Српската Православна Црква го коригираше спорното именување на Македонската православна црква на нивната официјална интернет-страница. Од МПЦ-ОА за Канал 5 велат дека стапиле во контакт со СПЦ и побарале, како што велат, очигледната грешка да биде исправена. Во првичната објава за меѓународна конференција во манастирот Манасија, епископот Климент беше претставен како секретар на Синодот на „Православната Охридска Архиепископија – Македонска Православна Црква“.Спорно беше што со првичната формулација се добиваше кратенката ПОА-МПЦ. ПОА беше паралелната црковна структура под јурисдикција на СПЦ, која во 2023 година беше интегрирана во МПЦ-ОА. Дополнително, самата СПЦ во Томосот од 2022 година го употреби официјалното име на македонската црква.

Дилеми предизвика и неодамнешната изјава на српскиот претседател Александар Вучиќ дека Српската православна црква е „иста и во Скопје“. Од МПЦ-ОА тогаш реагираа дека својата духовна и пастирска мисија ја остваруваат на сопствената канонска територија. Црковните аналитичари потсетуваат и на низа претходни случаи на поинакво именување – од формулацијата „Охридска архиепископија – Македонска православна црква“, до ословувањето на архиепископот Стефан како „архиепископ на Македонија“ или само како „Охридски архиепископ“. Аналитичарот Бранко Ѓорѓевски смета дека низата различни именувања тешко може да се сведе само на случајни грешки, додека според Цане Мојаноски повторувањето на ваквите примери може да укажува дека во СПЦ се уште има поединци незадоволни од одлуката од 2022 година.

„Секоја случајност во комуникациите е значи и одредена порака која треба да ја восприеми оној кому му е упатена. Зачестените грешки повеќе или помалку упатуваат дека во структурата на Српската православна црква постојат незадоволни, така да кажам, елементи, кои на еден или друг начин го изразуваат ставот спротивен на одлуката на Соборот на Српската православна црква од 2022 година.“

„Вакви пораки, слични на онаа која неодамна ја испрати и српскиот претседател Вучиќ, сигурно дека ќе има и во иднина, но нашата црква мора да има јасен страв околу тоа и не смее да дозволи вакви игри со именувањето. Мислам дека се работи за една смислена стратегија со која нашата црква од време на време се потсетува на тоа дека СПЦ нè признала под уставното име и дека тоа не треба да се заборава во нашите релации, посебно со Вселенската патријаршија, врзана за добивањето на конечниот Томос за автокефалност.“

Ѓорѓевски потсетува дека со Томосот од 2022 година СПЦ ја призна автокефалноста на македонската црква, но за официјалното име препорача дијалог со останатите православни цркви. Затоа смета дека македонските владици треба да побараат детално појаснување зошто и натаму се појавуваат различни формулации за МПЦ-ОА.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Привремената суспензија на дигиталниот систем за влез и излез од Шенген зоната која беше воведена за летниот период и официјално заврши – на граничните премини се очекува повторно електронски да се евидентираат биометриските податоци на патниците, со што се стравува дека ќе се зголемат времето на чекање и гужвите. Како што неодамна информираше Европската Комисија, со завршување на дискрециониот период, заради справување со метежите се размислува и за можно распоредување на силите на Фронтекс на потенцијално оптоварените гранични премини.

„Кога станува збор за времето по летото, ние сме во близок и конструктивен контакт со оние неколку земји-членки каде што се потребни некои прилагодувања на одредени гранични премини. Комисијата е подготвена да обезбеди дополнителна поддршка за овие земји-членки. Оваа поддршка би можела да вклучува, на пример, оперативна помош и распоредување на дополнителни офицери од постојаниот корпус на Фронтекс.“

Од Комисијата информираа дека очекуваат целосно решавање на преостанатите предизвици поврзани со имплементацијата на ЕЕС системот до крајот на годината. Сепак, коалиција на аеродроми, авиокомпании и туристичката индустрија во Европа, деновиве побараа суспензијата да продолжи и по денешниот ден, бидејќи како што велат, системот предизвикува значителни доцнења.

