АФД планира создавање сопствена пратеничка група во Европарламентот - Канал 5

АФД планира создавање сопствена пратеничка група во Европарламентот

Пратеничка група во Европскиот парламент може да формираат најмалку 23 пратеници, кои мора да доаѓаат од најмалку една четвртина од земјите членки на ЕУ или во сегашниот случај од најмалку седум. 

АФД планира создавање сопствена пратеничка група во Европарламентот

Германската екстремно десничарска партија Алтернатива за Германија (АФД) соопшти дека се откажала од идејата да бара повторно членство во групацијата Идентитет и демократија (ИД), предводена на францускиот Национален собир (РН) на Марин Ле Пен и наместо тоа ќе се насочи кон создавање сопствена парламентарна група во Европскиот парламент.

Директен повод за исклучување на АФД од ИД, неколку недели пред јунските Европски избори, беше изјавата на еден од нејзините водечки кандидати Максимилијан Кра во текот на изборната кампања дека сите припадници на нацистичката Ес-Ес формација во Втората светска војна не треба по автоматизам да се сметаат за воени злосторници. На ова му претходеа и обвинувањата против истакнати членови на АФД за поврзаност руските тајни служби.

Еден ден по изборите за Европскиот парламент, АФД реши да го исклучи Кра од партијата, како дел од планот одново да пристапи кон екстремно десничарската група Идентитет и демократија (ИД).

Според извори во АФД, партијата првично сакала одново да се приклучи кон ИД, како дел од стратегијата за создавање моќен сојуз на екстремната десница, но и поради тоа што формирањето нова група со помали партии „не изгледала привлечна“. Сепак, откако минатата недела раководството на ИД се изјасни против повторен прием на АФД, партијата почнала „активно да работи“ на формирање сопствена екстремно десничарска група, за што веќе преговара со европратеници од други земји членки на ЕУ.

Пратеничка група во Европскиот парламент може да формираат најмалку 23 пратеници, кои мора да доаѓаат од најмалку една четвртина од земјите членки на ЕУ или во сегашниот случај од најмалку седум.

Истите извори од АФД додаваат дека потенцијалните партнери се бараат меѓу деветте екстремно десничарски партии потписнички на „Софиската декларација“, што ја иницираше бугарската партија Преродба, и во која се предлагаат мировни преговори за прекин на војната во Украина и „запирање на неодговорната бирократија“ на ЕУ.

Како можни кандидати за членови на новата група предводена од АФД, покрај Преродба, се посочуваат и грчкото Демократско патриотско движење „Победа“ (НИКИ), партијата Се.О.Се. Романија (СОС), словачкото Движење Република (ХР), полската коалиција Конфедерација за слобода и независност или нејзината членка Народно движење (РН), унгарското Движење Наша татковина (МХМ) и шпанската партија Забавата заврши (САЛФ). Ниту една од овие партии засега не е членка на некоја групација, иако дел од нив најавија планови за приклучување кон ИД.

Кон новата групација на АФД би можела да се приклучи и француската европратеничка Сара Кнафо од националистичката и десно популистичка партија Повторно освојување (Р!), која за разлика од нејзините сопартијци одби да пристапи кон пратеничката група Европски конзервативци и реформисти (ЕЦР).

Милан Ухриј од словачкото Движење Република изјави дека партијата е во контакт со „сите релевантни десничарски политички партии“. - Дискусиите се во тек. Ќе видиме во следните неколку дена, изјави Ухриј.

Извори од АФД најавуваат дека формирањето на нејзината пратеничка група би можело да биде објавено веќе на почетокот на претстојнава недела.

Но, од друга страна, европратеничка на полската Конфедерацијата, Ана Брилка, смета дека и „покрај желбата и напорите“ на АФД и некои други партии, „малку е веројатно“ формирање на нова десничарска група во Европскиот парламент. Конфедерацијата, која има шест европратеници, покрај од АФД има понуди за приклучување и кон ИД и ЕЦР.

Според извори во Европарламентот, дел од десничарските партии чекаат да видат дали ќе дојде до евентуално спојување на ИД и ЕЦР, која е предводена од Браќата на Италија (ФДИ) на италијанската премиерка Џорџа Мелони, па евентуално да се приклучат на ваквиот „моќен сојуз на десницата“.

