеми напомена дека координативниот состанок има важноста и значењето во исполнувањето на стратешките цели и определби на националните политики кон интеграција на земјата во Европската Унија.

– Важно е да го продолжиме и зајакнеме партиципативниот процес и координацијата на активностите во рамките на Стручното образование и обука како и спроведување и следење на секторските политики со фокус на остварување на резултати, а со цел обезбедување на долгорочен ефект и усогласени реформи во секторот, рече Адеми.

Министерството за образование и наука, истакна министерот, изминатиот период работеше на носењето добри и корисни политики преку спроведување на сеопфатна анализа од страна на ОЕЦД, за која веќе имаме и извештај но и јасен показател во која насока ќе се движат реформите.

– При тоа се донесоа и повеќе значајни закони како: Законот за високо образование, Законот за основно образование и Законот за наставниците и стручните соработници во основно и средно, а во фаза сме и на креирање на работна група која ќе започне со разработка на пакет законите во делот на средното и средното стручно образование, потенцираше Адеми пред присутните.

Царовска истакна дека изминатиот период Министерството за труд и социјална политика работело на повеќе процеси и реформи. Дел од нив се завршени, дел продолжуваат да се спроведуваат.

-Со социјалната реформа работиме на намалување на детска сиромаштија. Процесот на деинституционализација успешно се спроведува. Досега бројот на деца во институции е намален за 75 проценти, а до крајот на годината очекуваме да нема деца во домовите, рече Царовска.

Потсети дека се отворила и програмата со Светска банка за развој на социјални услуги на локално ниво.

-Успешно се спроведува реформата за стабилизација на пензискиот фонд. Работиме на квалификување на младите лица за што се предвидени активни мерки во Оперативниот план. Ова се само дел од процесите и реформите на МТСП, рече Царовска. 

Дескоска: Не е нарушена безбедноста на прислушуваните материјали во зградата на СЈО

Министерката за правда и член на ИО на СДСМ Рената Дескоска  вели дека не е нарушена безбедноста на прислушуваните материјали во зградата на Специјалното јавно обвинителство,.

Бидејќи републичкиот јавен обвинител ја презеде надлежноста и тој сега ја има формално грижата за тие материјали, во истиот сеф како што стоеле и досега .

-Јавното обвинителство кај нас е поставено хиерархиски. Согласно постојниот Закон за Јавното обвинителство, а тоа не беше сменето ниту во предлозите кои ги пуштивме во Собрание, републичкиот јавен обвинител има право да делегира предмети на конкретни јавни обвинители. Тоа не е нешто што тој прват го прави, тоа се случувало и во минатото додека бил републички обвинител Зврлевски и во други случаи. Тие ги водат предметите по доделување на републичкиот обвинител, изјави  Дескоска во емисијата „360 степени"  на Телевизија Алсат.

Според Дескоска, не е спорно од правен аспект тоа што обвинителите се сместени во истата зграда на СЈО.

-Колку што знам тоа е зграда која што е доделена на СЈО, во орган во рамките на ЈО. Тоа е зграда во којашто се сместени обвинителите, во која што се наоѓаат предметите формално, материјалите, така што од тој аспект не станува збор за правно прашање, дека е нешто спорно од правен аспект, туку од практичен аспект веројатно одлучил обвинителот на тој начин да продолжат работите и тоа е апсолутно ирелевантно, заклучи Дескоска.

Што се однесува до платите на вработените во СЈО, Дескоска вели дека се подготвени измени на Законот за јавнообвинителски службеници.

-Кога се формираше СЈО, се додаде нова глава во Законот за јавнообвинителските службеници, којшто го регулира статусот и правата на овие лица. Ставивме одредба дека покрај специјалниот јавен обвинител доколку не е избран, републичкиот обвинител одлучува за статусните права, за другите права на овие вработени, потенцираше Дескоска.

Во однос на вработувањата по роднински и блиски врски во СЈО, Дескоска истакна дека дел од таа информација е невистинита и веќе била демантирана.

-Беше споменат Игор Милев, дека негов син работи во СЈО – тој воопшто нема син. Ме спомнаа мене дека маж на некоја моја братучетка била вработена во СЈО, јас ви кажувам дека тој не е вработен во СЈО, туку е вработен во МВР уште кога јас сум била студентка, потенцираше Дескоска.

Таа дополни дека во дел од случаите, дека се вработени лица кои се деца на судии и обвинители, тоа не е уникатна ситуација во СЈО, но посочи дека треба да се бара начин да се спречи влезот. Таа, како што рече, би била задоволна доколку ДКСК по допрен глас или по пријава ги истражи овие случаи.

притисни ентер