„Со ЕЕС, процесот трае околу 90 секунди по патник, во споредба со 20-30 секунди порано и тоа е кога работи правилно и со соодветен персонал - ЕЕС мора да се поврзе и со националните системи. Комисијата треба да им дозволи на државите целосно да ги суспендираат проверките на ЕЕС пред редовите да станат предолги. Дури и по летниот пик, ги повикуваме институциите на ЕУ да го продолжат механизмот за делумно суспендирање на EES по 6 септември 2026 година.“

Иако засега Европската комисија не го продолжи дискрециониот период, според медиумот Гардијан, поморските гранични премини помеѓу Франција и Велика Британија, се очекува и во догледен период да оперираат без ЕЕС како што тоа се одвиваше и досега. Дополнително како што пишува Гардијан, практиката на грчките аеродроми неофицијално да ги ослободат патниците од Велика Британија од проверките на EES за да избегнат редици, и понатаму ќе продолжи.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Возач на висок владин функционер вработен во Службата за општи и заеднички работи (СОЗР) е приведен за земање мито. Барал 1.500 евра за да посредува за вработување на пожарникар во Град Скопје, соопштија од МВР и Обвинителството за гонење организиран криминал и корупција. Од Владата потврдија дека лицето Д.Ц. во моментот на незаконското делување работело како возач за потребите на Генералниот секретаријат на Владата, откако медиумите претходно објавија дека станува збор за возачот на владиниот ген-сек Игор Јанушев. Оттаму додаваат дека целата акција е дел од заложбите на Владата за бескомпромисна борба против корупцијата.

Полицијата и ОЈОГОКК постапувале по пријава од граѓанин за случајот, а осомничениот бил приведен во моментот кога ги примал претходно обележаните пари. Поради опасност од бегство, можност за влијание врз сведоците во постапката и ризик од повторување на кривичното дело, по предлог на јавен обвинител судија на претходна постапка му определил мерка притвор во траење од 30 дена, соопштија од ОЈОГОКК.

-Постапката е иницирана по пријава на граѓанин од кого осомничениот, во периодот од 24 јули до 4 септември 2026 година, побарал 1.500 евра за да го искористи своето претпоставено влијание. Осомничениот, кој работел како возач на висок владин функционер, му ветил на оштетениот дека ќе посредува кај службени лица во Град Скопје во врска со вработување по распишан оглас за прием на пожарникари. По пријавувањето, надлежните органи, во координација со предметниот обвинител, презедоа дејствија за обезбедување докази. На 4 септември 2026 година, осомничениот е затекнат при примопредавање на 500 евра како дел од побараната награда од 1.500 евра, велат од ОЈОГОКК.

Од МВР соопштија дека Единицата за корупција при министерството во координација со надлежен јавен обвинител постапувале по првичната пријава за незаконскиот поткуп.

-Во рамки на преземените мерки и активности, Д.Ц. вработен како возач во СОЗР при Влада на РСМ, е затекнат при примање на претходно обележани парични средства, по што е лишен од слобода. По целосно документирање на случајот до надлежното јавно обвинителство поднесена е соодветна пријава, велат од МВР.

Апсењето за мито беше повод и за партиски препукувања меѓу власта и опозицијата. Од СДСМ велат дека случајот како што тврдат, покажал дека „сите земаат мито, дури и возачите на Владата“.

-Можеби дел од полицијата си ја врши својата работа, меѓутоа, како и во досегашните случаи, досега никој не одговара. Баш да видиме дали во овој случај ќе одговара возачот или само со еден телефонски повик ќе му биде завршена работа и да видиме да се истражи целата процедура, да видиме дали овој човек е само продолжена рака на Игор Јанушев, велат од СДСМ.

Реагираа од ВМРО-ДПМНЕ. -Борба против криминал е апсење на вработен кој се обидел да земе мито, тоа тешко го сфаќа СДС затоа што кај нив се крадеше од чистачка до премиер, а во нивно време немаше ништо од ова да се знае, никој немаше да биде санкциониран, а тие пари одамна ќе легнеа кај некој од главешините на СДС, велат од владејачката партија.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.