Сепак, здружувањето на сегашните две десничарски групации во голема мерка ќе зависи од одлуката на Мелони дали ќе го поддржи реизборот на Урсула фон дер Лајен за претседател на Европската комисија, имајќи предвид дека ИД е категорично против нејзино останување на оваа функција.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Естонија ја затвора границата со Русија на 6 месеци

Од 1 декември, Естонија ќе ги затвори своите гранични премини кон Русија на најмалку шест месеци од безбедносни причини, соопшти во петокот владата на оваа балтичка земја.

Естонија ја затвора границата со Русија на 6 месеци

Претходно оваа недела, Естонија најави затворање на сите гранични премини со Русија, што ќе стапи на сила следниот месец. Ова уследи по сомнителен напад со подметнување пожар во една естонска одбранбена компанија – инцидент за кој Талин ја обвини Москва – иако првично не беше прецизирано колку долго ќе трае затворањето.

Одговор на непријателските активности на Русија

„Оваа одлука е одговор на континуираните непријателски активности на Русија против Естонија и други европски земји“, се наведува во соопштението на владата.

„Компании од естонската одбранбена индустрија беа цел на напади двапати оваа година, а според Естонската служба за внатрешна безбедност, двата напади биле организирани од руските специјални служби“, се додава во соопштението.

Москва постојано ги отфрла обвинувањата од европските власти за нејзина вмешаност во акти на саботажа. Естонија – членка на НАТО и на Европската унија, како и цврст поддржувач на Украина – моментално има пет гранични премини преку кои патниците можат да влезат во Русија или да излезат од неа, истакна владата.

Извор: Индекс.хр

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Николоски: Преку 100 милиони денари инвестиции во инфраструктурата во Валандово. Ќе се реконструира и регионалниот пат Струмица -Валандовo

Со комбинирана владина поддршка во инфраструкутрата, земјоделството и туризмот, правиме развој на општина Валандово.

Николоски: Преку 100 милиони денари инвестиции во инфраструктурата во Валандово. Ќе се реконструира и регионалниот пат Струмица -Валандовo

Предвидовме финансиска поддршка од околу 100 милиони денари, од кои 65 милиони денари се директно од буџетот на Министерството за транспорт и околу 35 милиони денари преку двата повици за инфраструктурни проекти, истакна заменик претседателот на Владата и министер за транспорт Александар Николоски, при днешената посета на општината Валандово.

“ Само преку овие 65 милиони денари од Министерството за транспорт реализираме навистина еден голем проект, а тоа е асфалтирање на улици и тоа во село Собри од 650 метри, во село Пирава од 580 метри, во село Брајковци од 774 метри, во село Раброво во должина од 1.230 метри и во село Марвинци, каде што сме сега, во должина од 1.560 метри, што сериозно треба да допринесе за подобрување на условите за живот на жителите на сите овие населени места. Но, исто така, имајќи предвид дека овие населени места се во близина на Коридорот 10, се работи за најживиот и економски најзначајниот автопат, ова ќе значи можност и за искористување на туристичкиот потенцијал на овие места. Веќе зборувавме со градоначалникот во однос на поголема презентација на познатиот Исар Марвинци, кој може да стане сериозна туристичка атракција, така што ќе работиме во насока и на таа поддршка, со цел да се зголеми бројот на туристи коишто доаѓаат. Ако на тоа се додадат и мерките за поддршка на земјоделието, што ги прави Владата, во една комбинирана поддршка на развојот на инфраструктурата и развојот на земјоделието, мислам дека многу можеме да направиме во следниот период. И градоначалникот и пратеничката прават одлична работа, даваат голем свој личен ангажман и посветеност во нивната работа и затоа општина Валандово и во годините коишто се пред нас ќе продолжи да ја има поддршката од Владата и ќе продолжиме заеднички да инвестираме и да имаме уште подобри проекти”- изјави вицепремиероот Николоски

Тој најави и реконструкција на регионалниот пат од Валандово до Струмица преку Валандовско брдо.

“ Имајќи предвид дека постојниот пат е во лоша состојба, екипи на Јавното претпријатие за државни патишта направија увид, ја скенираа состојбата, направивме проект и очекувам во најскоро време да излезе повикот од ЈПДП, со кој повик треба да се избере изведувач кој ќе направи целосна реконструкција на овој пат. Значи, планираме целосна реконструкција на патот што води од Струмица до Валандово” – додаде вицепремиерот Николоски.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Се појави апче за рак на панкреасот: „Ова е најголемиот напредок во последните децении“

Апче што може да ги намали – па дури и потенцијално да ги елиминира – туморите на панкреасот, се опишува како најзначаен напредок во лекувањето на оваа болест во последните неколку децении.

Се појави апче за рак на панкреасот: „Ова е најголемиот напредок во последните децении“

Лекот, „дараксонрасиб“ (daraxonrasib), кој се давал за време на клиничко испитување, довел до исчезнување на видливите тумори кај еден од дванаесет пациенти, додека кај речиси сите учесници го запрел напредувањето на болеста, пренесува „Гардијан“.

Смртоносна болест

Во студијата учествувале 61 пациент со ново дијагностициран, напреднат рак на панкреасот, кој се проширил и на други делови од телото. Иако лекарите предупредуваат дека апчето сè уште не може да се смета за дефинитивен лек – а останува нејасно и колку долго може да ја држи болеста под контрола – тие ги сметаат резултатите за охрабрувачки. Се очекува третманот да им обезбеди на пациентите повеќе време, дури и да доведе до целосна ремисија.

Ракот на панкреасот е исклучително смртоносен. Половина од сите дијагностицирани лица умираат во рок од три месеци, а само околу три отсто од пациентите преживуваат пет години откако болеста ќе се прошири на други органи. Во Обединетото Кралство, овој вид рак има најниска стапка на преживување од сите вообичаени типови на рак.

Значително продолжување на животот

Пациентите биле следени во просек 18 месеци, а во некои случаи, ракот не се вратил во текот на тој период. За време на испитувањето, растот на туморот бил запрен кај 90 отсто од пациентите. Кај нешто повеќе од 60 отсто од учесниците, туморите се намалиле или исчезнале, додека кај приближно осум отсто станале неоткривливи на КТ-снимките.

Една година по почетокот на третманот, 76,6 отсто од пациентите сè уште биле живи. За споредба, кај пациентите кои примаат само хемотерапија, стапката на едногодишно преживување изнесува меѓу 40 и 45 отсто. Планирани се долгорочни студии за да се утврди дали кај некои пациенти може да се постигне трајна ремисија.

„Најблиску до лек што некогаш сме биле“

Резултатите беа претставени на симпозиум за молекуларни цели и терапија на рак во Барселона од страна на д-р Вунгки Парк, онколог во Центарот за рак „Меморијал Слоан Кетеринг“ во Њујорк. „Ова е најблиску што некогаш сме биле до лек“, рече Парк, додавајќи дека никогаш претходно нема видено толку голем број тумори да исчезнат кај пациенти чиј рак веќе метастазирал.

„Почнуваме да гледаме не само поголем процент на одговор на туморите кон терапијата, туку и подлабоки одговори, како и речиси двојно подолга контрола врз болеста – што на крајот би можело да резултира со подолго преживување“, изјави тој. „Медијаната на периодот на следење изнесува 18 месеци. Замислете – во просек 18 месеци, болеста едноставно исчезнува од снимките на компјутерска томографија (КТ)... тоа е најблиску што може да се стигне до целосна ремисија... неверојатно е.“

Механизам на дејство и потенцијал за други видови тумори

Дараксонрасиб (Daraxonrasib) спаѓа во класа на лекови познати како инхибитори на „KRAS“. Тој делува така што се врзува за специфични мутации, присутни кај поголемиот дел од случаите на рак на панкреасот, и ги деактивира. Овие мутации вообичаено го поттикнуваат растот на туморот. Постои надеж дека овој третман би можел да биде ефикасен и кај десетина други видови рак кои можеби содржат слични мутации.

Мишел Мичел, извршен директор на организацијата „Cancer Research UK“, изјави дека се потребни дополнителни истражувања, но ги поздрави резултатите како најголем напредок за пациентите со рак на панкреасот во последните неколку децении. „Овие резултати отвораат возбудлива можност овој напредок на крајот да го отвори патот за лекување и на други видови рак кои носат мутации во генот KRAS“, рече таа. Сепак, Мичел напомена дека се потребни повеќе клинички испитувања пред третманот да биде одобрен за широка употреба, како и дека, и покрај овие достигнувања, стапката на преживување кај ракот на панкреасот останува многу ниска.

Извор: Индекс.хр

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

притисни ентер